Urkunde Nr. 3350 aus Band VI

Seite im UB:

165-166 ^a)

Heute in:

Kronstadt, Archiv der Honterusgemeinde

Heutige Signatur:

I E (Burzenländer Kapitel, Urkunden), Nr. 144 (Liber promptuarii capituli Braschowiensis), fol. 190 verso - 191 recto.

Druckvorlage:

nach Einschaltung (Insert)

Abdruck als:

Volltext

Sprache:

Latein

---

3350

Kronstadt 1464 Februar 24 Johannes Rewdel, Stadtpfarrer von Kronstadt, bezeugt die Stiftung einer Mühle für eine Messe in der Laurentiuskapelle durch Katharina Klomp, Witwe des Thomas Roth. [S. 166]

Johannes Rwedel¹⁾ de Corona facultatis artium magister, baccalaureus in decretis ac plebanus ecclesiae parochialis beatae Mariae virginis de eadem, universis et singulis praesentium notitiam habituris honorem debitum cum caritatis affectu. Transiturus de mundo ad patrem salvator dominus noster Jhesus Christus cum tempus suae passionis instaret sumta coena in memoriam mortis suae instituit summum et magnificum sui corporis et sanguinis sacramentum, ut praecipuum memoriale sui amoris eximii, quo nos dilexit et ut esset nobis praecelsum et venerabile sacramentum mirabile ac stupendum delectabile et suave carissimum ac super omnia pretiosum in quo vitae suffragia consequimur et salutis ac etiam in cottidianis missarum solemniis debita veneratione ac festum celebratione sedule frequentamus. Hinc est quod honesta domina Katherina filia quondam Laurencii Klomp pio devotionis zelo ad tam magnificum et omni veneratione dignum sacramentum accensa et salubri monita conscientia eternae salutis ob respectum animae suae parentumque suorum et mariti sui defuncti Thomae Rod dicti refrigerium testamentum perpetuum et salutare suorum peccatorum remedium desiderans et affectans inchoare fineque debito concludere et terminare sub mentis et corporis sanitate omnium suorum amicorum et fautorum matura superinde praehabita deliberatione missam perpetuam celebrandam de reditibus suarum haereditatum videlicet unius molendini situati extra civitatem Brassouiensem in fluvio vulgariter Gespreng cum omnibus suis pertinentiis iuribus et libertatibus constituit et dotavit michique praefato magistro Johanni Rwedel¹⁾ et successoribus meis legitimis coram capitulo Brassouiensi ac iudice et iuratis senioribus civitatis Brassouiensis praefatae testibus coram idoneis in perpetuum visum tradidit, dedit et stipulata manu assignavit in hunc finem, ut singulis diebus perpetuis temporibus duraturis una missa celebretur leganda in capella beati Laurentii martiris in cimiterio ecclesiae parochialis beatae Mariae virginis situata pro ipsius Katherinae praefatae ac mariti sui et omnium amicorum et cognatorum salute et refrigerio singulari per capellanum ad hoc per me deputandi et servandi iuxta universalis ecclesiae consuetudinem observatam. Ad quae facienda ego praefatus magister Johannes me et successores meos vigore praesentium literarum obligo et astringo et in casu quod absit si successores mei missam sic perpetuatam more solito legi facere recurarent, extunc decanus Brassouiensis pro tempore constitutus cum suis confratribus capituli, iudex et iurati consules civitatis saepetactae tamquam patroni et superintendentes faciendi et disponendi cum molendino praedicto secundum quod eis visum et consultum fuerit pro consimili usu pietatis cuidam honesto et probo sacerdoti concedendi et dispensandi liberam habeant facultatem. Quosquidem decanum, dominos de capitulo, iudicem et iuratos cives ipsa antedicta domina Katherina cum suis amicis et cognatis pro iuris patronatus assumtione et superintendentia speciali petit, amonet et requirit, praesentibus etiam reverendo viro Ieronimo Rewchin, artium liberalium magistro scolastico, industri viro Petro Rewel, similiter artium liberalium baccalaureo et circumspecto viro Petro Rewchyn concivibus civitatis Brassouiensis praenarratae. In cuius rei testimonium evidens robur firmitatemque perpetuam praesentes literas sigillo meo maiori appenso duxi consignare. Datum in civitate Brasschouiensi feria sexta proxima ante festum beati Mathiae apostoli, anno domini millesimo CCCC^o sexagesimo quarto. [S. 167]


a) Seitenumbruch nach Kopfregest.^{^}

1) e über w. [2x]^{^}