Urkunde Nr. 2104 aus Band IV

Seite im UB:

422-423

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. II (Inventar 25 ), Nr. 60.

Druckvorlage:

nach Original

Abdruck als:

Volltext

Sprache:

Latein

---

2104

Konstanz 1431 Januar 15 König Sigmund beauftragt Ladislaus, den Woiwoden von Siebenbürgen, die Sachsen der Sieben Stühle gegen alle Zolleinnehmer, die ihre Ansprüche nicht nachweisen können, in Schutz zu nehmen.

Von der Kanzlei: Commissio propria domini regis Ladislao de Chap, / alias vicecancellario referente.

Sigismundus dei gratia Romanorum rex semper augustus ac Hungariae, Bohemiae, Dalmaciae, Croaciae et cetera rex fideli nostro magnifico Ladislao de Chaak, partium nostrarum Transsiluanarum vaivodae salutem et gratiam. Nostrae serenitatis venientes in conspectum providi viri Mathyas civis nostrae Civitatis Cibiniensis et Valentinus de Dalya nominibus et in personis omnium et singulorum Saxonum septem sedium partium nostrarum Transsiluanarum nostrae exposuerunt maiestati gravi cum querela, quod quamvis ipsi et eorum quilibet per divos reges Hungariae, nostros scilicet praedecessores et per consequens per nostram maiestatem ab omni et qualibet tributaria solutione in quibuscumque locis tributorum tam regalium quam aliorum quorumlibet regnicolarum nostrorum ubivis intra ambitum regni nostri existentium tam de personis quam de rebus et mercimoniis eorum facienda prorsus et per omnia sint et existant exempti et supportati habeantur et neque ad huiusmodi tributariam solutionem faciendam virtute huiusmodi eorum exemptionis et libertatis quoquomodo teneantur, tamen nonnulli forent nobiles et alterius status possessionati homines regni nostri tributa tenentes et habenies et signanter sub vestro vaivodatu existentes, qui non obstantibus praemissis exemptionibus et libertatibus memoratorum Saxonum nostrorum septem sedium ipsis modo quo supra concessis, immo spretis omnino et vilipensis eisdem ab eisdem Saxonibus nostris rebusque et mercimoniis eorum, dum ad loca praetactorum tributorum pervenirent, contra formam praenarratae exemptionis et libertatis eorum tributum exigerent eosque ad ipsam solutionem faciendam diversimode cogerent et artarent maximum praeiudicium magnamque iniuriam ipsis et dictae eorum libertati inferentes in hac parte, supplicantes nostro culmini prece humili et devota, ut ipsis circa praemissa de regali remedio dignaremur providere opportuno. Nos itaque saepe fatos Saxones nostros praetitulatis exemptionibus et libertatibus eorum per quempiam frustrari nolentes quin potius eisdem semper et ubique potiri volentes et gaudere fidelitati vestrae firmissime praecipimus et mandamus, quatenus habita praesentium notitia universis et singulis ipsis nobilibus et alterius status ho- [S. 423] minibus sub ipso vestro vaivodatu existentibus, qui iam fatos Saxones nostros per talismodi tributariam exactionem vexant et perturbant ab una, parte vero ex altera saepe fatis Saxonibus nostris auctoritate nostra praesentibus vobis in hac parte specialiter attributa mediante firmiter committatis, ut ipsi universa et quaelibet eorum literalia instrumenta, quae tam super ipsis tributis quam super exemptionibus et libertatibus praetactis utrimque habent confecta et emanata in uno certo termino per vos eis praefigendo coram vobis producere debeant et exhibere. Quibus productis et exhibitis ipsa literalia instrumenta vos diligenter examinando et revidendo, si ex continentiis eorundem praenarratos Saxones nostros ad solutionem tributariam antelatam teneri cognoveritis, tunc ibidem iniungatis eisdem et committatis, ut ampliori in hac parte contentione relegata memoratum tributum illis regnicolis nostris quibus competit semper et ubique solvere teneantur. Si vero id comperieritis, quod ipsi ad praetitulatam solutionem tributariam non tenentur liberique esse debent ab eadem et exempti, tunc omnibus ipsis nobilibus et alterius status hominibus, per quos vexantur mandetis firmiter et committatis, ut ipsos Saxones nostros per amplius per huiuscemodi tributariam exactionem nusquam et nequaquam quomodolibet praesumant vexare impedireque et molestare ipsisque et eorum cuilibet super ampliori tributaria exactione ab ipsis Saxonibus nostris et eorum rebus postulanda et recipienda perpetuum silentium imponentes mera nostra auctoritate vobis in hac parte specialiter attributa mediante. Super eo autem qualiter inter partes praenotatas facto in praemisso concluseritis et determinabitis eisdem partibus ambabus literas vestras concedatis efficaces, uberiorem iuris eorum ad cautelam. Et secus sub obtentu nostrae gratiae non facturi. Volumus etiam et eidem vestrae fidelitati firmiter mandantes praecipimus, ut et vos praefatos Saxones nostros in locis tributorum nostrorum regalium sub vestro honore exsistentium ratione et praetextu cuiuscumque tributariae exactionis contra formam ipsius exemptionis et libertatis eorum nusquam et nequaquam vexare et impedire permittatis gratiae nostrae sub obtentu. Et hoc idem iniungimus futuris vaivodis partium nostrarum Transsiluanarum omnibusque tributariis in locis tributorum nostrorum regalium pro tempore constitutis, dantes ipsis firmis similibus in mandatis praemissa inviolabiliter observare temporibus successivis universis. Praesentes etiam post earum lecturam semper et ubique apud exhibentis manus volumus remanere. Datum Constanciae, feria secunda proxima ante festum beati Anthonii confessoris, anno domini M^o CCCC^o XXX^o primo, regnorum nostrorum anno Hungariae et cetera XLIIII^to, Romanorum vigesimo primo et Bohemiae undecimo.

Unter dem Siegel: Commissio propria domini regis Ladislao de Chap, / alias vicecancellario referente. [S. 424]