Urkunde Nr. 1071 aus Band II

Seite im UB:

461-462

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Druckvorlage:

nach Original

Abdruck als:

Volltext

Sprache:

Latein

---

1071

Bistritz 1377 Mai 18 König Ludwig I. verfügt, dass die mit dem Stadtsiegel von Klausenburg versehenen und in eigener Angelegenheit der Klausenburger ausgestellten Literae procuratoriae von allen Gerichtsbehörden anerkannt werden sollen.

[S. 462] Nos Lodouicus dei gratia rex Hungariae, Poloniae, Dalmaciae et cetera memoriae commendantes significamus tenore praesentium quibus expedit universis, quod Nicolaus filius Thomae dicti Zekul iudex et Ladislaus filius Laurencii fideles cives civitatis nostrae de Clusuar suis ac fidelium civium et hospitum nostrorum de eodem Clusuar vice et nominibus in nostrae maiestatis venientes praesentiam humili eorum supplicatione nostrae patefecerunt serenitati, quod ipsi propter hoc, quia literae ipsorum procuratoriae sub sigillo communitatis eorum super causis ipsorum propriis emanatae et confectae per iudices et iustitiarios regni nostri hactenus acceptatae non fuissent, damnum, labores, molestias et fatigas passi fuissent valde multas, supplicantes nostro culmini regio prece subiectiva, ut super hoc eisdem de remedio dignaremur providere opportuno. Nos igitur attendentes, quod regalis maiestas cum fidelium subiectorum preces admittit et suum extollit solium et ad serviendum devotos animat incessanter, humillimis eorundem fidelium nostrorum Nicolai iudicis et Ladislai filii Laurencii supplicationibus suis ac eorundem fidelium civium et hospitum nostrorum de dicta Clusuar vice et nominibus nostrae porrectis maiestati benigne exauditis volentes ipsis regio occurrere cum favore ex speciali nostra gratia annuimus, dedimus et concessimus eisdem, ut iidem cives et hospites nostri de dicta Clusuar a modo et deinceps sub sigillo communitatis eorum in quo imago trium turrium sculpta fore perhibetur, in quibuslibet factis et causis eorum propriis duntaxat in litibus et in iudiciis exercendis coram quovis iudice et iustitiario regni nostri ecclesiastico sive saeculari movendis et emergendis literas procuratorias iuxta regni nostri consuetudinem ad instar aliarum civitatum nostrarum regalium emanari facere valeant atque possint. Quibus quidem literis procuratoriis in toto regno nostro plenam fidem adhiberi volumus et committimus harum nostrarum testimonio literarum mediante. Datum in Beztricia Transsiluana, secundo die festi Penthecostes, anno domini millesimo CCC^mo LXX^mo septimo.