Urkunde Nr. 1114 aus Band II

Seite im UB:

509-510 ^a)

Heute in:

Kronstadt, Archiv der Honterusgemeinde

Heutige Signatur:

IV E (Honterusgemeinde, Urkunden), Nr. 79.

Druckvorlage:

nach Original

Abdruck als:

Volltext

Sprache:

Latein

---

1114

1379 Oktober 13 König Ludwig I. verleiht den Sachsen von Marienburg das Wochenmarktrecht.

Lodouicus dei gratia Hvngariae, Poloniae, Dalmaciae, Croaciae, Ramae, Seruiae, Galliciae, Llodomeriae, Comaniae Bulgariaeque rex, princeps Sallernitanus et honoris montis sancti Angeli dominus omnibus Christi fidelibus tam praesentibus quam futuris praesentium notitiam habituris salutem in omnium salvatore. Ad universorum notitiam volumus harum serie pervenire, quod nos qui ex suscepti regiminis nostri officio profectum et commodum nostrorum fidelium seniorum, civium et universorum populorum et Saxonum de Fewlduar ut tenemur ampliare cupientes, ut exinde multiplicentur et commodum atque profectum consequantur, ad humilem et instantem petitionem eorundem eisdem senioribus, civibus, populis et Saxonibus de dicta Fewlduar forum liberum singulis hebdomadis²⁾ feria quinta in eadem Feulduar cele- [S. 510] brandum de innata nobis pietatis dementia et gratia speciali duximus dandum et concedendum, immo damus et concedimus perpetuis temporibus libere celebrandum. Quapropter vos universos et singulos mercatores, cives et alterius status homines partium Transsiluanarum et Siculorum ac Brassouiensium harum patrocinio assecuramus et affidamus, quatenus singulis feriis quintis diebus ad dictum forum in praefata Feuldwar ex praesenti nostra annuentia celebrandum cum rebus et mercibus ac aliis vestris in agendis secure transeatis et accedatis expeditisque ibidem in emptionibus et venditionibus rerum vestrarum ac peractis omnibus vestris agendis ad propria absque omni formidine rerum et personarum vestrarum redeatis et redire valeatis. Et haec volumus in foris et locis publicis ubique palam facere promulgari. In cuius rei memoriam firmitatemque perpetuam praesentes concessimus literas nostras privilegiales pendentis et authentici sigilli nostri novi duplicis munimine roboratas. Datum per manus reverendissimi in Christo patris et domini, domini Demetrii miseratione divina tituli sanctorum quatuor coronatorum sacrosanctae Romanae ecclesiae presbyteri cardinalis, gubernatoris ecclesiae Strigoniensis locique eiusdem comitis perpetui, aulae nostrae cancellarii dilecti nobis et fidelis, anno domini millesi^mo CCC^mo. LXX^mo nono, tertio Idus Octobris, regni autem nostri anno tricesimo octavo. Reverendissimis et venerabilibus in Christo patribus et dominis eodem domino Demetrio praedictae ecclesiae Strigoniensis gubernatore, Stephano patriarcha Jerosolimitano Colocensi et Bachiensi ecclesiarum unitarum administratore sacrae paginae magistro, Petro Jadrensi, Wgulino Spalatensi et Wgone Ragusiensi archiepiscopis, Emerico Agriensi, Paulo Zagrabiensi, Gublino Transsiluanensi, Valentino Quinqueecclesiensi decretorum doctore, Ladislao Waradiensi physico nostro, fratre Gwyllermo Jauriensi, Benedicto Vesprimiensi, Thoma Chanadiensi, fratre Dominico Boznensi, Petro Wachiensi, Johanne Syrimiensi, fratre Dominico Nitriensi, Paulo Tininiensi, Demetrio Nonensi, Grisogono Traguriensi, Matheo Sibinicensi, Stephano Pharensi, Jacobo Makarensi, Thoma Corbauiensi et Michaele Scardonensi ecclesiarum episcopis ecclesias dei feliciter gubernantibus, Seniensi sede vacante. Magnificis viris Nicolao de Gara palatino regni nostri et iudice Comanorum, Ladislao vaivoda Transsiluano, comite Jacobo de Scepus iudice curiae nostrae, Nicolao de Zeech Croaciae et Dalmaciae, Petro Zudor totius regni Sclauoniae et Johanne de Machow banis, Temlino tavarnicorum, Georgio pincernarum et Stephano Zudor dictis ianitorum, Paulo de Lyzko dapiferorum et Stephano agasonum nostrorum magistris, Benedicto filio Pauli filii Heem comite Posoniensi aliisque quampluribus regni nostri comitatus tenentibus et honores.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 2 auf S. 509 (1 zu voranstehender Urkunde.^{^}

2) Vorlage: ebdomodis.^{^}