Urkunde Nr. 1891 aus Band IV

Seite im UB:

139-141

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Heutige Signatur:

Stadt Bistritz [Primăria Oraşului Bistriţa] (Inventar 58ff.).

Druckvorlage:

nach Original

Abdruck als:

Volltext

Sprache:

Latein

---

1891

Ungarisch-Brod 1421 April 11 König Sigmund verbietet allen geistlichen Richtern, die Bewohner des Bistritzer Distrikts in Testamentstreitigkeiten vor ihr Gericht zu ziehen.

Von der Kanzlei: Commissio propria domini regis.

Nos Sigismundus dei gratia Romanorum rex¹⁾ semper augustus ac Hungariae, Bohemiae, Dalmaciae, Croaciae et cetera rex memoriae commendamus significantes tenore praesentium quibus expedit universis, quod pro parte fidelium nostrorum universorum civium et hospitum ac totius communitatis nostrae civitatis Bistriciensis et districtus eiusdem partium nostrarum Transsiluanarum celsitudini nostrae quod displicenter accepimus expositum est gravi sub querela, quod quamquam ipsa nostra civitas Bistriciensis per nos dudum aliis nostris liberis civitatibus ipsius regni nostri Hungariae annumerata et aggregata eisdem²⁾ libertatibus, iuribus, privilegiis, gratiis, exemptionibus et aliarum libertatum praerogativis, quibus aliae civitates nostrae liberae gaudent, fruuntur et potiuntur, gaudere, frui et potiri debuerit, huiuscemodique libertatum praerogativis requirentibus nullus iudex ecclesiasticus seu spiritualis de causis forum saeculare seu civile tangentibus seu concernentibus, signanter in testamentis laicalibus, ubi videlicet per laicum laico, fratrem fratribus, nepotem nepotibus seu neptibus, amicum amicis et sic de similibus testamentum conditum fuerit, quae scilicet non fiunt ad pias causas vel ecclesias aut in relictis ecclesiae se ingerere aut quomodolibet intromittere debuerit, verum tamen huiusmodi libertatum praerogativis non obstantibus nonnulli forent [S. 140] iudices spirituales seu ecclesiastici, qui praemissis minime animadversis quadam consuetudine abusiva introducta allegantes, omnia testamenta ad ipsorum pertinere iudicium et eorum iudicatui fore commissa, se ad causas factum testamentarium laicale per laicum laico id praefertur factum et conditum concernentes se ingerendo ipsos cives et hospites nostros in huiusmodi causis coram se citari faciendo diversimode vexarent, turbarent et multipliciter impedirent, in graves immo gravissimas per hoc eos annis singulis expensas et fatigas involvendo, in praeiudicium praemissarum libertatum eorum praerogativarum non modicum atque damnum. Super quo supplicatum exstitit eis per nostram maiestatem opportune provideri. Et quia regalis providentia suorum subditorum commodis invigilare favore gratioso consuevit, petitiones ipsorum iustas et iuri consonas rationi ad exauditionis gratiam benignius admittendo praemissisque libertatum praerogativis requirentibus ac etiam praelatorum et baronum nostrorum necnon nonnullorum doctorum et iuris peritorum consilio ad hoc concurrente nullus iudicum spiritualium seu ecclesiasticorum causas forum saeculare seu civile respicientes, signanter testamenta laicalia ut praefertur iudicandi haberet facultatem. Igitur his permoti rationibus de praedictorum praelatorum et baronum ac doctorum et iuris peritorum consilio praematuro decrevimus et decernimus per praesentes, ut a modo in antea et deinceps temporibus semper perpetuis non obstantibus quibuscumque praetensis allegationibus quorumcumque iudicum ecclesiasticorum seu spiritualium harum in contrarium fiendis nullus iudicum ecclesiasticorum sive spiritualium praedictos iudicem, iuratos ac universos cives hospites et incolas praedictae nostrae civitatis Bistriciensis in quibusvis causis et causarum articulis ratione huiuscemodi testamentorum laicalium, exceptis tamen causis testamentorum quae fiunt ad pias causas ut puta ad limina beatorum Petri et Pauli atque Jacobi apostolorum et ad alia terrae sanctae loca aut ecclesiis seu in relictis ecclesiae aut personis ecclesiasticis et consimilibus, de quibus iudices saeculares se minime ingerere volumus, iudicare vel eorum astare iudicatui compellere nequaquam praesumant neque possint modo aliquali. Si quis autem de iudicio et iudicatu praedictorum iudicis et iuratorum civium praedictae nostrae civitatis Bistriciensis ratione huiusmodi testamentorum laicalium fiendis noluerit contentare, ex tunc in talismodi causa et aggravamine iudicii vel sententiae huiuscemodi in praesentiam iudicis et iuratorum civium Cibiniensium si opus fuerit per vim appellationis possit provocare, ubi cuilibet querulanti iudicium et iustitia non deerit evidens et condigna, prout dictaverit ordo iuris. Quocirca vobis fidelibus nostris universis et singulis iudicibus et iustitiariis ecclesiasticis sive spiritualibus praesentibus et futuris praesentium notitiam habituris firmiter praecipiendo mandamus, quatenus a modo in antea et deinceps praedictos iudicem, iuratos ac universos cives et in- [S. 141] colas praedictae nostrae civitatis Bistriciensis et districtus eiusdem in quibusvis causis et causarum articulis ratione eiusmodi testamentorum laicalium dumtaxat vestri in praesentiam citare seu iudicare vel vestro astare iudicatui compellere nequaquam praesumatis nec sitis ausi modo aliquali, prout nostram gratiain gravissime offendere formidatis. Praesentes etiam sigilli nostri secreti appensione communitas post earum lecturam reddi volumus praesentanti. Datum in nostra civitate Broda Hungaricali, feria sexta proxima ante festum beatorum Tiburcii et Valeriani martyrum, anno domini M^o CCCCXX primo, regnorum nostrorum anno Hungariae et cetera XXX quinto, Romanorum undecimo et Bohemiae primo.

Auf der Rückseite von einer Hand des 15. Jahrhunderts: Ut nullus iudex spiritualis habeat iudicare laicalia testamenta.


1) Bis hierher verlängerte Schrift.^{^}
2) Vorlage: hisdem.^{^}