Urkunde Nr. 2217 aus Band IV

Seite im UB:

555-557

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Druckvorlage:

nach Original

Abdruck als:

Volltext

Sprache:

Latein

---

2217

Pressburg 1435 März 13 König Sigmund verbietet Ladislaus, dem Woiwoden von Siebenbürgen, und dem Vizewoiwoden, sich in Gerichtsangelegenheiten der Sieben Stühle einzumischen.

Von der Kanzlei: Relatio domini Clementis episcopi Jauriensis.

Nos¹⁾ Sigismundus¹⁾ dei gratia Romanorum imperator semper augustus ac Hungariae, Bohemiae, Dalmaciae, Croaciae et cetera rex, notum facimus tenore praesentium significantes quibus incumbit universis, quod venientes in conspectum nostrae serenitatis fideles nostri providi et circumspecti Jacobus magister civium nostrae civitatis Ci- [S. 556] biniensis ac Hedericus de Olczna et Laurentius de Weresmorth iudices, in eorum ac ceterorum universorum et singulorum iudicum, iuratorum, seniorum Saxonum et incolarum septem sedium Saxonicalium partium nostrarum Transsiluanarum personis, maiestati nostrae praesente et audiente magnifico Ladislao de Chaak earundem partium nostrarum Transsiluanarum vaivoda exposuerunt gravi cum querela, quod licet antiquis libertatibus, praerogativis et indultis per divos reges Hungariae, nostros scilicet praedecessores et consequenter per nostram maiestatem eis gratiose concessis, requirentibus ipsi et eorum quilibet a iudicio, iudicatu, et iurisdictione quorumlibet vaivodarum partium nostrarum Transsiluanarum praedictarum, pro tempore constitutorum exempti sint penitus et supportati esse debeant, tamen annotatus Ladislaus de Chaak modernus vaivoda, his non obstantibus, contra huiusmodi ipsorum libertatis metas nonnullarum possessionum dictarum septem sedium nostrarum Saxonicalium reambulando diversasque causas inter ipsos emersas iudicando, ipsos Saxones nostros vicibus multiplicatis perturbasset, impedivisset et molestasset, prohibitiones legitimas per eos in hac parte factas minime curando in libertatis ipsorum praeiudicium et derogamen multum grande, supplicantes nostro culmini annotati Jacobus magister civium, Hedericus et Laurentius iudices humili prece et subiectiva, ut ipsis exinde de remedio dignaremur providere opportuno. Et quia nos, qui ex suscepti regii regiminis officio tenemur quorumlibet nostrorum fidelium subiectorum incommoditates et gravamina imperiali atque regali remedio relevare praelatorum, baronum ac ceterorum regni nostri procerum praehabito consilio decrevimus et regali statuentes edicto, ut annotati Saxones nostri a modo in antea successivis semper perpetuis temporibus universis eorum cunctis libertatibus, iurisdictionibus praerogativis et indultis, per divos reges Hungariae nostros scilicet praedecessores et per nostram maiestatem eis concessis illibate uti, frui et gaudere debeant et valeant atque possint nullusque vaivodarum et vicevaivodarum partium nostrarum Transsiluanarum pro tempore constitutorum quovis quaesito colore sede quibuscumque iudicis, iudicatibus ac reambulationibus metarum ceterisque iuribus et iurisdictionibus ipsorum Saxonum nostrorum intromittere ac in eorum libertatibus, praerogativis et indultis ipsos impedire et molestare debeat, audeat atque praesumat quovismodo. Quo circa vobis fidelibus nostris magnifico Ladislao de Chaak dictarum partium nostrarum Transsiluanarum vaivodae praenotato ac ipsius vicevaivodae nunc constitutis et in futurum constituendis firmissimo nostro sub edicto praecipimus et mandamus, quatenus a modo in posterum de iudicio, iudicatu, reambulationibus metarum ceterisque iuribus et iurisdictionibus ipsorum Saxonum nostrorum contra praemissas eorum libertates quocumque vos intromittere ac ipsos impedire, perturbare et molestare nullomodo praesumatis gratiae nostrae sub obtentu. Praesentesque literas in praemissorum memoriam firmitatem- [S. 557] que perpetuam praedictis Saxonibus nostris concessimus duplicis novi autentici sigilli nostri, quo ut rex Hungariae utimur, munimine roboratas, quas post earum lecturam in exhibentis manibus semper volumus remanere. Datum Posonii secundo die festi beati Gregorii papae, anno domini millesimo quadringentesimo tricesimo quinto, regnorum nostrorum anno Hungariae et cetera quadragesimo octavo, Romanorum vigesimo quinto, Bohemiae quinto decimo, imperii vero secundo.

Unter der Plica: Relatio domini Clementis episcopi Jauriensi.


1) Verlängerte Schrift.^{^}

.