Urkunde Nr. 3062 aus Band V

Seite im UB:

558-560

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. II (Inventar 25), Nr. 176.

Druckvorlage:

nach Einschaltung (Insert)

Abdruck als:

Volltext

Sprache:

Latein

---

3062

Hermannstadt 1457 Februar 9 Der Rat von Hermannstadt meldet gegen die Entscheidung des Weissenburger Generalvikars Matthäus, Pfarrers von Urwegen, in dem Streit der Hermannstädter mit ihrem Pfarrer Antonius, das Messelesen betreffend, Berufung an.

Cum appellationis remedium in sacris canonibus in relevamen oppressorum ac verisimiliter indebite opprimi et gravari tementium sit adinventum, hinc est, quod nos Oswaldus magister civium ac iudices et iurati consules necnon tota communitas civitatis huius Cybiniensis tenore praesentium significamus, dicimus, proponimus et notificamus universis et signanter coram vobis Vrbano papali ac imperiali auctoritatibus publico notario tamquam autentica et approbata [S. 559] persona et testibus hic praesentibus. Noveritis nos veridica relatione percepisse. quomodo quaedam literae in causa quarundam missarum et presbiterorum easdem missas in praedicta parochiali nostra ecclesia beatae Mariae virginis ipsius civitatis Cybiniensis celebratarum peractarum et cotidie perpetuis futuris temporibus peragendarum per egregium virum dominum Anthonium decretorum plebanum nostrum Cibiniensem hiis proximis elapsis diebus ab egregio similiter decretorum doctore Mathaeo, custode et canonico ac vicario in ecclesia Transsilvana in spiritualibus generali et plebano de Zasorbo, commissario seu delegato non nostro iudice neque in eius iudicium cum publica protestatione nostrorum procuratorum sibi in faciem propter certas infrascriptas causas conscientes tam contra nos quam alios quospiam ipsum negotium ut praesumitur tangentes essent extractae prout aliae literae praeceptoriae contra nos et nostros capellanos per ipsum dominum Anthonium doctorem et plebanum nobis transmissos resignatos in curam nostram pridie sunt extractae. In quibus videlicet literis idem dominus Mathaeus doctor, custos, canonicus et vicarius non adhuc noster iudex sententiavit et alia quae in eisdem continentur fecit, nobis universis supradictis in gravamen, dispendium et iniuriam divinique cultus nostrae praefatae ecclesiae in negligentiam manifestam, ratione quarum literarum nobis et illis quorum interest gravamen timemus evenire. Et quia sapientum est huiusmodi futuris gravaminibus et suspectis iudicibus qui tales literas sine auditione, cognitione, determinatione et diffinitione causarum sibi comissarum parti adversae in favorem nobis vero et nostris in gravamen contra iuris ordinem solent dare et conferre, citissime obviare viam eorundem quam se sperant habere praecludent, quia error cui non resistitur maxime in principio approbare videatur. Unde a talismodi quibuscumque literis contra nos aut contra nostros taliter qualiter emanatis seu emanandis extractis seu extrahendis oculte aut manifeste, directe vel indirecte a quibuscumque iudicibus ecclesiasticis vel saecularibus indifferenter sencientes nos fore gravatos et in posterum plus hiis fortius gravari et divini cultus ad honorem dei et salutis animarum turbationem, dissipationem et diminutionem ex huiusmodi literis deveniri posse. Quare ut praefertur nos ab huiusmodi literis processibus et a praefato suspecto iudice videlicet domino Mathaeo doctore, vicario ecclesiae Transsilvanensis, et a futuro gravamine ad reverendissimum in Christo patrem et dominum dominum Dyonisium cardinalem archiepiscopum Strigoniensem et cetera in regno Hungariae legatum nedum ad ipsum tamquam metropolitanum sed etiam ad ipsum tamquam principalem nostrum tutorem et iudicem specialem ac eius consilio et auctoritate ad serenissimum principem dominum Ladizlaum Hungariae, Bohemiae et cetera regem, dominum nostrum naturalem metuendissimum et ad universos ipsius regni Hungariae praelatos, barones et regnicolas de quorum universorum protectione, defensione et tutione plenarie confisi a quibus talismodi donationes missarum nobis devenerunt et e largitione benignissima processerunt ipsamque causam cum tota sua serie provocamus, appellamus immo appellamus et procvoamus et iterum appellamus et provocamus apostolosque debita cum instantia primo, secundo, tertio instanter, instantius et instantissime petimus si quis sit qui eosdem nobis dare vuit et possit, saltem a vobis domino notario publico unum vel plura instrumentum seu instrumenta confici et nobis concedere et dare supplicamus. Protestantes denique nos a praesenti nostra appellatione non recedere sed eam in termino triginta dierum a data praesentium prosequendum inhibentes omnibus et singulis iudicibus delegatis, subdelegatis executoribus seu subexecutoribus et signanter vobis domino Mathaeo doctori, custodi, canonico, plebano et vicario supradicto sub poena quae a iure infertur huiusmodi appellationi pendentes contra vos universos coniunctim vel divisim nihil attemptare praesumatis nec modo aliquali debeatis quicquam innovare protestantes etiam de fatigiis laboribus expensis et interesse protestantes etiam praesentem nostram [S. 560] appellationem emendare, corrigere, mutare, addere et minuere ut iuris beneficia exposcunt et ordo dictaverit rationis. Datum Cybinii in die beatae Appoloniae virginis et martiris, anno domini millesimo quadringentesimo quinquagesimo septimo.