Urkunde Nr. 538 aus Band I

Seite im UB:

487-488

Heute in:

Klausenburg, Filiale des Erzbischöflichen Archivs [Arhiva Arhidiecezei Romano Catolice de Alba Iulia si arhiva statusului Romano Catolic din Transilvania, Filiala Cluj]

Druckvorlage:

nach Original

Abdruck als:

Volltext

Sprache:

Latein

---

538

Grosswardein 1337 November 15 König Karl stellt die von den Deutschen zu Igen und Krakkó eingenommenen Besitzungen Vajasd und Sard der Weissenburger Kirche zurück.

Nos Karolus dei gratia rex Hungariae memoriae commendantes tenore praesentium quibus expedit significamus universis, regimina vitae praesentis ad hoc regibus et principibus a deo conceduntur, ut per regum providentiam eorum ministri et Christi subditi sub eorum regimine Christo pacis actori quiete famulentur et specialiter ecclesiarum iura illaesa conserventur. Hinc est quod nos iuxta suscepti nostri regiminis officium aeque dignum et iustum aestimantes unumquemque regnicolarum nostrorum et specialiter sanctam matrem ecclesiam suis iuribus potiri et gaudere et misericordiae, ubi opus est visceribus eidem et regiis occurrere donativis intendentes hac consideratione ducti ob reverentiam dei omnipotentis gubernatoris omnium et beati Mychaelis archangeli principis militiae caelestis etiam in terris, sed praecipue in caelis patroni nostri specialis et ob spem [S. 488] salutis animarum nostrarum videlicet nostrae propriae et dominae reginae consortis nostrae carissimae ac filiorum nostrorum dulcissimorum necnon etiam causa sanitatis corporis nostri consequendae et etiam ad instantem petitionem magnifici viri Thomae vaivodae Transsiluani et comitis de Zonuk dilecti et fidelis proximi nostri per titularias possessiones et terras ecclesiae beati Mychaelis archangeli Transsiluanae ad possessiones eiusdem ecclesiae capituli scilicet Vayasd, Sard autem episcopatus ipsius ecclesiae vocatas ac alias ex parte praelibatae possessionis Sard ad idem capitulum spectantes ab ipsa ecclesia, episcopo et capitulo per populos seu hospites nostros de Igun in praefata possessione episcopatus, item similiter per eosdem populos et hospites nostros de Igun et de Karako in memorata possessione capituli Wayasd et etiam in aliis si in quibus iidem populi et hospites coram magistro [La]mperto quondam iudice curiae nostrae iuxta continentiam literarum suarum et formam ac seriem iudicii eiusdem legitime acquisitas et obtentas et sic ad dictas possessiones nostras regales Igun et Karako de iure applicatas ab eisdem possessionibus et hospitibus nostris auctoritate regia auferendo et removendo cum omnibus iuribus et utilitatibus earum ipsi ecclesiae Transsiluanae et per consequens episcopo et capitulo eiusdem ecclesiae duximus remittendas et restituendas. Immo remittimus et restituimus patrocinio praesentium mediante, sententiam quoque et literas super dictis terris et possessionibus pro hospitibus de Igun et de Karako per ipsum quondam magistrum Lampertum latam et confectas praesentibus revocamus, cassamus et irritamus ac annullamus et eas pro cassis haberi acceptarique relinquimus ac omni firmitatis vigore carituris, committentes pariter et volentes, ut ipsae possessiones et terrae ecclesiae beati Mychaelis archangeli Transsiluanae modo et tempore praetactis alienatae vice maiestatis nostrae in persona per ipsum Thomam vaivodam Transsiluanum et comitem de Zonuk eidem ecclesiae Transsiluanae et suo episcopo ac capitulo statuantur et resignentur ipsaque ecclesia et episcopus ac capitulum in corporalem possessionem earundem introducantur vice iterata per eundem. Datum Waradini, Sabbato proximo post festum beati Martini confessoris, anno domini M^mo. XXX^mo. septimo.

Unter dem Siegel: Ad petitionem vaivodae, episcopi Waradiensis et omnium baronum propria commissio regis.