Urkunde Nr. 2221 aus Band IV

Seite im UB:

561-562 ^a)

Heute in:

Kronstadt, Staatsarchiv [Direcţia Judeţeană Braşov a Arhivele Naţionale ale Romȃniei]

Heutige Signatur:

Fond 1: Stadt Kronstadt [Primaria Municipiului Braşov], Privilegiensammlung (Colecţia privilegii) Nr. 84.

Druckvorlage:

nach Original

Abdruck als:

Volltext

Sprache:

Latein

---

2221

Pressburg 1435 April 10 König Sigmund beauftragt den Rat von Kronstadt, den Bewohnern von Stadt und Distrikt zum Wiederaufbau ihrer durch die Türken zerstörten Häuser Holz aus den Waldungen des Burzenlandes zur Verfügung zu stellen.

Von der Kanzlei: Relatio Mychaelis Jakch²⁾ comitis Siculorum.

Sigismundus dei gratia Romanorum imperator semper augustus ac Hungariae, Bohemiae, Dalmaciae, Croaciae et cetera rex fidelibus nostris dilectis providis, iudici et iuratis civibus nostrae civitatis Brassouiensis salutem et gratiam. Fideles dilecti, quia opportunum est et utique necessarium. ut domus et aedificia civitatis nostrae praedictae necnon oppidorum, villarum et possessionum totius terrae nostrae Barcensis, quae pridem uti nostis, nobis eotunc in exteris regionibus constitutis, a saevissimis Turcis, qui ipsam terram nostram hostiliter invadentes depraedati sunt, per ignis incendium sunt combustae, reaedificentur et reformentur, ideo nos de fide et diligenti sollicitudine vestris ut plurimum confisi fidelitati vestrae firmiter committimus et mandamus, quatenus universas silvas ubilicet in districtu ipsius terrae nostrae Barcensis existentes diligenter conspicere et de eisdem silvis in quibus vobis melius videbitur pensatis uniuscuiusque [S. 562] necessitatibus ligna sufficientia omnibus et singulis tam ipsius civitatis nostrae Brassouiensis, vestris scilicet concivibus, quam totius ipsius terrae Barcensis incolis atque habitatoribus, quibus pro reformatione et restauratione huiusmodi domorum et aedificiorum eorum ipsa lignamina necessaria sunt et opportuna, dare, distribuere et assignare debeatis nostra auctoritate vobis in hac parte attributa mediante. Vobis autem oppidanis et incolis praetactae terrae nostrae Barcensis firmissime mandantes iniungimus, ut praefatis Brassouiensibus in praemissis in nullo contradicere et obviare praesumatis gratiae nostrae sub obtentu. Datum Posonii in dominica Ramispalmarum, anno domini MCCCCXXX quinto, regnorum nostrorum anno Hungariae et cetera XL nono, Romanorum XXV, Bohemiae XV, imperii vero secundo.

Unter dem Siegel: Relatio My[chaelis Jakch comitis Siculorum].


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 2 auf S. 561 (1 zu voranstehender Urkunde).^{^}

2) Auf der Zeile de, darüber Jakch.^{^}