Urkunde Nr. 1535 aus Band III

Seite im UB:

359-360

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Druckvorlage:

nach Original

Abdruck als:

Volltext

Sprache:

Latein

---

1535

Ofen 1405 Juli 4 König Sigmund erlässt zu Gunsten der Stadt Klausenburg eine Verordnung, betreffend das Verbot gegen die Behinderung des Handelsverkehrs der Klausenburger, beziehungsweise gegen die Ausübung fremder Gerichtsbarkeit über sie und gegen die Pfändung ihrer Sachen und Waren.

Sigismundus dei gratia rex Hungariae, Dalmaciae, Croaciae et cetera marchioque Brandemburgensis et cetera, sacri Romani imperii vicarius generalis et regni Bohemiae gubernator fidelibus suis universis praelatis, baronibus, comitibus, castellanis, nobilibus ipsorumque officialibus signanter vero tricesimatoribus et tributariis tam nostris quam aliorum quorumcumque seu vices ipsorum gerentibus item civitatibus et liberis villis ipsarumque rectoribus iudicibus et villicis praesentium notitiam habituris salutem et gratiam. Gravem querelam pro parte fidelium universorum civium et hospitum nostrorum de Koloswar partium nostrarum Transsiluanarum nobis porrectam recepimus continentem, quod dum ipsi pro acquirendis victuum suorum necessariis diversa regni nostri loca cum rebus et bonis ipsorum mercimonialibus perlustrarent, tunc nonnulli forent ex vobis, qui ipsos ad plurimorum instantiam in personis iudicarent seu iudicari facerent resque et bona ipsorum arestarent seu prohiberi facerent signanter pro debitis, delictis, offensis et excessibus aliorum in ipsorum praeiudicium non modicum atque damnum. Et quia iuri consonum apparet utique et ratio exigit aequitatis, ne quis pro alterius reatu seu excessibus puniri debeat aut incommoda sustinere, et in his nostram decet celsitudinem ex suscepti regii regiminis officio providere, ne insontes criminis et culpae innoxii, signanter vero mercatores, quorum industria seu providentia regna nostra necessariorum abun- [S. 360] dantia replentur et ditantur, sic indebite opprimantur in rebusque et bonis ipsorum modo quolibet damnificentur sed potius alicuius gratiae praerogativa subleventur, vestrae igitur et cuiuslibet vestrum fidelitati firmo praecipimus regio sub edicto et omnino volentes mandamus, quatenus praefatos fideles nostros cives et hospites de Koloswar praedicta cum universis rebus et bonis ipsorum mercimonialibus signanter vero equis, bobus et aliis animalibus venalibus hinc inde proficiscentes receptis et habitis ab eisdem iustis tricesimis et tributis legitimis pacifice et absque impedimento de eisdem tricesimarum et tributorum vestrorum locis abire permittendo in vestris tenutis, dominiis, honoribus possessionibus ac vestri in medio in personis ad quorumcumque instantiam iudicare seu vestro astare iudicatui compellere resque et bona ipsorum arestare aut prohiberi facere nullatenus praesumatis nec sitis ausi modo aliquali. Alioquin huiusmodi mandati nostri transgressores per palatinum regni nostri aut vaivodas dictarum partium Transsiluanarum vel ipsorum vicevaivodas seu comites vel vicecomites et iudices nobilium illius comitatus, ubi praemissa nostra mandata quod absit non observarentur, ad ipsius nostri mandati observantiam non sine maximis ipsorum gravaminibus compelli volumus auctoritate nostra regia artius et astringi. Secus igitur in praemissis facere non ausuri. Si qui enim ex vobis quidquam actionis vel quaestionis contra praenotatos cives seu hospites nostros de Koloswar praefata seu alterum ipsorum habent vel habuerint, id in praesentia iudicis et iuratorum civium civitatis eiusdem¹⁾ legitime super eosdem exequantur meri iuris et iustitiae complementum debitum recepturi. Praesentes etiam post earum lecturam semper reddi iubemus et restitui praesentanti. Datum Budae, Sabbato proximo post festum visitationis beatae Mariae virginis, anno domini millesimo quadringentesimo quinto.


1) Hierauf durchgestrichen: praesentia.^{^}