Urkunde Nr. 78 aus Band I

Seite im UB:

70

Heute in:

Vatikanstadt, Vatikanisches Archiv [Archivum Secretum Apostolicum Vaticanum, Archivio Segreto Vaticano]

Heutige Signatur:

Arm. (Armadi) I, Capsa X No. 5.

Druckvorlage:

nach Original

Abdruck als:

Volltext

Sprache:

Latein

---

78

Agram 1241 Mai 18 König Bela IV. benachrichtigt Papst Gregor IX. über den Tartareneinfall.

Sanctissimo in Christo patri Gregorio dei gratia sacrosanctae Romanae ecclesiae summo pontifici Bela eadera gratia rex Hungariae tam debitam quam devotam in omnibus reverentiam. Ex eo quod fides catholica in partibus Hungariae inspiratione divina pullulavit, progenitores nostri cum universis suae iurisdictioni subiectis et nos postquam regni gubernacula suscepimus, quam sincera devotione Romanam ecclesiam utpote matrem et magistram in omni reverentia habuerimus, vestrae sanctitati luce clarius innotescit. Unde miseros et miserabiles eventus, qui nobis et regno Hungariae per exercitum Tartarorum, bestiali crudelitate saevientem, provenerunt, paternitati vestrae fiducialiter intimamus. Nuper enim circa festum dominicae resurrectionis in Hungariam manu valida et multitudine copiosa intraverunt et non habito delectu aetatis vel sexus, universos, quos reperire poterant, in ore gladii peremerunt, ecclesias et loca divino nomini dedicata incendio, strage hominum et aliis suis foeditatibus profanarunt, omnes et maxime Christianos suo dominio subiugare gloriantes. Exsurgat igitur, rogamus et obsecramus, vestrae sanctitatis provisio in adiutorium populi Christiani et nobis ac regno Hungáriáé consilium et auxilium tribuat salutare et orbis excidium vestra diligentia dignemini praevenire, ne interveniente paululum mora lupo agnum frustratim comedente, inveniri nequeat, cui valeat subveniri. Ad haec autem et alia paternitati vestrae plenius proponenda venerabilem patrem dilectum ac fidelem nostrum Stephanum Waciensem episcopum latorem praesentium transmittimus, petentes, ut hiis, quae ex parte nostra vobis proposuerit, fidem indubitatam dignemini adhibere. Datum Zagabriae, XV. Kalendas Junii.