Urkunde Nr. 1534 aus Band III

Seite im UB:

357-359

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Druckvorlage:

nach Original

Abdruck als:

Volltext

Sprache:

Latein

---

1534

1405 Juli 2 König Sigmund schenkt der Stadt Klausenburg sechs auf Klausenburger Hattertgebiet befindliche Mühlen.

Von der Kanzlei: Relatio Marci de Nurembergh tricesimarum et urburarum comitis.

Sigismundus dei gratia Hungariae, Dalmaciae, Croaciae, Ramae, [S. 358] Seruiae, Galliciae, Lodomeriae, Comaniae Bulgariaeque rex, marchio Brandemburgensis ac sacri Romani imperii archicamararius necnon Bohemiae et Lucemburgensis heres omnibus Christi fidelibus tam praesentibus quam futuris praesentium notitiam habituris salutem in salutis largitore. Quamvis regalis munificentia erga universos suae coronae fideles de innata sibi clementia de generalitate meritorum liberalis existat, ad illos tamen uberius suae debet liberalitatis dona extendere, quos pro ipsius coronae honoribus fama celebri ferventioribus studiis comperit per operum experientiam insudasse. Proinde ad universorum praesentium videlicet et futurorum notitiam harum serie volumus pervenire, quod fideles nostri Jakobus Polkischer artium liberalium magister iuratus et Nicolaus dictus Mwn cives de Koloswar partium nostrarum Transsiluanarum suis necnon universorum civium hospitum et totius universitatis civitatis eiusdem nominibus et in personis nostrae claritatis adeuntes conspectum nobis curarunt declarare, quomodo per¹⁾ iudices seu comites per vaivodas nostros Transsiluanos inter eos constitutos²⁾ molendina tam frugum quam renovatorum seu textorum et cerdonum in territorio ipsius civitatis nostrae habita, in fluvio Zamus vocato currentia, ad castrum Letawar nuncupatum pertinentia aliquando per defectum molarium et interdum in alia eorum opportuna et necessaria structura negligenter hactenus exstitissent conservata et conservarentur de praesenti, et dum iidem cives et alii illarum partium homines ad alia molendina propter istorum defectum cum eorum frugibus pergerent, tunc per eosdem iudices seu comites bobus, equis, curribus et ipsorum curruum oneribus privarentur, spoliarentur, verberarentur et alias multipliciter exinde impedirentur, damnificarentur et gravarentur, supplicantes circa praemissa regaliter et opportune eorum statui providere. Nos itaque habito respectu ad fidei constantiam et utilia sincerae fidelitatis obsequia, quae divis regibus nostris videlicet praedecessoribus atque nobis praesertim iam proxime praeteritis disturbiorum temporibus iidem cives et hospites exhibuisse perhibentur et quae etiam nobis et sacro nostro diademati eo amplius poterunt et tenebuntur exhibere, quo se ampliora beneficia cognoverint a nostro culmine recepisse, praecipue vero ut eadem civitas per hoc muniri possit et decentius fortificari, tria molendina frugum et duo molendina renovatorum seu textorum eisdem molendinis frugum adiacentia necnon unum molendinum cerdonum in fluvio Zamus vocato currentia, intra metas et territorium ipsius civitatis existentia et ad idem castrum Letawar nuncupatum spectantia simul cum omnibus eorum metis, terminis, utilitatibus, proventibus et fructuositatibus quibuscumque a dicto castro auferentes, segregantes, abstrahentes et sequestrantes saepe fatae nostrae civitati Koloswar vocatae ipsiusque communitati seu universitati de gratia speciali, ex certa scientia, animo deliberato et de regiae maiestatis plenitudine, praelatorum etiam, baronum et regni nostri procerum ad hoc maturo accedente consilio novae nostrae donationis titulo et omni eo iure, quo ipsa molendina nostrae regiae incumbunt collationi, [S. 359] damus, donamus, conferimus, annectimus, applicamus, appropriamus et incorporamus per ipsam civitatem nostram Koloswar et inhabitantes eandem perpetuo et irrevocabiliter possidenda, tenenda pariter et habenda praesentium patrocinio rnediante, salvis duntaxat iuribus alienis. In cuius rei memoriam firmitatemque perpetuam praesentes literas nostras privilegiales pendentis et authentici sigilli nostri novi duplicis munimine roboratas eidem civitati ipsiusque civibus et communitati ac universitati duximus concedendas. Datum per manus reverendi in Christo patris domini Eberhardi eadem dei et apostolicae sedis gratia episcopi Zagrabiensis, aulae nostrae summi cancellarii fidelis nostri dilecti, anno domini millesimo quadringentesimo quinto, sexto Nonas Julii, regni autem nostri anno decimo septimo.


1) Fehlt in der Vorlage.^{^}
2) Vorlage: constituti.^{^}