Urkunde Nr. 1346 aus Band III

Seite im UB:

131-133

Heute in:

Kronstadt, Archiv der Honterusgemeinde

Heutige Signatur:

I E (Burzenländer Kapitel, Urkunden), Nr. 16.

Druckvorlage:

nach Original

Abdruck als:

Volltext

Sprache:

Latein

---

1346

1395 März 7 König Sigmund verleiht dem Stadtpfarrer von Kronstadt als Messstiftung für die Martinsberger Kapelle daselbst den alljährlich aus dem Kronstädter Martinszins zu entnehmenden Betrag von vierzig Goldgulden.

Sigismundus dei gratia Hungariae, Dalmaciae, Croaciae, Ramae, Seruiae, Galliciae, Lodomeriae, Cumaniae Bulgariaeque rex ac marchio Brandemburgensis et sacri Romani imperii archicamararius necnon Bohemiae et Lucemburgensis heres omnibus Christi fidelibus tam praesentibus quam futuris praesentium notitiam habituris salutem in largitore salutis. Quoniam qui est verae sanctae universalis ecclesiae militantis caput et rector et in ea sacerdos et sacrificium Jhesus Christus sic ipsam et illud in terris instituit, quod exinde nos, qui sumus eius utinam digna membra, possimus in caelis fieri participes gloriae triumphantis, attendentes nos igitur hoc et quod ex frequenti cultu maxime divinorum dictae ecclesiae status crescit et procedit augmentum, ut quod hic corporaliter agimus illic mente et re pertingere valeamus, quodque per eum hic reges regunt et domini dominantur, cum nos zelus semper excitet domus dei, ex speciali devotione, quam ad beatum Martinum gerimus, ad laudem et gloriam eiusdem omnipotentis dei et honorem ipsius beati Martini duximus instituendum et tenore praesentium perpetuo et irrevocabiliter ex mera liberalitate et motu proprio certaque scientia et munificentia nostris regiis instituimus ex nunc, quod in capella ad honorem et sub vocabulo eiusdem beati Martini in monte Brassouiensi seu de Corona Strigoniensis diocesis constructa loci plebanus eiusdem scilicet Brassouiensis seu de dicta Corona qui nunc est et erit pro tempore perpetuo per idoneum sacerdotem singulis secunda de sancto Martino, quarta de sancto rege Ladislao et quinta feriis de sancto Sigismundo, ac Sabbati beatae Mariae virginis et aliis diebus sese sequentibus continuo successive missas in diebus illis et secundum cursum dictorum dierum et temporum celebrandas debite celebrari facere debeat inconcusse. Pro cuius quidem sacerdotis conservatione ad hoc per dictum plebanum perpetuo et debite conservandi eidem plebano qui est et erit pro tempore ut praefertur ex nunc [S. 132] harum serie perpetuo deputamus quadraginta florenos puri auri seu ipsorum verum iustumque valorem pro tempore currentem ipsi plebano et ad manus eiusdem singulis annis de censu nostro in et ex dicto loco seu civitate nostra Brassouiensi in festo beati Martini¹⁾ annis etiam singulis nobis debito per quoscumque officiales nostros seu alios exactores census eiusdem ad hoc deputatos et deputandos in dicto termino absque dilatione, contradictione et dissimulatione quibuscumque realiter et integre assignandos et persolvendos sic tamen, quod dictae missae sic ut praemittitur celebrandae in dicta capella absque praeiudicio ipsius capellae et rectoris celebrentur eiusdem quodque plebanus praedictus singulis diebus, quibus post solutionem dicti census sibi factam missam ut praemittitur non fecerit celebrari, unum florenum auri eadem die qua id obmiserit absque procrastinatione vitrico ipsius capellae pro eiusdem tamen fabrica sub poena dupli debeat assignare et persolvere ipso facto per dictum vitricum conservandos et congregandos et postea pro dicta fabrica exponendos. Mandantes ex nunc propterea per haec scripta nostro firmo regio sub edicto praedictis officialibus et exactoribus dicti nostri census praesentibus et futuris, quatenus eidem plebano Brassouiensi seu de dicta Corona scilicet qui nunc est et erit pro tempore ut praefertur dictos quadraginta florenos auri de censu praedicto in termino praenotato absque dilatione, contradictione et dissimulatione quibuscumque ut praemittitur assignare et persolvere debeant realiter et ad plenum. In cuius rei memoriam firmitatemque perpetuam praesentes concessimus literas nostras privilegiales pendentis et authentici sigilli nostri duplicis munimine roboratas. Datum per manus reverendissimi in Christo patris domini Johannis miseratione divina Strigoniensis archiepiscopi comitisque perpetui et primatis ac apostolicae sedis legati nati et summi aulae nostrae regiae et reginalis maiestatum cancellarii fidelis nostri et dilecti, anno domini millesimo trecentesimo nonagesimo quinto, Nonis Marcii, regni autem nostri anno octavo. Venerabilibus in Christo patribus et dominis Valentino tituli sanctae Sabinae sacrosanctae Romanae ecclesiae presbytero cardinali et almae ecclesiae Quinqueecclesiensis gubernatore ac eodem domino Johanne ipsius ecclesiae Strigoniensis, Nicolao Bebek Colocensi, Petro Jadrensi, Andrea Spalatensi et altero Andrea Ragusiensi archiepiscopis, Johanne Waradyensi, Demetrio Transsiluano, Johanne Zagrabiensi, Stephano Ciko Agriensi, Johanne Jauriensi, Petro Wachyensi, Johanne Boznensi, Materno Wesprimiensi, fratre Gregorio Sirimiensi, Michaele Nitriensi, Johanne Chanadiensi, Grisogono Traguriensi, Francisco Scardonensi, Paulo Tininiensi, Johanne Nonensi, Anthonio Sibinicensi, Nicolao Corbauiensi, Leonardo decretorum doctore Segniensi ecclesiarum episcopis ecclesias dei feliciter gubernantibus. Necnon magnificis viris Leustachio de Ilswa regni nostri palatino et comite Albensi, Frankone filio quondam Konyae bani vaivoda nostro Transsiluano et comite de Zolnuk, Detriko²⁾ Bubek Sclauoniae, Nicolao de Gara praedictorum regnorum nostrorum Dalmaciae et [S. 133] Croaciae, Stephano de Korog et Nicolao Treutel Machouiensi banis, honore banatus Zeuriniensis vaeante, Nicolao filio Johannis de Canisa tavarnicorum, Stephano filio eiusdem Johannis de praedicta Canisa ianitorum, Georgio de Chythnek dapiferorum, Johanne de Peren pincernarum, domino Stephano pridem palatino agasonum nostrorum magistris, Stiburio de Stiborich comite Posoniensi aliisque quampluribus regni nostri comitatus tenentibus et honores.


1) November 11.^{^}
2) Vor diesem Wort, zu Beginn der Zeile ist ein 6.5 Centimeter breiter Raum durch fünf ~ ausgefüllt.^{^}