Urkunde Nr. 5296 A * aus Band VIII

Heute in:

Klausenburg, Bibliothek der Akademie [Biblioteca Academiei Române, Filiala Cluj-Napoca]

Heutige Signatur:

Siebenbürgisches Museum [Erdélyi Múzeum Egyesület egykori levéltára] A 36.

Druckvorlage:

nach Original

Abdruck als:

Volltext

Sprache:

Latein

---

5296 A *

1492 September 21 Der Richter Benedict Theremy und die geschworenen Bürger der Stadt Klausenburg beurkunden die Stiftung ihrer Mitbürgerin Anna, Witwe des Meisters Jakob Goldschmied (Aurifaber) zur Errichtung einer Priesterpfründe am Altar St. Katharina der Stadtpfarrkirche St. Michael.

Nos Benedictus Theremy dictus iudex nec non Nicolaus Petrimatiae, Georgius Sabo senior, Michael Schorel, Joannes Bartafi, Laurentius Doleator, Thomas Peterdi, Michael Chon, Georgius Thamasi, Conradus Riseg, Petrus Belenischi, Michael de Regen, Joannes Troscher iurati cives civitatis Coloschwariensis ad universorum notitiam tam praesentium quam futurorum, harum serie volumus pervenire, quod quantum ea, quae sinceritate mentis ob dei honorem animarumque salutem in terris fundantur, plerumque rebus profanis et terrenis extolli debeant tanto magis, ne in processu temporum falsitas veritati praevalere possit, aut alias labilitate quoquomodo demoliri literarum consuevere patrocinio solidari. Hinc est, quod virtuosa domina Anna relicta vidua magistri Jacobi aurifabri concivis civitatis Coloschwariensis praedictae animadvertens, quod praesentis vitae status sit valde mutabilis et dietim magis ac magis tendat ad non esse. Idcirco devota mentis consideratione permota, quaedam terrestria ac transitoria divinitus bona sibi concessa, pro dei honore et sanctae Katherinae virginis veneratione coram providis ac circumspectis viris videlicet honorabili domino Urbano artium liberalium baccalaureo almae universitatis Viennensis cognominato Keuel pro tunc praedicatore civitatis nostrae praefate Martino Koch, Petro Czisar, Laurentio Eppel felicis memoriae Martino Aurifabro testamentaliter in aeterna et caelestia volens commutare quandam directam et aequalem partem domus cum media eius porta ab anteriori et posteriori partibus usque finem curiae in circulo huius civitatis nostrae inter domos providorum Laurentii Eppel piae recordiae ab occidentali parte et relictam Petri Czisar ab orientali plaga contigue sitam, et habitam cum suis metis debite praesignatis, que domus iure hereditario in ipsam dominam Annam post mortem dilecti sui mariti videlicet Jacobi Aurifabri devoluta exstitisset et descendisset, nec non alterum dimidium iugerum vinearum in oromontorio Trappenberg appellato, quae vineae collateraliter versus orientalem plagam vineae ipsius Paul secus viam, similiter versus occidentalem plagam vineae Joannis Jegendorff felicis memoriae existunt situatae, et unum missale impressum ligaturaque munitum et quinquaginta florenorum in auro ad altare sanctae Katherinae virginis in ecclesia beati Michaelis archangeli in hac civitate nostra fundata et nomine dicti altaris fratribus confraternitatem sanctae Katherinae tenentibus perpetuae et irrevocabiliter dedit, donavit et appropriavit ob sui mariti primum, tandem animae eius ac universorum suorum animarum remedium pariter et salutem in perpetuum ipsi altari, ut praefertur ob honorem sanctae Katherinae virginis perpetuo iure possidenda tenenda pariter et habenda contulit et resignavit. His tamen pactis et conditionibus limpide expressatis, quod ipsi fratres confraternitatis praedictae praesentes et futuri ac universi eorum successores, qui pro tempore constituti fuerint, duas missas singulis hebdomadis semper et perpetuis temporibus et futuris duraturis hebdomatim modo et forma infra specificatis per plebanum aut suum capellanum in altari sanctae Katherinae virginis in praefata sancti Michaelis ecclesia, eo quod amplius et frequentius ipsum altare a Christi fidelibus veneretur, feria tertia unam pro anima praefati magistri Jacobi mariti sui, sabbatho aliam pro anima ipsius dominae Annae legere vel celebrare faciant et teneantur et non per alium sacerdotem, ne loco praedictarum missarum aliae misse celebrentur. Si autem in dictas ferias aliquod festum solenne ceciderit, quominus ipsas missas proufc superius specificate sunt, iuxta rittum [!] sanctae ecclesiae Romanae celebrare non licet, extunc iuxta solemnitatem illius festi tamen semper cum impositione unius collectae duarum missarum supra dictarum ipsum officium ac missa celebretur, ad quae praemissa singula et quaelibet praemissorum et signanter celebrationem duarum specificatarum missarum ipsi fratres confraternitatis praetactae coram providis viris superius memoratis se obligaverunt,, qui et huius testamenti seu legationis testamentariae et executores exstiterunt, immo assumpserunt et promiserunt ad conscientias suas deo debitas, omni negligentia, dolo, fraude semotis ordine supra dicto, hebdomatim [?] praedictas duas missas celebrare faciendas perpetuis et futuris temporibus duraturis. Insuper ipsi fratres domum, vineas, et quinquaginta florenorum missale a memoratis providis viris et executoribus ad facultatem et usum eorundem plene et integre perceperunt. Et si, quod absit, praesentem ordinationem quovis modo negligere, perturbare ac quacunque ex causa minuere vel impedire ipsi fratres confraternitatis praefatae ausu temerario vel negligentia eorum mediante attemptare praesumserint, extunc ipse consulatus civitatis nostrae praedictae pro tempore constitutus habeat facultatem una cum plebano ipsos puniendi in praedictis bonis tam in specie quam etiam in [ ]¹⁾. Et illa bona superius expressata secundum conscientias suas pro utilitate dictae ecclesiae sancti Michaelis exhibeant et exponant, prout ipsis melius videbitur, nulla gratia penitus obtenta, quamque ordinationem salubrem literis ordinariorum auctorisare et approbare et confirmare petimus diligenter. In cuius rei testimonium et fidem perpetuamque firmitatem praesentes literas nostras privilegiales sub sigilli nostri maioris autentici appensione roboratas duximus concedendas. Datum feria sexta ipso die beati Mathaei apostolici et evangelistae, anno domini millesimo quadringentesimo nonagesimo secundo.


1) Lücke.^{^}