Urkunde Nr. 36 aus Band I

Seite im UB:

24-25

Heute in:

Vatikanstadt, Vatikanisches Archiv [Archivum Secretum Apostolicum Vaticanum, Archivio Segreto Vaticano]

Heutige Signatur:

Reg. Vat. (Registra Vaticana) Nr. 12, fol. 130 recto et verso, Eintrag Nr. 137.

Druckvorlage:

nach (zeitgenössischem) Registereintrag

Abdruck als:

Volltext

Sprache:

Latein

---

36

Rom im Lateran [1223] Dezember 12 Papst Honorius III. verbietet dem siebenbürgischen Bischof, das Burzenland unter seine Gerichtsbarkeit einzubeziehen.

[S. 25] Honorius episcopus . . . . . venerabili fratri . .¹⁾ episcopo Ultrasilvano salutem. . . . . Quod dilecti filii . . magister et fratres domus sanctae Mariae Theotonicorum terram Boze et ultra montes nivium propter paganorum insultus vastam usque ad proxima tempora et desertam noviter inhabitare ceperunt, ipsorum paganorum impetu non sine multo discrimine refrenato, eis ad meritum, nobis ad gaudium et toti populo Christiano provenit ad profectum, propter quod ipsi fratres et inhabitatores terrae predictae non sunt lacessendi iniuriis, sed beneficiis confovendi, quatenus numerus fidelium terram ipsam inhabitantium ad paganorum terrorem et Christianitatis subsidium feliciter augeatur. Cum autem terra ipsa secundum indulgentias dictis fratribus ab apostolica sede concessas, nullum praeter Romanum pontificem episcopum habeat vel praelatum, tu, sicut eorum nobis conquestio patefecit, in ea tibi iurisdictionem indebitam usurpare contendens, presbyteros et clericos ipsius terrae ad synodum tuam vocas, et tam ab eis quam a laicis decimas et alia episcopalia iura niteris extorquere, in eos, si tuae non satisfaciunt voluntati, interdicti et excommunicationis sententias de facto, cum de iure nequeas, proferendo. Nolentes igitur aliquatenus sustinere, quod iidem fratres indebite, praesertim contra nostras indulgentias molestentur, fraternitati tuae per apostolica scripta firmiter praecipiendo mandamus, quatenus si quas forte de facto in clericos vel alios habitatores ipsius terrae sententias protulisti, eas de facto quoque non differens revocare, ab eorum gravamine taliter conquiescas, quod nec ipsi iustam habeant materiam conquerendi, nec nos tibi durius scribere compellamur. Qui cum domum eorundem fratrum sic rore nostrae gratiae rigaverimus, ut eam de humili statu ad altum tempore nostro provectam plantationem nostram non incongrue appellare possimus, illam ea praerogativa diligimus caritatis, quod eius indigna gravamina non possemus in patientia tolerare. Noveris autem, nos venerabili fratri nostro . .²⁾ Strigoniensi archiepiscopo mandavisse, ut nisi iuxta mandatum nostrum curaveris revocare sententias, si quas in saepe dictos incolas protulisti, ipse illas, tamquam a non suo iudice promulgatas, denunciet nullas esse. Datum Laterani, II. Idus Decembris, anno octavo.


1) Raynaldus.^{^}
2) Thomas.^{^}