Urkunde Nr. 2254 aus Band IV

Seite im UB:

596-597 ^a)

Heute in:

Kronstadt, Archiv der Honterusgemeinde

Heutige Signatur:

I E (Burzenländer Kapitel, Urkunden), Nr. 40.

Druckvorlage:

nach Original

Abdruck als:

Volltext

Sprache:

Latein

---

2254

Gran 1436 März 25 Erzbischof Georg von Gran räumt Nikolaus, dem Pfarrer von Marienburg und Dekan des Burzenländer Kapitels auf die Dauer eines Jahres verschiedene Vorrechte ein.

Georgius miseratione divina archiepiscopus ecclesiae Strigoniensis locique eiusdem comes perpetuus, primas et apostolicae sedis legatus natus dilecto nobis in Christo honorabili viro magistro Nicolao plebano de Castro Mariae alias Foldwar et decano Brassouiensi nostrae dioecesis et iurisdictionis salutem et paternam benedictionem. Ad exequendum pastoralis officii debitum vigilantibus studiis intendentes circa statum debitum sedis Brassouiensis praefatae feliciter, prospere et salubriter dirigendum reddimur eo attentiori cura solliciti, quo diligentiori regiminis studio indigere noscatur, sperantes igitur, quod per tuae personae debitae scientiae qualitatem, providentiae donum, discretionis virtutem, industriae munus, circumspectionis gratiam et diligentiae studium poterit eiusdem sedis statui super hoc salubriter provideri. Ut autem tua devota sinceritas et promptitudo, quae propter guerrarum, tribulationum et applicationum moderna tempora ad proximam synodum in ecclesia nostra deo concedente in festo beati Adalberti⁷⁾ martyris per nos celebrandam, uti teneretur, venire commodose et interesse nequit quaeque propterea per nos ab huiusmodi venientia et interessantia synodi per alias literas nostras existit hac vice supportata et absoluta in illis partibus ab ipsa proxima synodo [S. 597] usque ad aliam sequentem synodum immediate hic in ecclesia nostra similiter celebrandam, dictum decanatus officium, prout hactenus solitum fuit, libere et prudenter gerere et exercere possit, damus, concedimus et tribuimus atque committimus tibi plenam et expressam liberam ac omnimodam potestatem atque iurisdictionem, dictum decanatus officium sollerter et prudenter gerendi et exercendi, omnes et singulos nobis et ecclesiae nostrae praedictae ordinaria iurisdictione in eodem decanatu et sede Brassouiensi subiectos corrigendi, emendandi, canonice pro eorum excessibus puniendi, querelas cunctorum nobis praemissa ordinaria iurisdictione subiectos audiendi, cognoscendi, decidendi, iudicandi sententialiter et fine debito terminandi, sententias quascumque ferendi, debitae executioni demandandi, faciendi et praecipiendi, prout de iure tibi videbitur melius expediri omnesque et singulos nobis et ecclesiae nostrae praedictae auctoritate supra expressa subiectos in omnibus casibus etiam nobis reservatis absolvendi, confessores nostri in persona plenarie constituendi omnesque et singulos plebanos et ecclesiarum parochialium et capellanorum curatorum et non curatorum ac altarium rectores ad praesentationem verorum patronum et legitimorum confirmandi, censuras ecclesiasticas in quosvis tibi rebellare volentes ferendi et executioni debitae demandandi et generaliter omnia et singula, quae ad huiusmodi decanatus officium ab antiqua et approbata consuetudine quomodolibet pertinere noscuntur faciendi, gerendi et exercendi tibi tenore praesentium concedimus omnimodam facultatem, praesentium nostrarum sub anularis sigilli nostri appressione testimonio literarum. Datum Strigonii, in festo annuntiationis beatae Mariae virginis, anno domini millesimo quadringentesimo tricesimo sexto.

Auf der Rückseite von gleichzeitiger Hand: Litera iurisdictionis.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 7 auf S. 596 (1-6 zu voranstehender Urkunde).^{^}

7) April 23.^{^}