Urkunde Nr. 674 aus Band II

Seite im UB:

89-90

Heute in:

Karlsburg (Weissenburg), Batthyaneum [Biblioteca Naţională a României, Filiala Biblioteca documentară Batthyaneum, Alba Iulia]

Druckvorlage:

nach Original

Abdruck als:

Volltext

Sprache:

Latein

---

674

Ofen 1352 September 20 König Ludwig I. setzt die Zahlung des dem siebenbürgischen Bischof und Weissenburger Kapitel gebührenden Zehntens fest.

Lodouicus dei gratia rex Hungariae fidelibus suis universis nobilibus et aliis cuiusvis status hominibus in partibus Transsiluanis in diocesi Albensi Transsiluane episcopi constitutis et existentibus salutem et gratiam. Licet pridem in congregatione nostra Budae, ubi nostra residet curia, celebrata consuetam solutionem decimarum ad instantiam vestram et aliorum regnicolarum nostrorum immutaverimus et cum frugibus seu in specie easdem vestris diocesanis episcopis ac ecclesiis, quibus ipsae decimae debentur, solvi [S. 90] mandaverimus. Attamen quia ex hoc tam nostrae quam vestrarum animarum grave detrimentum et iacturam cognovimus imminere, propter quod etiam per dominum summum pontificem nobis existit improperanti, ideo praedictam dispositionem et ordinationem in hac parte revocamus et volumus, ut sicut temporibus progenitorum et nostris usque modo praedicta solutio decimarum fiebat vel solita erat fieri in pecunia, sic et hoc anno per vos et alios nostros regnicolas persolvatur cum hac tamen moderatione, ut ubi duodecim Wyennenses vel decem pro capetia exigebantur, non plures quam octo, et ubi pauciores vel octo exigebantur et solvebantur eo modo, prout solitum erat, exigatur et solvatur, dummodo numerus ipsorum octo Wyennensium nullatenus excedatur. Aliis autem annis solvantur ipsae decimae et exigantur sicut deliberaverimus, ut animae vestrae saluti videatur expedire. Decimae etiam agnorum, haedorum et apum more solito persolvantur. Quare fidelitati vestrae firmiter praecipiendo mandamus, quatenus decimas ipsas dicto vestro diocesano episcopo et suo capitulo vel eorum decimatoribus per ipsos ad hoc deputatis tempore consueto secundum moderationem supra dictam absque contradictione aliquali persolvatis et persolvi faciatis, aliud nullatenus facere praesumatis. Et haec volumus in foris et locis publicis in dictis partibus Transsiluanis ubique palam facere proclamari. Datum Budae, in vigilia festi beati Mathaei apostoli et evangelistae, anno domini millesimo CCC^mo. quinquagesimo secundo.