Urkunde Nr. 969 aus Band II

Seite im UB:

368

Heute in:

Vatikanstadt, Vatikanisches Archiv [Archivum Secretum Apostolicum Vaticanum, Archivio Segreto Vaticano]

Druckvorlage:

nach (zeitgenössischem) Registereintrag

Abdruck als:

Volltext

Sprache:

Latein

---

969

Villeneuve [1371] September 16 Papst Gregor XI. ersucht den König Ludwig I., dem Milkower Bischof Nikolaus zur Erlangung der zu seinem Bistum gehörigen Einkünfte und Rechte behülflich zu sein.

Gregorius episcopus et cetera carissimo in Christo filio Ludovico regi Ungariae illustri salutem et cetera. Dum fidei puritatem, virtutis constantiam, strenuorum magnificentiam operum et ingentia merita, quibus inter alios principes catholicos quodam insigni titulo specialiter clarere dignosceris, dum etiam eximiae devotionis sinceritatem, quam ad nos et sedem apostolicam ac praelatos et alias personas ecclesiasticas te habere cognoscimus, diligenti meditatione pensamus, grandi profecto gaudio in domino exsultamus in tuis laudibus delectabiliter iocundantes, ac speramus indubie, quod preces nostras tibi directas prosecutione laudabili adimplebis. Cum itaque nuper Milkoviensi ecclesiae tunc vacanti de persona venerabilis fratris nostri Nicolai episcopi Milkoviensis, qui de partibus illis oriundus existit et honorem tuum et tuorum semper dilexit et diligit, auctoritate apostolica duximus providendum ac eidem episcopo, qui ad dictam ecclesiam cum gratia nostrae benedictionis accedere proponit in brevi, in recuperandis bonis et iuribus dictae suae ecclesiae, quae per nonnullos praelatos et alios indebite detinentur, favor regius sit plurimum opportunus, excellentiam tuam nobis caram rogamus et hortamur attente, quatenus praefatum episcopum pro nostra et apostolicae sedis reverentia in recuperandis huiusmodi iuribus atque bonis et alias habeas favorabiliter commendatum ita, quod dictus episcopus magnificentiae tuae fultus praesidio iura et bona praedicta recuperare et eandem ecclesiam suam feliciter gubernare valeat nosque magnificentiam ipsam dignis in domino laudibus attollamus. Datum apud villam Novam Avinionensis diocesis, XVI. Kalendas Octobris, anno primo.