Urkunde Nr. 4760 aus Band VIII

Druckvorlage:

nach anderem Urkundenbuch mit Quellennachweis

Abdruck als:

Volltext

Sprache:

Deutsch

---

4760

1487 Die Seilerzunft in Klausenburg gibt sich Satzungen.

In anno domini millesimo CCCC^o LXXX VII^o der anfangt der erligen lewt yn der czech der Zeler czw Clausenburgk.

Item welcher meister nicht eynen leriungen hatt, der zoll czwen knecht halten. Und welcher meyster eynen ler jungen hatt, der nicht zol meer halten wen eynen knecht wen eyn ler junger ausz gelerneth alzo zoll ym seyn meyster geben vor eynen gulden eynen rock, vnd der leer knecht zol IIII iar ler iaer dynen vnd der leer jüngk zol geben I½ gulden vnd IIII phunt wax vnd eynen vnd czwey gericht wen man yn auff nympt.

Item. Ab eyn knecht czweyn und hett nicht czerüngk, alzo zol ym eyn erber meyster frey zeyn arbeth czw geben auff eynen gulden ader auff eyn halben gulden.

Item. Ab eyn knecht vrlob wold nemen von zeynem herren, zo zoll her das acht tag vorhyn zeynen herren czu wissen thuen, vnd ab das der knecht nicht thutt, zo zol her czwey phunt wax geben yn dy czech. Vnd ab das der meyster nicht auch dem kencht czu wissen thut acht tag dar vor, dy busz IIII phunt wax.

Item. And des liben Sent Endresz tag mer nicht czu opper gett, dy busz 1 phunt wax. Vnd ab der man nicht do heym ist, zo zoll dy fraw bey der zelben busz cza opper geen. Vnd an dem selben tag zullen dy meyster eyn mol haben, vnd wer nicht kumbt dy busz IIII phunt wax.

Vnd wer das mol nicht gibt welcher czech meyster ist, dy busz V phunt wax, dy czwehen czech meist eyn iczliger V phunt wax.

Item. An dem tag Fabiani vnd Sebastiani wer nicht czu opper gett, dy busz 1 phunt wax.

Item. Wer nicht des elters wart czu allen feyr tagen czu der frẅ mesz wer nicht dy kerczen off czünt vnd ausz lischt, dy busz eyn 4 phunt wax, vnd nicht ausz lischt eynen 4 librum wax. Czu der homesz eyn phunt wax. Czu der vesper den elter nicht deckt eyn phunt wax.

Item. Wer nicht czu eyner hobt leich ist noch der leich eyn 4 phunt wax. Wer nicht myth noch der leych gehet eyn 4 phunt wax. Czu dem grab eyn 4 phunt wax. Czu dem opper eyn 4 phunt wax. Czu dem dancken eyn 4 phunt wax. Czu dem weyn eyn 4 librum wax.

Item. Wen eyn meyster eynen knecht hatt vnd der knecht von dem meister vngerecht eweg czwget, ader yn dem czorrn dem zol man noch schreiben vnd zol wider kummen vnd zol zich myth seynem meist geleichen vnd zol der weyl keynen dynst haben.

Item. Wen eyn Junger meyster wil werden, der zol geben yn dy czech IIII gulden, vnd eyn mol, vnd eynen omer weyn, vnd VIII phunt wax yn eynem meineth.

Item. In den czeytten alz man schreibt tawsent CCCC(0) vnd LXXXVII iar haben dy meist das bedacht myth ganzer eyntragt, vnd mit wol bedachten mutt. Wer das wider reth der zol gebn dy halb czeh.

(Es folgen weitere Satzungen, die die Meister am 1. Oktober 1542 beschlossen und den obigen beigefügt haben).