Urkunde Nr. 2218 aus Band IV

Seite im UB:

557-558

Heute in:

Kronstadt, Staatsarchiv [Direcţia Judeţeană Braşov a Arhivele Naţionale ale Romȃniei]

Heutige Signatur:

Fond 1: Stadt Kronstadt [Primaria Municipiului Braşov], Privilegiensammlung (Colecţia privilegii) Nr. 81.

Druckvorlage:

nach Original

Abdruck als:

Volltext

Sprache:

Latein

---

2218

Pressburg 1435 April 7 König Sigmund befiehlt der Stadt Kronstadt und dem Burzenländer Distrikt, die von dem Basler Konzil beschlossene allgemeine Steuer an den siebenbürgischen Woiwoden abzuliefern.

Von der Kanzlei: Commissio propria domini imperatoris Leonardo / Naffry de Baymocz referente.

Sigismundus dei gratia Romanorum imperator semper augustus ac Hungariae, Bohemiae, Dalmaciae, Croaciae et cetera rex fidelibus nostris dilectis universis et singulis Saxonibus districtus seu terrae Barcza necnon civitatis nostrae Brassoviensis partium nostrarum Transsiluanarum salutem et gratiam. Ingruentibus variis et multis regni nostri necessitatibus et qualitatibus necessitatum exigentibus cum omnibus regnicolis regni nostri Hungariae eisdem benivole assentientibus et acceptantibus opus fuit iuxta decreta et sanctiones ac ordinationes sacrosancti Basiliensis concilii, per universam christianitatem facta et indictas, a quibuscumque personis ecclesiasticis et saecularibus cuiuscumque status, gradus et praeeminentiae existant, ut videlicet ab ecclesiasticis semidecimam hoc est de viginti denariis vel de viginti florenis unum et a saecularibus personis quibuscumque a maioribus usque ad minimum quinquagesimam hoc est de quinquaginta denariis seu de quinquaginta florenis unum pro regni nostri variis et multis expeditionibus necessario recipere, et iam in hoc regno nostro Hungaria processum est cum effectu ad dicationem et exactionem eorundem, sperantes in domino, quod ex talibus pecuniis dicatis et recollectis multae perutiles provisiones pro regni defensione et aliis utilitatibus fieri poterunt et expediri. Verum quia nos speciales huius rei gratia cum omnibus tam septem sedium quam aliarum Saxonicalium partium nostrarum Transsiluanarum sedium, sed et cum vestris ad nos directis nun- [S. 558] tiis tractatus habentes devenimus cum eisdem aliarum Saxonicalium sedium nuntiis ad conclusionem et pactum solutionis duorum censuum hoc est census duplicati prout quolibet anno de uno censu nobis et nostro fisco regio ex primaevis et antiquis institutionibus et ordinationibus solvere tenentur cum vestris autem nuntiis ad talem devenimus conclusionem et pactum solutionis, ut vos, cum per saepissimas saevissimorum Turcorum crucis Christi persecutorum devastationes hominumque utriusque sexus in miserabilem servitutem abductiones domorumque curiarum et aedificiorum vestrorum terribiles combustiones, prout omnibus patet, sine misericordia afflicti estis et multipliciter aggravati, ut ad solutionem unius census soliti, quem vobis ex rationibus praemissis gratiose indulsimus et relaxavimus, non teneamini, sed ratione et praetextu quinquagesimae praenotatae tantum unum censum ad numerum et compotum census soliti nobis hacinde solvere debeatis. Ideo fidelitati vestrae firmissimo nostro sub edicto praecipientes mandamus, quatenus praedictum unum censum vestri de medio ex vi praetactae ordinationis solvendum, ad summam florenorum septingentorum quinquaginta quatuor anni cum medio se extendentem, fideli nostro magnifico Ladislao de Chaak dictarum partium nostrarum Transsiluanarum vaivodae vel eius homini, qui ad hoc per eum fuerit deputatus, pro exercituali et alia expeditione commodum, utilitatem ac defensionem regni et regnicolarum nostrorum et signanter partium illarum nostrarum Transsiluanarum per ipsum vaivodam expediendis et dispensandis per unum mensem integrum a festo beati Georgii martyris proxime venturo¹⁾ computandum solvere debeatis cum effectu. Et nec secus facere praesumatis gratiae nostrae sub obtentu. Datum Posonii, feria quinta proxima ante dominicam Ramispalmarum, anno domini millesimo quadringentesimo tricesimo quinto, regnorum nostrorum anno Hungariae et cetera XL^mo octavo, Romanorum vigesimo quinto, Bohemiae quinto decimo, imperii vero secundo.

Unter dem Siegel: Kanzleibemerkung.

Auf der Rückseite vom Schreiber der Urkunde: Barcza.


1) April 24.^{^}