Urkunde Nr. 2230 aus Band IV

Seite im UB:

570-572

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Druckvorlage:

nach Original

Abdruck als:

Volltext

Sprache:

Latein

---

2230

Tyrnau 1435 Mai 30 König Sigmund verbietet allen fremden Kaufleuten, ohne königliche Genehmigung in Ungarn Handel zu treiben.

Von der Kanzlei: Relatio Johannis de Peren comitis Scepusiensis.

Sigismundus dei gratia Romanorum imperator semper augustus ac Hungariae, Bohemiae, Dalmaciae, Croaciae et cetera rex fidelibus nostris universis et singulis praelatis, baronibus, comitibus, castellanis, nobilibus et generaliter cuiusvis status ac conditionis tam ecclesiasticis quam saecularibus possessionatis hominibus ubilibet intra regni nostri Hungariae praedictae ambitum constitutis et existentibus, ad quos praesentes pervenerint, salutem et gratiam. Ad nostrae maiestatis audientiam deductum exstitit, quomodo nonnulli extranei et forenses mercatores ac institores quadam nociva dolositatis astutia excogitata tam nostrarum regalium civitatum quam aliorum praelatorum, baronum, nobilium et regnicolarum nostrorum civium et populorum commodum et profectum ipsis usurpare satagentes, dum per iudicem et iuratos civitatum nostrarum liberarum in eorum consortium et concives non acceptarentur, in aliis oppidis seu villis et possessionibus descenderent et per totius regni nostri ambitum ad nundinas et fora pergerent et diversas negotiationes, emptiones, venditiones, cambia, commutationes et contractus exercendo lucrum, utilitatem et profectum immo quasi victum, quo tam nostrarum civitatum, oppidorum et villarum quam vestrorum inhabitatores sustentari possent et deberent, ab [S. 571] eisdem alienando sibi ipsis attraherent ut frequenter lapsisque quibusdam paucis temporibus se rursus extra regnum nostrum quo ipsis placeret absentarent in inexpressibile derogamen et damnum tam nostrarum regnicolarum nostrorum et praeiudicium multum grande. Ne igitur sub his palliatis dolosis viis lucrum et sustentatio civium, mercatorum et incolarum ceterorumque regnicolarum nostrorum, qui in cunctis nostrae maiestatis servitiis et ipsius regni nostri expeditionibus, prosperis scilicet et adversis, se et sua diversis non verentur submittere, fortunae casibus et periculis in usus alienorum convertatur, rationabilibus de causis animum nostrum ad id moventibus moti decernendo sancimus et committimus, ut nulli omnino mercatores, negotiatores, commutatores aut alterius cuiusvis status et conditionis homines forenses scilicet et alienigenae in nostris civitatibus regalibus, reginalibus aut aliorum quorumcumque, quomodocumque et qualitercumque sine nostrae maiestatis annuentia et concessione speciali residere aut aliquas mercantias, negotiationes et commutationes ac forisationes seu venditiones rerum venalium et emptionalium facere et exercere possint et valeant quovismodo, demptis solummodo talibus forensibus et alienigenis ac advenis, qui se in nostro regno in quibuscumque locis radicati et fixi moraturos disposuerunt. Quocirca vestrae universitati et vestrum cuiuslibet fidelilati firmissime praecipiendo nostro caesareo atque regio sub edicto iniungimus et mandamus, quatenus a modo in posterum nullus omnino vestrum talismodi mercatores negotiatores, commutatores et alterius status forenses scilicet et advenas atque alienigenas ac extraneos homines in suis civitatibus, oppidis, villis, possessionibus, tenutis, honoribus ac in eorum medio tenere, fovere et conservare praesumat seu residere et morari permittat quovis modo, quin immo omnes tales forenses, advenas et non radicatos in regno nostro, qui in vestris civitatibus, oppidis, villis, possessionibus, tenutis, honoribus seu vestri in medio per fideles nostros iudices, iuratos cives, hospites atque mercatores et negotiatores quarumcumque liberarum civitatum nostrarum regni nostri, praesentium scilicet exhibitores, reperti fuerint et iidem vos seu quoscumque ex vobis praesentium serie super eos requisitos habuerint, manibus eorundem cum omnibus rebus et bonis praedictorum forensium tradere et assignare debeatis omnibus modis. Si qui autem vestrum huiusmodi nostrorum mandatorum contrarium facere praesumpserint, quod non credimus, talium omnium possessiones et quaelibet bona eo facto pro nostra occupari faciemus maiestate, de quo tandem nemini alteri quam suae propriae negligentiae poterunt imputare. Secus ergo, uti talia incommoda incurrere pertimescitis, facere non ausuri. Et ne quis huiusmodi mandatorum nostrorum ignorantiam valeat quomodolibet allegare, praesentes in foris et aliis locis ad id aptis et necessariis volumus publice proclamari. Quas post earum lecturam semper reddi edicimus exhibenti. Datum Tirnaviae, feria secunda proxima post festum ascensio-[S. 572] nis domini, anno eiusdem millesimo quadringentesimo tricesimo quinto, regnorum nostrorum anno Hungariae et cetera quadragesimo nono, Romanorum vigesimo quinto, Bohemiae quintodecimo, imperii vero secundo.

Unter dem Siegel Kanzleibemerkung.

Von der Kanzlei: Lecta. Fiat relatio.