Urkunde Nr. 593 aus Band II

Seite im UB:

10-11

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. II (Inventar 25), Nr. 153.

Druckvorlage:

nach Einschaltung (Insert)

Abdruck als:

Volltext

Sprache:

Latein

---

593

Hermannstadt 1343 November 14 Chanadinus, Erzbischof von Gran, nimmt über päpstlichen Auftrag die Abtei Kerz in seinen besondern Schutz.

Chanadinus dei et apostolica gratia¹⁾ archiepiscopus Strigoniensis locique eiusdem comes perpetuus universis comitibus, castellanis, nobilibus et aliis cuiusvis conditionis et status hominibus necnon ecclesiarum rectoribus quocumque nomine censeantur amicis suis reverendis, quibus praesentes ostenduntur, benedictionem paternam cum salute. Apostolicae sedis providentia cunctarum ecclesiarum regimini praesidens sollicita liberalitate earum necessitati digne compatitur et sua iura ac libertatum necnon proprietatum munimenta, quibus sanctissimi eorum fundatores ipsas multifariorum donativorum munificentiis et libertatibus praedotarant, a quibus nunc per importunizantium tyrannizationes quaerentium quae sua sunt in detrimentum suae salutis namque Ihesu Christi quasi irrecuperabiliter corruere, ad ius earum quibus pertinent intendens revocare inter alias regni catholici ecclesias ecclesiam virginis gloriosae de Kercz in extremo confinio regni Hungarici a parte scismaticorum constructam, quae tam per ipsos scismaticos quam etiam malos Christianae fidei cultores indicibiliter dilapidata exstitit et suis proprietatibus funditus desolata, piae compassionis oculis prospiciens volensque eam in aliqualem suae facultatis proprietatem revocare et augere ipsam abbatiam cum omnibus suis iuribus et proprietatibus apostolica sua auctoritate mediante nobis commisit protegendam, [S. 11] conservandam et tuendam, omnesque possessiones suas, libertates ac iura ad ius eiusdem ecclesiae iniunxit reducenda. Quapropter vestrae nobilitatis et honestatis universitatem sub poena excommunicationis ipsius domini nostri summi pontificis nobis commissa, ordinaria etiam nostra auctoritate qua fungimur firmiter admonemus et hortamur, quatenus universas possessiones et quaelibet iura ipsius ecclesiae beatae virginis de Kercz, si quas occupatas detinuistis et detinetis, statim visis praesentibus eidem ecclesiae pure et simpliciter ac de plano remittatis nec a modo ad ipsius iura et proprietates in posterum vos intromittere debeatis, eam in suis libertatibus antiquitus sibi donatis indemnem et illaesam velitis conservare. Si qui vero contrarium facere in praeiudicium mandati domini nostri summi pontificis attemptaverint, indignationem omnipotentis dei et ipsius virginis gloriosae matris Mariae beatorumque Petri et Pauli apostolorum eius se noverint, ut tenor praedicti papalis mandati insinuat, incurrisse, in extremo etiam iudicii examine de iniuriis eidem ecclesiae illatis exsecrabilem mercedem, severae divinae vindictae recipiant ultionem. Et quia huius negotii executioni praesentialiter adesse non valemus, vobis dominis . . praeposito et . . decano Cibiniensi nunc et pro tempore constitutis in virtute sanctae obedientiae sub eisdemque poenis excommunicationis firmiter iniungentes mandamus, quatenus omnes occupatores possessionum ac iurium dictae ecclesiae detentores aut violentiarum seu iniuriarum illatores, eorum consiliarios, auxiliarios et fautores quoscumque inveneritis absque distinctione personae qualiscumque salubri admonitione praehabita ad satisfaciendum omnium praemissorum inducatis exhortando. Qui si fecerint bene quidem, alioquin ipsos tales, domos eorum et omnes ad tales pertinentes infra competentis termini cursum firmissimo subiiciatis ecclesiastico interdicto. Qui si et in eodem interdicto animo indurato persistere voluerint et illata emendare aut ablata restituere non curaverint, ex tunc eos pulsatis campanis et exstinctis candelis praedictae sententiae excommunicationis vinculo denuncietis innodatos, ab omni Christi fidelium communione facientes evitari, donec illata emendent et ablata condigna satisfactione recompensent, auctoritate ipsius domini nostri summi pontificis nobis commissa et nostra ordinaria qua fungimur mediante tenore praesentium ex nunc vobis delegata. Datum in Cibinio, feria sexta proxima post festum beati Martini confessoris, anno domini millesimo CCC^mo quadragesimo tertio.


1) Bis hierher kleine verlängerte Schrift. ^{^}