Urkunde Nr. 679 aus Band II

Seite im UB:

97-99

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Heutige Signatur:

Stadt Bistritz [Primăria Oraşului Bistriţa] (Inventar 58ff.)

Druckvorlage:

nach Original

Abdruck als:

Volltext

Sprache:

Latein

---

679

1353 April 24 König Ludwig I. verleiht der Stadt Bistritz das Jahrmarktrecht gleich der Stadt Ofen.

Lodouicus dei gratia Hungariae, Dalmaciae, Croaciae, Ramae, Seruiae, Galliciae, Lodomeriae, Cumaniae Bulgariaeque rex, princeps Sallernitanus et honoris montis sancti Angeli dominus omnibus Christi fidelibus tam praesentibus quam futuris notitiam praesentium habituris salutem in omnium salvatore. Regia celsitudo de utilitate commodosa sibi subiectorum attenta meditatione debet invigilare, et cum eorum commodo et utilitati providebit, in eorum quiete fovetur et quiescit in pace subiectorumque numerus in fidelitate sacrae regiae coronae augetur continuis incrementis. Proinde ad universorum notitiam harum serie volumus pervenire, quod nos civitatem [S. 98] nostram Byztricia vocatam in partibus Transsiluanis existentem regiae gratiae dono prosequi volentes et amplecti, pro utilitate commodosa civium et hospitum nostrorum de eadem ad humilem supplicationem ipsorum per Martinum fiiium Johannis et Stephanum filium Petri iuratos cives de eadem ad nostram maiestatem transmissos nobis humiliter porrectam nundinas seu congregationem generalem ac forum annuale ab omni iurisdictione et potestate quorumlibet magnatum et baronum regni nostri specialiter vero vaivodae Transsiluani vel vices suas gerentium pro tempore constitutorum penitus liberum et exemptum iuxta modum, morem et libertatem nundinarum seu fori annualis Budae celebrari consueti in dicta civitate nostra celebrari duximus perpetuo concedendum ita videlicet, quod praedictae nundinae congregatio generalis seu forum annuale debet inchoari in festo beati Bartholomei apostoli usque quindenas eiusdem festi¹⁾ in singulis annis duraturum. Nihilominus mercatores, institores ac cuiusvis status et conditionis homines ad dictam congregationem seu forum annuale de quibuscumque partibus regni nostri et aliorum regnorum circumiacentium cum eorum rebus et mercibus ac bonis cuiusvis generis existant libere veniant et secure. Durante quoque dicta congregatione seu foro generali numero dierum superius enarrato nullus de eisdem forensibus mercatoribus et hominibus ad ipsam congregationem confluentibus et etiam ab incolis et habitatoribus dictae nostrae civitatis in eadem civitate seu area ipsius congregationis et fori generalis aliquod tributum seu exactionem tributariam recipere valeat atque possit. Praeterea mercatores vel alii cuiusvis status homines in ipsa congregatione se mutuo nullatenus possint arestare seu prohibere nec in ipsa congregatione magnatum quicumque et baronum specialiter vero vaivoda Transsiluanus et vices suas gerentes ac comes de Byztricia seu iudex noster in ipsa civitate pro tempore constitutus iurisdictionem seu potestatem aliquam habere possint et exercere, sed universae causae in ipsa congregatione emergendae per iuratos eiusdem civitatis nostrae discutiantur et fine debito terminentur. In cuius rei memoriam firmitatemque perpetuam praesentes eisdem civibus et hospitibus nostris concessimus literas nostras privilegiales pendentis et authentici sigilli nostri duplicis munimine roboratas. Datum per manus venerabilis in Christo patris domini Nicolai praemissa et apostolicae sedis gratia episcopi ecclesiae Zagrabiensis, aulae nostrae vicecancellarii dilecti et fidelis nostri, anno domini millesimo CCC^mo quinquagesimo tertio, VIII^o Kalendas mensis Maii, regni autem nostri anno duodecimo. Venerabilibus in Christo patribus et dominis Nicolao Strigoniensi locique eiusdem comite perpetuo et Dominico Spalatensi archiepiscopis, fratre Dyonisyo archielecto Colocensi, Nicolao Agriensi, Demetrio Waradiensi, Andrea Transsiluano, Colomano Jauriensi, Nicolao Quinqueecclesiensi, Mychaele Waciensi, Johanne Weszprimiensi, Thoma Chanadiensi, fratribus Thoma Syrimiensi, Peregrino Boznensi, Stephano Nitriensi et Blasyo Tyniniensi episcopis ecclesias dei feliciter gubernantibus. Magnificis baronibus Nicolao palatino et iudice Cumanorum, Nicolao filio Laurencii vaivoda Transsiluano et comite de Zonuk, Cykou magistro tavar- [S. 99] nicorum nostrorum, comite Thoma iudice curiae nostrae, Andrea filio Lachk de Machou et Nicolao de Zeurino banis, Paulo magistro tavarnicorum dominae reginae genetricis nostrae carissimae, Olyuerio iudice curiae eiusdem dominae reginae necnon comite castri Ferrei et Supruniensis, Leukus dapiferorum et pincernarum, Dyonisyo agasonum ac Twtheus ianitorum nostrorum necnon Johanne filio eiusdem Oliuerii dapiferorum reginalium magistris, Symone filio Mauricii comite Posoniensi et aliis quampluribus regni nostri comitatus tenentibus et honores.


1) August 24 bis September 7. ^{^}