Urkunde Nr. 2025 aus Band IV

Seite im UB:

329-330

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Druckvorlage:

nach Original

Abdruck als:

Volltext

Sprache:

Latein

---

2025

Tyrnau 1428 Februar 26 König Sigmund befiehlt den Adligen von Oşorheiu / Gyerővásárhely, vor dem königlichen Gericht in Stuhlweissenburg den Nachweis zu führen, dass die Bewohner von Klausenburg auf ihren Zollstellen abgabenpflichtig sind.

Von der Kanzlei: Commissio propria domini regis.

Sigismundus dei gratia Romanorum rex semper augustus ac Hungariae, Bohemiae, Dalmaciae, Croaciae et cetera rex fidelibus nostris Nicolao filio Johannis et alteri Nicolao filio Gerew necnon Stephano, Ladislao et Georgio similiter filiis Gerew item Nicolao, Ladislao et Johanni filiis Mykola ac Petro, Rado et Kemen de Gerewasarhel salutem et gratiam. In personis fidelium nostrorum universorum civium et hospitum civitatis nostrae Kluswar vocatae maiestati nostrae exponitur gravissima cum querela, quod licet ipsi cives et hospites nostri et eorum quilibet resque et bona ipsorum quaecumque antiqua eorum libertate ipsis per divos reges Hungariae felicium reminiscentiarum nostros scilicet praedecessores efficacissimorum literalium instrumentorum vigoribus data et concessa a qualibet solutione tributaria seu solutionis tributariae onere in quorumcumque tributis tam nostris videlicet regalibus ac reginalibus quam aliorum quorumvis et praesertim in partibus nostris Transsiluanis ubilibet habitis perpetue exempti sint et emancipati habeantur, uti etiam hoc ex continentiis certarum literarum nostrarum tenorem et continentiam quarundam literarum praedictarum praedecessorum nostrorum regum ut puta Hungariae super perennali exemptione et absolutione a praemissa solutione tributaria ipsis civibus et hospitibus nostris gratiose datarum et concessarum confirmative in se habentium coram nobis productarum et exhibitarum vidimus contineri, tamen vos et vestri tributarii huiusmodi libertatibus eorum ipsis modo praemisso datis et concessis ac per nos confirmative roboratis minime attentis easdem contemptibiliter infringere non verentes quadam abusiva consuetudine immo potius corruptela adinventa et introducta a praedictis civibus et hospitibus nostris rebusque et bonis eorundem tributum seu solutionem tributariam exigeretis et faceretis extorqueri incessanter in eorundem praeiudicium et damnum dictaeque libertatis ipsorum praerogativae derogamen et nostrae maiestatis displicentiam multum ingentem. Supplicatum itaque exstitit nostrae claritati pro parte praefatorum civium et hospitum nostrorum, ut ipsis circa praemissa opportune providere dignaremur. Et quia nos, nolentes per quempiam praescriptis gratiosis exemptionibus memoratorum civium et hospitum nostrorum in contrarium eorundem antiquae libertatis in aliquo derogari, hoc, [S. 330] utrum videlicet praetacti cives et hospites nostri in vestro tributo non obstantibus exemptionibus gratiosis huiusmodi solutionem tributariam facere teneantur vel ne, visis et examinatis vestris et eorundem civium et hospitum nostrorum iuribus personaliter, dum in nostra civitate Alba regali deo duce in proximo constituemur, una cum praelatis et baronibus nostris revidere discutereque et discernere volumus. Ideo fidelitati vestrae firmiter praecipimus et mandamus aliter habere nolentes, quatenus quam primum nostram maiestatem in civitate nostra Alba regali praedicta constitutam fore audieritis, mox et ad statim vos personaliter cum omnibus vestris literis et literalibus instrumentis factum quorumcumque tribulorum vestrorum tangentibus et concernentibus in ipsam Albam regalem tamquam evocati ad nostram venire debeatis maiestatem. Si autem personaliter venire non poteritis, ex tunc legitimum procuratorem vestrum praemissas literas vestras et literalia instrumenta contra et adversus memoratos cives et hospites nostros similiter literas et literalia instrumenta factum huiusmodi concernentia producentes coram nobis ac praetactis praelatis et baronibus nostris exhibiturum iudiciumque in praemissis recepturum transmittatis, notificantes vobis, quod si veneritis vel miseritis et iudicium in praemissis receperitis, bene quidem, alioquin non obstante vestra vel procuratoris vestri absentia praenominatos cives et hospites nostros a solutione tributaria in quibuscumque tributis vestris fienda secundum praescriptas ipsorum gratiosas exemptiones perpetue absolutos et expeditos committimus.¹⁾ Volumus denique et vobis districte mandamus, ut medio tempore usque decisionem videlicet talismodi causae nullibi in vestro tributo ab eisdem civibus et hospitibus nostris necnon rebus et bonis ipsorum quibusvis tributariam solutionem exigere et extorqueri facere praesumatis nec sitis ausi modo aliquali. Praesentes quoque perlectas reddi iubemus praesentanti. Datum in Tornawa, secundo die festi beati Mathiae apostoli, anno domini millesimo quadringentesimo vigesimo octavo, regnorum nostrorum anno Hungariae et cetera XLI^o, Romanorum XVIII^o et Bohemiae octavo.

Unter dem Siegel: Commissio propria domini regis.


1) Vorlage: commitemus.^{^}