Urkunde Nr. 1888 aus Band IV

Seite im UB:

133-135 ^a)

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Druckvorlage:

nach Original

Abdruck als:

Volltext

Sprache:

Latein

---

1888

Ungarisch-Brod 1421 April 11 König Sigmund verbietet dem siebenbürgischen Adel, die reisenden Kaufleute der Stadt Klausenburg willkürlich einzukerkern oder sonstwie zu behindern. [S. 134]

Von der Kanzlei: Commissio propria domini regis.

Nos¹⁾ Sigismundus¹⁾ dei gratia Romanorum rex semper augustus ac Hungariae, Bohemiae, Dalmaciae, Croaciae et cetera rex memoriae commendamus per praesentes, quod fideles nostri dilecti, circumspecti Caspar Francisci iudex et Rodulphus iuratus civis nostrae civitatis Coluswar vocatae in eorum ac universorum concivium, hospitum et incolarum ipsius personis nostri adeuntes culminis conspectum celsitudini nostrae exposuerunt gravi sub querela, quomodo plerique forent nobiles et alterius status ac conditionis homines, qui ipsos cives et hospites nostros, dum iidem pro acquirendis victuum suorum necessariis hincinde proficiscerentur cum rebus et bonis eorum mercimonialibus, nulla prius ex parte eorum coram suo iudice ordinario iustitia postulata, in eorum propriis aut aliorum possessionibus seu tenutis in personis rebusque et bonis suis quibuscumque arestarent et prohiberi facerent in praeiudicium ipsorum et damnum, immo verius generalis nostri decreti vilipendium valde grande, signanter pro debitis, delictis, et excessibus aliorum. Super quo supplicarunt praedicti exponentes sibi ceterisque civibus et hospitibus nostris per nostram maiestatem opportune provideri. Unde cum iusti pro iniustis et innoxii pro reorum excessibus non debeant aliquatenus impediri, nolentes igitur praescriptos cives et hospites nostros sic contra iustitiam et generale nostrum decretum impediri et molestari seu damnificari assumpto praelatorum et baronum nostrorum in praesentiarum nobiscum existentium consilio praematuro statuendum decrevimus, ut quicumque nobilis aut alterius status et conditionis homo de cetero aliquem ex civibus et hospitibus nostris, non postulata prius ex parte talis iustitia nec iure obtento, in propria sua possessione arestaverit seu prohiberi fecerit, quod evidenti testimonio potest probari, talis in facto potentiae comiti vel vicecomiti illius comitatus, in quo hoc factum fuerit necnon in expensis et damnis eiusmodi arestati eidem arestato, qui autem nobilis aut homo possessionatus non in propria sed in aliorum possessione talismodi arestationem fecerit, ex tunc talis in expensis et damnis arestati eidem arestato, ille vero nobilis, qui huiusmodi arestationem in sua possessione fieri permiserit seu consenserit, in tribus marcis denariorum pro tempore currentium praefato comiti vel vicecomiti similiter illius comitatus, in quo hoc fuerit attentatum, convincatur eo facto. Et haec volumus et mandamus per fora et alia loca publica in praedictis partibus nostris Transsiluanis ubique palam facere proclamari, [S. 135] committentes et firmiter mandantes fidelibus nostris vaivodis vel vicevaivodis necnon comitibus vel vicecomitibus quorumlibet comitatuum praedictarum partium nostrarum Transsiluanarum praesentibus et futuris praesentium notitiam habituris, ut ipsi facta praemissorum legitima et praecona proclamatione et insinuatione expertaque exinde mera rei veritatis certitudine quoslibet huiusmodi nostri decreti et mandatorum transgressores ad plenariam observationem eorum per poenas supra dictas et gravamina artius compellant et astringant auctoritate nostra regia praesentibus eis in hac parte attributa mediante. Datum in nostra civitate Broda Hungaricali, feria sexta proxima ante festum beatorum Tiburcii et Valeriani martyrum, anno domini M^o CCCCXX primo, regnorum nostrorum anno Hungariae et cetera XXXV^to, Romanorum XI^mo et Bohemiae primo.

Von der Kanzlei: Lecta et correcta.

Auf der Rückseite vom Schreiber der Urkunde: Coluswar.

Von anderer gleichzeitiger Hand: Super arrestatione et poena arrestantis.


a) Seitenumbruch nach Kopfregest.^{^}

1) Verlängerte Schrift. [2x]^{^}