Urkunde Nr. 2044 aus Band IV

Seite im UB:

349-350

Druckvorlage:

nach Original

Abdruck als:

Volltext

Sprache:

Latein

---

2044

Kubin 1428 Juni 28 König Sigmund verbietet den Bewohnern von Bistritz, dass sie die Gewerbetreibenden des Distriktes hindern, ihre Waren auf dem Wochenmarkt in Bistritz zu verkaufen.

Nos Sigismundus dei gratia Romanorum rex semper augustus ac Hungariae, Bohemiae, Dalmaciae, Croaciae et cetera rex memoriae commendantes tenore praesentium significamus quibus expedit universis, quod fideles nostri providi viri Ladislaus Greb de Nagdemeter et Marcus similiter Greb de Feyereghaz possessionibus scilicet seu villis ad civitatem nostram Bistriciensem partis nostrae Transsiluanae pertinentibus suis ac universorum populorum, hospitum et incolarum in eisdem Nagdemetur et Feyereghaz ceterisque possessionibus et villis similiter ad ipsam civitatem nostram Bistriciensem spectantibus commorantium nominibus et in personis nostri culminis adientes conspectum nobis detexerunt graviter conquerendo, quomodo iudex iuratique cives, hospites et incolae, praesertim mechanici et eorum rectores seu antecessores vulgo czehmestur nuncupati ipsius civitatis nostrae Bistriciensis ipsos scilicet villanos et alios forenses homines, qui cum eorum rebus et bonis vendibilibus ad forum hebdomadale in ipsa nostra civitate singulis feriis tertiis celebrari consuetum causa venditionis rerum ipsorum venire vellent, intrare et eorum res inibi venditioni exponere non admitterent abusivam in hac parte consuetudinem observantes, in quo ipsi damnum non modicum paterentur, supplicantes iidem Ladislaus et Marcus Greb sibi et praefatis universis populis et hospitibus in praedictis villis ad ante fatam civitatem nostram Bistriciensem pertinentibus commorantibus circa id per nostram maiestatem opportune provideri. Et quia nos huiusmodi novitates, quae merito abusiones dici possunt, de ipsorum civitatensium et villanorum nostrorum medio evellere et amplius non fieri volentes statuimus volumusque et decernimus, ut a modo in antea universi villani et forenses ac cuiusvis status extranei homines, qui cum eorum mercibus et rebus venalibus ad praefatum forum hebdomadale in annotata nostra civitate Bistriciensi ut praemittitur feriis tertiis celebrari solitum venire voluerint, non obstante contradictione rectorum vulgariter chehmestur dictorum cuiuscumque artis mechanicae, dummodo ipsis per nos aut nostros praedecessores reges scilicet Hungariae superinde aliqua libertatis praerogativa specialiter facta et concessa non fuerit, libere intrare ibique eorum res et bona vendere, forizare aut permutare et ab hinc ad propria vel alia, quae maluerint, loca pacifice recedere valeant et secure praesentium per vigorem. Quocirca vobis fidelibus [S. 350] nostris praefatis iudici iuratisque civibus ac aliis universis hospitibus et incolis signanter mechanicis vestrisque rectoribus vulgo ut praefertur chehmestur appellalis praenotatae¹⁾ civitatis nostrae Bistriciensis firmo edicto regio praecipientes mandamus, quatenus a modo deinceps ipsos universos villanos et forenses ac cuiusvis status et conditionis extraneos homines cum eorum mercibus et rebus venalibus ad praenotatum forum hebdomadale in praelibata civitate nostra Bistriciensi feriis tertiis uti praedicitur celebrari solitum venire volentes non obstante ut praemisimus contradictione chehmestur cuiusvis artis mechanicae, dummodo prout praefertur ipsis per nos aut nostros praedecessores puta reges Hungariae aliqua libertatis praerogativa non sit specialiter attributa, libere intrare resque et bona eorum vendere, forizare vel commutare et deinde ad propria vel alia quae voluerint loca pacifice recedere et abire sinatis et permitti faciatis, alioquin commisimus et praesentium tenore firmissime committimus fidelibus nostris viris magnificis Ladislao de Chak vaivodae nostro Transsiluano ac Johanni et Michaeli Jakch de Kwsal comitibus Siculorum nostrorum vel ipsorum vices gerentibus, ut ipsi vos ad praemissa facienda nostrae maiestatis in persona et auctoritate mediante compellant et astringant, et ubi temporum in processu necesse fuerit etiam futuris nostris vaivodis Transsiluanis et comitibus Siculorum nostrorum vel ipsorum similiter vices gerentibus similibus dantes firmis in praeceptis committimus vos ad eadem observanda astringere et compellere atque facienda. Secus igitur non facientes in praemissis. Praesentes vero perlectas, quibus maius duplex authenticum sigillum nostrum est appensum, semper reddi edicimus praesentanti. Datum in Kewe, in vigilia festi beatorum Petri et Pauli apostolorum, anno domini millesimo quadringentesimo vigesimo octavo, regnorum nostrorum anno Hungariae et cetera quadragesimo secundo, Romanorum decimo octavo et Bohemiae octavo.


1) Vorlage: pronotatae.^{^}