Urkunde Nr. 5301 * aus Band VIII

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. II (Inventar 25), Nr. 519.

Druckvorlage:

nach Original

Abdruck als:

Volltext

Sprache:

Deutsch

---

5301 *

Ofen 1493 Januar 22 Der Hermannstädter Königsrichter Lorenz Hann berichtet dem Hermannstädter Bürgermeister, Richter und geschworenen Bürgern Neuigkeiten aus Ofen, namentlich die Anfertigung eines kostbaren Pokals durch Jakob von Meschen, der Weggang des Palatins und Stephan Báthoris vom Hofe, deren heimliche Übereinkunft mit der Königin und anderen Großen zur Bewahrung alter Rechte und die Erhebung des Bartholomäus Drágffy zum neuen siebenbürgischen Woiwoden.

Main grueß vnnd willignn dienst zu aller zeÿt in ernn. Ich thw ewer weysheyt zu wissenn, das mir vnnsers herrenn genad pefolhenn hath, das ich euch zu wissenn thuen sal, das sein ku^eniglich genad hinein ku^omen wirt gar in kurczenn tagenn, dÿ stett vnnd land zu pesehenn. Noch dem wist ir euch zu^o richten. Vnnd vnnsers herrenn genad ist etwas pegerennd, das an mich kumen ist durch etlich herrenn haÿmlich vnnd habenn mir gebenn dy form vnnd vorstee nicht annderß, nur das vnnsers herrenn¹⁾ genad dy form selbß hath lassenn machen. Vnnd ist mir pefolhenn wordenn, das ich euch das sal schickenn, das ir das wolt lassenn machenn auff das aller peldest, das das selbig in seiner genadenn zukunfft pereÿt sey. Vnnd alß sy gescheczt haben mit dem deckel, so wirt es ein marck ader fu^enfftvnnddreÿssig habenn. Auch weÿß ich nicht annderß, wenn das dem herren Jacob von Meschenn auch pefolhenn ist wordenn, das er sal lassenn machenn, was dorein geho^ert, wenn dy Croner herrenn werdenn auch etwas lassenn machenn vnnd dy No^eßner des geleÿchenn. Ich thw euch zu^o wissenn auch etlicher new zeytung, dÿ wir hie habenn: das an sand Anthonÿ tag der groß groff auß gezogenn ist mitsampt dem Batter Istwan an vrlaub, vnnd am auff ziehenn ist der groß groff pey der ku^enigyn gewesenn vnnd der Bathar Istwan ist ze Woczenn plibenn vnnd dÿ mer ist hÿr heÿmlich peÿ denn herrenn, das dÿ ku^enigin, der groß groff vnnd der Bathor Istwan vnnd herczog Lorenncz vnnd dÿ Kanschain vnnd Prini Janusch vnnd etlich herrenn mer, dÿ ich yecz außlassz, das sy einß seind. Ader was sÿ an hebenn wellen, das weyß ich nicht, wann sy habenn darnach vnnserm herrenn dem ku^enigk entpottenn, das sich sein ku^eniglich majestat auff sy nicht peschwerenn sal, das sy alzo hinweck geczogenn sein, wenn sÿ wellenn dy alt gewonheÿt, dÿ sÿ fur manch hundert jarenn gehabt habenn, gerenn wider habenn vonn wegenn des ratß. Das vbrig merckt ir wol. Au^och wisszt weysenn herrenn, das der herr Draffi Bartogk der new weÿda mitsampt dem anderenn weÿda werdenn in eyner kurcz peÿ ewer weysheyt sein, das ir euch wist dornach zu haldenn. Jezunder nicht, sunder last mich ewerenn weÿsheytenn pefolhenn sein. Gegebenn auß Owen an dem tag des heyligenn Vincentÿ, anno domini et cetera M CCCC^o LXXXXIII.

Laurencius Han ku^enigß
richter in der Hermelstat,
kamergroff in der Newenstatt.

Auf der Rückseite Adresse: Dem namhafftignn herrenn burgermeÿster, richter unnd geschwornen burgern in die Hermanstat, meinen herrenn in erenn.


1) Über der Zeile nachgetragen.^{^}