Urkunde Nr. 2227 aus Band IV

Seite im UB:

567-568

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Sammlung Brukenthal [Colecţia Brukenthal] (Inventar 80-125)

Druckvorlage:

nach Einschaltung (Insert)

Abdruck als:

Volltext

Sprache:

Latein

---

2227

Pressburg 1435 Mai 1 König Sigmund verleiht Magister Johann, dem Sohn Balthasars von [Straßburg /] Enyed, die Besitzung Johannisberg und erhebt ihn, seinen Vater und seine Brüder in den Adelsstand.

Nos Sigismundus, dei gratia Romanorum imperator, semper augustus, ac Hungariae, Bohemiae, Dalmaciae, Croaciae et cetera rex memoriae commendamus tenore praesentium, significantes quibus expedit universis, quod nos attentis et consideratis fidelitatibus et fidelium servitiorum meritis fidelis nostri magistri Joannis, filii Balthasar de Enyed, notarii cancellariae nostrae maiestatis, quibus idem in nonnullis nostris agendis et expeditionibus sub locorum et temporum varietate et praesertim in Allamanniae, Lombardiae et Italiae partibus, quas pro suscipiendis sacris coronis imperialibus iam auspice domino feliciter adeptis perlustravimus, una cum nostra serenitate procedendo, maiestati nostrae studuit complacere seque gratum reddere et acceptum, quorum intuitu impraesentiarum ipsum magistrum Joannem, ut idem ad altiora nobis impendenda obsequia ferventius incitetur, regiis antedictum¹⁾ praemiis remunerare volentes, quandam possessionem nostram Zenthjanoshegye vocatam, in comitatu Albensi partium nostrarum Transsiluanarum habitam, per nos alias quondam Andreae, filio Joannis, iudici civitatis et sedis Saxonicalis nostrae Cibiniensis pro suis servitiis donatam nuncque per defectum seminis sexus masculini eiusdem quondam Andreae iudicis vice versa ad manus nostras regias devolutam, simul cum cunctis eiusdem utilitatibus et pertinentiis, terris videlicet cultis et incultis, agris pratis, pascuis, fenilibus, silvis, rubetis, nemoribus, vineis et vinearum promontoriis, aquis et aquarum decursibus, molendinis et molendinorum locis, piscinis et piscaluris et generaliter quarumlibet utilitatum et pertinentiarum integritatibus quovis [S. 568] nominis vocabulo vocitatis ad eandem possessionem spectantibus et pertinere debentibus, sub suis veris metis et antiquis limitibus, quibus eadem per annotatum quondam Andream iudicem seu alios eiusdem priores possessores rite tenta sunt et possessa, ex certa nostrae maiestatis scientia et animo deliberato, praelatorum etiam et baronum nostrorum ad id accedente consilio praematuro, omni eo iure, quo nostrae incumbit collationi praefato magistro Joanni, filio Balthasar et per ipsum eidem Balthasar patri et Laurentio, Jacobo et Georgio, carnalibus fratribus suis ipsorumque heredibus et posteritatibus universis de manibus nostris regiis dedimus, donavimus et contulimus, immo damus, donamus et conferimus iure perpetuo et irrevocabiliter possidendam, tenendam pariter et habendam salvo iure alieno, nostro ac successorum nostrorum regum scilicet Hungariae nominibus annotatos magistrum Joannem ac Balthasarem, Laurentium, Jacobum et Georgium necnon ipsorum heredes in pacifico dominio praedictae possessionis Zenthjanoshegye et suarum pertinentiarum contra quoslibet impetitores, causidicos et actores intra et extra iudicium ubique tueri, conservare et expedire propriis nostris et eorundem successorum nostrorum laboribus et expensis [promittentes]. Praeterea ex abundatiori plenitudine nostrae potestatis et gratia speciali annotatos magistrum Joannem, et Balthasarem patrem, necnon Laurentium, Jacobum et Georgium fratres eiusdem Joannis carnales ipsorumque heredes et posteritates universos ab omni iugo seu nexu ignobilitatis eximendo, praesentium vigore nobilitamus ac in veros regni nostri Hungariae nobiles praefecimus, instituimus et creavimus, immo praeficimus et creamus, decernentes ac imperiali et regali statuentes edicto, eosdem omnibus et singulis libertatibus, immunitatibus, privilegiis et indultis, quibus veri regni nostri nobiles quomodolibet de iure et consuetudine fruiti sunt et gravisi utunturque et fruuntur, uti, frui et successivis semper perpetuis temporibus potiri et gaudere, harum nostrarum vigore et testimonio literarum mediante, quas in formam nostri privilegii redigi faciemus, dum nobis in specie fuerint reportatae. Datum Posonii in festo beatorum Philippi et Jacobi apostolorum, anno domini 1435, regnorum nostrorum anno Hungariae [et cetera] IL^mo, Romanorum XXV^to, Bohemiae XV^o, imperii vero secundo.


1) Vorlage: antedatum.^{^}