Urkunde Nr. 1551 aus Band III

Seite im UB:

386-388

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. II (Inventar 25 ), Nr. 87.

Druckvorlage:

nach Original

Abdruck als:

Volltext

Sprache:

Latein

---

1551

1406 Februar 26 König Sigmund bestätigt für die sieben Stühle die Urkunde des Königs Sigmund von 1387 Nr. »1214 enthaltend die Urkunde der Königin Maria von 1383 Nr. »1172 mit dieser die Urkunde des Königs Ludwig I. von 1366 Nr. »860 mit dieser die Urkunde des Königs Karl von 1317 Nr. »350 enthaltend die Urkunde des Königs Andreas II. von 1224 Nr. »43, betreffend die Siebenbürger Deutschen von Broos bis Draas.

Sigismundus dei gratia Hungariae, Dalmaciae, Croaciae, Ramae, Seruiae, Galliciae, Lodomeriae, Cumaniae Bulgariaeque rex ac marchio Brandemburgensis, sacri Romani imperii archicamararius necnon Bohemiae et Lucemburgensis heres omnibus Christi fidelibus praesentibus pariter et futuris praesentium notitiam habituris salutem in omnium salvatore. Dum fidelium subditorum preces legitimas ad exauditionis gratiam admittimus, regiminis solium ampliamus et eorum vota ad fidelitatis opera ferventius incitamus. Proinde ad universorum tam praesentium quam futurorum notitiam harum serie volumus pervenire, quod cum nos praelatorum, baronum et potiorum regni nostri procerum communicato consilio et sana exinde deliberatione subsecuta id statuentes decreverimus et ubique in regno nostro fecerimus publice proclamari, ut universae literae excellentissimi principis domini Lodouici olim regis Hungariae et cetera sub ipsius secreto sigillo tantummodo et serenissimarum principum dominarum Elizabeth matris et Mariae contoralis nostrarum carissimarum dicti regni Hungariae reginarum felicium reminiscentiarum necnon nostrae sub earum atque nostris tam maioribus quam minoribus sigillis super quibusvis factis et praesertim possessionariis quibuscumque personis dignitate quavis et conditione fungentibus eccle- [S. 387] siasticis videlicet et saecularibus datae et assignatae pro tollendo omni dubio, removendo scandalo et ad evitanda multa atque varia, quae propter sigillorum ipsarum dominarum reginarum necnon nostrorum deperditionem atque nostri maioris videlicet duplicis ex causis et rationibus legitimis confractionem in multorum iuribus et praesertim possessionariis damna gravia et periculosa detrimenta hactenus evenire potuerunt, a festo beati Greorgii martyris iam proxime praeterito¹⁾ usque festum eiusdem primitus affuturum²⁾ sub poena revocationis, annullationis et cassationis huiusmodi literarum non producendarum per nos videndae, examinandae et si opus fieret sub nostro maiori sigillo de novo praeparato confirmandae, approbandae et ratificandae nostrae claritati exhiberi deberent conspectui et praesentari, tandem fideles nostri viri providi Jacobus alias proconsul et Johannes Ferl modernus proconsul³⁾ cives civitatis nostrae Cybyniensis in suis et universorum fidelium Saxonum nostrorum septem sedium partium Transsilluanarum personis et nominibus nostrae maiestatis adeuntes conspectum exhibuerunt nobis quasdam literas nostras patentes, priori maiori authentico sigillo nostro alias ut praefertur rationabiliter permactato a tergo consignatas, privilegium quondam dominae Mariae reginae contoralis nostrae carissimae confirmans tenorem literarum privilegialium illustris principis quondam domini Lodouici regis Hungariae et cetera continentium in se literas privilegiales olim domini Karoli bonae memoriae praedecessoris nostri super variis libertatum et gratiarum praerogativis pro ipsis Saxonibus dictarum septem sedium factarum et concessarum emanatas, ratificantes et confirmantes, tenoris infra scripti. Supplicantes exinde culmini nostro suis et nominibus quibus supra, ut easdem literas ratas, gratas et acceptas habendo nostrisque literis privilegialibus sub praedicto moderno duplici maiori authentico sigillo verbotenus emanandis pro ipsis Saxonibus nostris ac eorundem universis heredibus et posteritatibus perenniter valituras innovantes dignaremur confirmare. Quarum tenor talis est.<ku>(Folgt die Urkunde des Königs Sigmund von 1387 Nr. »1214 mit der Urkunde der Königin Maria von 1383 Nr. »1172, enthaltend die Urkunde des Königs Ludwig I. von 1366 Nr. »860 mit der Urkunde des Königs Karl von 1317 Nr. »350 enthaltend die Urkunde des Königs Andreas II. von 1224 Nr. »43.) Nos igitur humillimis et devotis praefatorum Jacobi et Johannis supplicationibus nostrae per eos nominibus quibus supra subiective oblatis maiestati regia benignitate exauditis et clementer admissis praefatas literas nostras patentes non abrasas, non cancellatas nec in aliqua earum parte vitiatas sed omni prorsus suspicionis vitio destitutas praesentibus verbotenus insertas quoad omnes earum continentias, clausulas et articulos acceptamus, approbamus et ratificamus, ipsas nihilominus requirentibus ipsorum fidelium Saxonum nostrorum praeclaris fidelitatibus et sinceris obsequiorum meritis per ipsos nobis et sacro nostro regio diademati iugiter et laudabiliter temporibus incumbentibus exhibitis et impensis simul cum ante fatis libertatibus et gratiarum [S. 388] praerogativis ac ipsarum toto tenore superius latius explicatis mera auctoritate regia et potestatis plenitudine ac ex certa scientia nostrae maiestatis, praelatorum etiam et baronum nostrorum consilio praematuro ac uniformi decreto eorundem pro annotatis universis Saxonibus nostris eorundemque cunctis heredibus et sobolibus innovantes perpetuo valituras confirmamus praesentis scripti nostri patrocinio mediante. In cuius rei memoriam firmitatemque perpetuam praesentes concessimus literas nostras privilegiales pendentis et authentici sigilli nostri novi duplicis praedicti munimine roboratas. Datum per manus reverendi in Christo patris domini Eberhardi episcopi Zagrabiensis, aulae nostrae summi cancellarii fidelis nostri dilecti, anno domini millesimo quadringentesimo sexto, quarto Kalendas Marcii, regni autem nostri anno decimo octavo. Venerabilibus in Christo patribus dominis Valentino tituli sanctae Sabinae sacrosanctae Romanae ecclesiae presbytero cardinale et ecclesiae Quinqueecclesiensis gubernatore, Johanne Strigoniensi, Calocensi sede vacante, Andrea Spalatensi, Jadriensi sede vacante et altero Andrea Ragusyensi archiepiscopis, Luca Waradiensi, Stephano Transsilluano, eodem domino Eberhardo Zagrabiensi, Agriensi sede vacante, Johanne Boznensi, Vesprimiensi sede vacante, Johanne Jauriensi, Vaciensi sede vacante, fratribus Dosa Chanadiensi et Hynkone Nitriensi electis ac Thoma Seniensi ecclesiarum episcopis ecclesias dei feliciter gubernantibus, Sirimiensi, Tragoriensi, Scardonensi, Nonensi, Tininiensi, Sibinicensi, Makarensi, Pharensi et Corbauiensi sedibus vacantibus. Necnon viris magnificis Nicolao de Gara regni Hungariae praedicti palatino, Johanne et Jacobo vaivodis nostris Transsilluanis, comite Frank filio quondam Konyae bani iudice curiae nostrae, Paulo Bisseno et altero Paulo de Pech Dalmaciae et Croaciae praedictorum ac totius Sclauoniae regnorum nostrorum, Johanne de Maroth Machouiensi banis, honore banatus Zeuriniensis vacante, Nicolao Treutel de Neuna tavarnicorum et comite de Posega, Symone filio praedicti quondam Konyae bani ianitorum, Martino Ders dapiferorum, Laurencio de Tar pincernarum, Petro Cheh agasonum nostrorum magistris et Silstrangh comite Posoniensi aliisque quampluribus regni nostri comitatus tenentibus et honores.


1) 1405 April 24.^{^}
2) 1406 April 24.^{^}
3) Fehlt in der Vorlage.^{^}