Urkunde Nr. 2821 aus Band V

Seite im UB:

378-379

Heute in:

Kronstadt, Staatsarchiv [Direcţia Judeţeană Braşov a Arhivele Naţionale ale Romȃniei]

Heutige Signatur:

Fond 1: Stadt Kronstadt [Primaria Municipiului Braşov], Privilegiensammlung (Colecţia privilegii) Nr. 124.

Druckvorlage:

nach Original

Abdruck als:

Volltext

Sprache:

Latein

---

2821

Pressburg 1453 Februar 6 König Ladislaus bestätigt für die Kaufleute von Stadt und Distrikt Kronstadt die Urkunde König Sigismunds von 1419 Nr. »1858 enthaltend die Urkunde des Woiwoden Stibor von 1412 Nr. »1696 über die Handelsvereinbarung zwischen dem Kronstädter Distrikt und den Sieben Stühlen.

Von der Kanzlei: Commissio propria domini regis.

Nos Ladislaus dei gratia rex Hungariae, Bohemiae, Dalmatiae, Croatiae Ramae, Serviae, Galiciae, Lodomeriae, Comaniae Bulgariaeque ac Austriae et Stiriae dux, necnon marchio Moraviae et cetera memoriae commendamus tenore praesentium significantes quibus expedit universis, quod venientes nostrae serenitatis in conspectum fideles nostri providi viri Vicentius Zagariae, iudex, ac Petrus filius Anthonii cives civitatis nostrae Brassouiensis, necnon Matthaeus, iudex de Rosnouia suis ac universorum iudicum, seniorum, civium, hospitum, populorum et incolarum habitatorum et totius communitatis mercatorum dictae nostrae civitatis et totius districtus Brassouiensis terraeque Barczensis nominibus et in personis exhibuerunt nobis quasdam literas privilegiales quondam principis gloriosissimi laudandae memoriae domini Sigismundi tunc Romanorum et Hungariae regis postea vero imperatoris Romanorum avi nostri carissimi suo maiori duplici sigillo, quo uti rex Hungariae utebatur, communitas tenores quarundam literarum olim magnifici Stiborii vaivodae Transsiluaniae super quibusdam ordinatione, dispositione et concordia venditionis et emptionis pannorum ulnatim et staminum integrorum, telae et barchani item vinorum urnatim ac mellis, cerae et aliarum rerum ponderari ac mensurari solitarum inter praefatos Brassouienses ab una, parte vero ab altera magistrum civium, seniores, comites, iudices, iuratos et totam communitatem ac mercatores civitatis Cibiniensis et septem sedium Saxonicalium partium nostrarum Transsiluanarum factas confectarum et emanatarum rati- [S. 379] ficative in se continentes tenoris infrascripti, supplicantes annotati Vincentius iudex ac Petrus filius Antonii necnon Matthaeus suis et aliorum quorum supra nominibus nostrae maiestati ut praetactas literas annotati quondam domini Sigismundi imperatoris privilegiales, ratas, gratas et acceptas habendo, nostrisque literis sub praesenti secreto sigillo nostro, quo uti rex Hungariae utimur, emanandis, verbotenus inseri facientes pro eisdem iudicibus, senioribus, civibus, hospitibus, populis et incolis, habitatoribus et tota communitate mercatorum civitatis et districtus Brassouiensis ac terrae Barczensis ipsorumque successoribus universis, innovantes perpetuo valituras confirmare dignaremur, quarum quidem literarum tenor talis est: (Folgt die Urkunde König Sigmunds von 1419 Nr. »1858 mit der Urkunde des siebenbürgischen Woiwoden Stibor von 1412 Nr. »1696.) Nos itaque humillimis et devotis supplicationibus annotatorum Vincentii iudicis ac Petri filii Antonii civis civitatis nostrae Brassouiensis necnon Matthaei iudicis de Rosnouia per eos suo ac universorum iudicum, seniorum, civium, hospitum, populorum et incolarum habitatorum et totius communitatis mercatorum eiusdem nostrae civitatis et districtus Brassouiensis praescriptarum nominibus et in personis nostrae modo praemisso porrectis maiestati regia benignitate exauditis et clementer admissis, praetactas literas antefati quondam domini Sigismundi imperatoris et regis privilegiales non abrasas, non cancellatas nec in aliqua sui parte suspectas imo merae et sincerae veritatis integritate praepollentes praesentibusque de verbo ad verbum insertas quoad omnes earum continentias, clausulas et articulos acceptamus, approbamus et ratificamus easque nihilominus consideratis fidelitatibus et fidelium servitiorum meritis praefatorum iudicum, seniorum, civium, hospitum, populorum et incolarum dictae nostrae civitatis et districtus Brassouiensis ac terrae Barczensis, quae ipsi uti didicimus in confinibus inimicorum positi, tamquam clipeus huius regni sacrae nostrae coronae cum summa instantia personis et rebus suis saepius fortunae casibus submissis exhibuerunt ex certa nostra scientia et animo deliberato de praelatorumque et baronum nostrorum consilio praematuro pro eisdem iudicibus, senioribus, civibus, hospitibus, populis et incolis dictae nostrae civitatis et districtus Brassouiensis ac terrae Barczensis innovantes perpetuo valituras confirmamus. In cuius rei memoriam firmitatemque perpetuam praesentes concessimus literas nostras pendentis praescripti secreti sigilii, quo, ut praefertur, tamquam rex Hungariae utimur munimine roboratas. Datum Posonii in festo beatae Dorotheae virginis et martyris, anno domini millesimo quadringentesimo tertio, regni autem nostri anno tredecimo.

Von der Kanzlei: Commissio propria domini regis, ex deliberatione consiliariorum, Johannes episcopus Varadiensis cancellarius.

Auf der Rückseite Kanzleivermerk: Regestrata J. M.