Urkunde Nr. 638 aus Band II

Seite im UB:

58-59

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Kirchenarchive A.B. [Colecţia de documente ale parohiilor ev. CA săseşti] Serie II (Inventar 228), Nr. 491 - Abt. 13: K. A. Heltau [Parohia Ev. CA Cisnadie], Nr. 2.

Druckvorlage:

nach Original

Abdruck als:

Volltext

Sprache:

Latein

---

638

Hermannstadt 1349 Juni 16 Dekan Christian und das Kapitel von Hermannstadt erkennen den von dem Schellenberger Pfarrer Goblinus beanspruchten Zehnten eines Landstriches dem Heltauer Pfarrer Stephan zu.

Nos Christianus decanus Cybiniensis plebanus de Magno horreo iudex et vicarius reverendi in Christo patris domini archiepiscopi Strigoniensis totumque capitulum Cybiniense memoriae commendantes significamus universis quibus expedit praesentium per tenorem, quod vir honorabilis dominus Stephanus plebanus de Helta ad praesentiam nostri iudicii venit et coram infra scriptis viris idoneis iudicio assidentibus confratribus nostris Johanne plebano de villa Humperti, domino Petro plebano de Hanbach, domino Johanne plebano de Alczina, domino Helwico plebano de insula Christiani suas querimonias proposuit contra dominum Goblinum plebanum de Schellenberg eo modo, quod idem dominus Goblinus ab illo tempore quod Heltam venisset pro plebano sibi de quodam territorio pertinenti in Heltam et ecclesiae suae ibidem decimas contra deum et iustitiam et contra ius commune deduxisset et recepisset, quod inquam territorium est situm inter aquam Schebs vocatam [S. 59] et alium locum qui Steynrech appellatur, ubi plures etiam metae erectae sunt circumquaque, quas decimas nominati territorii ipse dominus Stephanus probavit esse suae ecclesiae in Helta per decretalem illam, cum contingat ubi dicit, quod perceptio decimarum ad parochiales¹⁾ ecclesias de iure communi pertineat et contra ius commune nec privilegium nec praescriptio possit allegari, et de iure communi praemissae decimae pertinent ad dictam suam ecclesiam in Helta,²⁾ cum homines de Helta colunt agros ipsius territorii et longo tempore antea coluissent, et ipsi homines praediales ipsius territorii sint sui parochiani,³⁾ et cum ipse dominus Stephanus eisdem suis parochianis⁴⁾ administrat ecclesiastica sacramenta. Ideo nullus ab ipsis temporalia exigat, qui spiritualia non ministrat, et praediales decimae de iure communi debent dari illi ecclesiae, in cuius territorio praedia sunt sita et inveniuntur, verbi gratia praedia dant decimas ubi sunt homines, ubi sacra percipiunt, pecudes ubi nocte iubant et aluntur, item per iura universorum provincialium in Cybinium pertinentium probavit ipsas decimas ad ecclesiam in Heltam pertinere eo modo, quia iura ipsorum provincialium talia sunt, quod ubicumque metae inter ipsos fuerint erectae, illuc et decimae sequuntur, quo territorium ipsarum metarum erectarum dignoscitur pertinere, cum hoc ipsi provinciales pro iure communi habent et consuetudine, quod ubicumque in villis suis erigunt metas et faciunt, ibi et plebani percipiunt decimas. Cum sit ius canonicum et civile in probationibus supra tactis ipsius domini Stephani, ob id vero ipse dominus Stephanus supplicavit ac postulavit secundum dictas probationes sibi fieri iustitiae complementum, cuius domini Stephani saepe dictas probationes per omnia iustas invenimus et rite et rationabiliter productas considerantes, praemisso domino Stephano et dictae ecclesiae suae et omnibus aliis plebanis post ipsum venientibus in ipsam Heltam praemissas decimas perpetue pleno iure adiudicavimus dare et servire, contradictione qualibet non obstante. Ipsi vero domino Goblino et ecclesiae suae et omnibus aliis plebanis successoribus suis praesentium vigore perpetuum silentium imponimus decimis pro eisdem. Ad maiorem supra tactae adiudicationis nostrae memoriam plenioremque firmitatem praesentes literas cum appensione sigillorum nostrorum videlicet sigillo decanatus Cybiniensis et sigillo praemissi capituli Cybiniensis fecimus communiri. Datum et actum in Cybinio, proxima tertia feria post festum beatorum martyrum Viti et Modesti, anno incarnationis domini millesimo C^o C^o C^simo XL^simo nono.


1) Vorlage: porrochiales.^{^}
2) Vorlage: Helta [Strich über a].^{^}
3) Vorlage: porroohiani.^{^}
4) Vorlage: porrochianis.^{^}