Urkunde Nr. 1851 aus Band IV

Seite im UB:

83-84

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. II (Inventar 25 ), Nr. 30.

Druckvorlage:

nach Original

Abdruck als:

Volltext

Sprache:

Latein

---

1851

Waitzen 1419 Mai 8 König Sigmund verbietet Nikolaus, dem Woiwoden von Siebenbürgen, und den Kastellanen von Talmesch und Lauterburg, von den Sachsen der Sieben Stühle Zölle einzuheben.

Von der Kanzlei: Commissio propria domini regis.

Sigismundus dei gratia rex semper augustus ac Hungariae, Dalmaciae, Croaciae, Ramiae, Seruiae, Galliciae, Lodomeriae, Comaniae Bulgariaeque rex, marchio Brandemburgensis nec non Bohemiae et Lucemburgensis heres omnibus Christi fidelibus praesentibus quam futuris praesentium notitiam habituris salutem in salutis largitore. Convenit regalem excellentiam commodis et profectibus sibi subiectorum intendere et cura diligenti invigilare, eorum praecipue per quorum industriam regna sua ditari conspicit et rerum copia uberius habundare. Proinde ad universorum tam praesentium quam futurorum notitiam harum serie volumus pervenire, quod providi viri Andreas iudex regius et Nicolaus Kosa dictus iuratus civis civitatis Cybiniensis item Heidricus de Alchna iudex regius ac Georgius iuratus de Seguswaar nec non Petrus Buzar proconsul de Mulumbacch suis ac universorum concivium suorum nec non totius communitatis Saxonum septem sedium partium nostrarum Transiluanarum nominibus et in personis nostrae maiestatis venientes in conspectum nobis querulosis vocibus declarare curarunt, quod licet ipsi et eorum progenitores ac etiam posteri universi per divos reges Hungariae nostros praedecessores felicium recordationum a solutione tributi de eorum rebus mercimonialibus ac aliis quibuscumque intra ambitum regni nostri perpetuo libertati fuerint et exempti existant. Tamen tributarii castrorum Tholmaach et Lotherwaar vocatorum in tributo ad eadem castra pertinente penes quandam turrem in medio dictorum castrorum fundata exigi et recipi consueto de omnibus eorum rebus ac bonis tam mercimonialibus quam aliis quibuscumque tributum exigerent et extorquerent in- [S. 84] cessanter eorum privilegiatas libertates per annotatos divos reges Hungariae eis concessas non advertendo immo contempnendo. Et quia nihil esset libertates a principibus largiri si eis quibus compelunt non suffragarentur, nolentes igitur prout nec de iure velle debemus voluntatibus salubribus nostrorum praedecessorum regum videlicet Hungariae contraire nec eas absque causa valde legitima infringere et immitare vobis magnifico viro Nicolao de Chaak vaivodae nostro Transsiluanensi et comiti de Zolnuk vestroque vicevaivode ac castellanis castrorum Tholmaach et Lotheruaar praedictorum tribulariisque ibidem constitutis et constituendis firmiter praecipimus et mandamus omnino¹⁾ volentes, quatenus ab eisdem Saxonibus universis cuiuscumque conditionis existant ipsorumque rebus tam mercimonialibus quam aliis in praeiudicium ipsorum libertatis nullum tributum nullamque tributariam exactionem petere, recipere, exigere et extorquere petique, recipi et extorqueri facere praesumatis nec sitis ausi modo aliquali. Et hoc idem iniungimus futuris vaivodis vicevaivodis, castellanis et tributariis partium castrorum et tributi praedictorum perpetuis futuris temporibus firmiter observare dantes eis firmissimis similibus sub praeceptis. Ut igitur praesens nostrum mandatum et praeceptum firmum semper maneat et illaesum praesentes eisdem Saxonibus concessimus literas nostras privilegiales pendentis et authentici nostri sigilli munimine roboratas. Datum Vaciae in festo apparitionis beati Mychaeli archangeli, anno millesimo quadringentesimo decimo nono, regnorum nostrorum anno Hungariae et cetera tricesimo tertio, Romanorum vero nono.

Von der Kanzlei: Commissio propria domini regis.

Auf der Rückseite von einer Hand aus dem Ende des 15. Jahrhunderts: In cas[tris]²⁾ Tholmasch, Lothorwar et Rubeaturris non tenent tributum.


1) Vorlage: omnino mit Kürzungsstrich.^{^}
2) Rasur.^{^}