Urkunde Nr. 1866 aus Band IV

Seite im UB:

104-105

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Druckvorlage:

nach Original

Abdruck als:

Volltext

Sprache:

Latein

---

1866

Ofen 1419 August 20 König Sigmund verfügt, dass Mörder und sonstige Missetäter, die sich an den Bewohnern von Klausenburg vergehen, vor dem städtischen und nicht vor einem grundherrlichen Gericht abgeurteilt werden.

Von der Kanzlei: Commissio propria domini regis.

Nos Sigismundus dei gratia [Romanorum] rex semper augustus ac Hungariae, Dalmaciae, Croaciae et cetera rex memoriae commendamus tenore praesentium quibus expedit universis, quod fideles nostri dilecti, circumspecti et providi Caspar iudex ac Martinus Kewsel et Valentinus pellifex iurati cives nostrae civitatis Colwswar in suis ac universorum civium et hospitum eiusdem nostrae civitatis nominibus et personis nobis plurimum conquerendo curarunt significare, quomodo plerique forent homicidae et alterius status homines homicidia et alia malorum et criminum genera perpetrantes et super huiusmodi homicidiis seu criminum generibus a nostra maiestate gratias impetrantes, qui de vigore huiusmodi gratiarum confisi laesis et damnificatis non iuxta civitatum nostrarum liberarum sed secundum nobilium consuetudinem satisfactionem impendere niterentur in praeiudicium eorundem exponentium et consuetudinis eorum antiquae, qua ipsi hactenus usi fuerunt, derogamen¹⁾ multum grande, supplicantes exinde iidem exponentes nominibus quibus supra circa praemissa per nostram maiestatem ipsis superinde opportune provideri. ²⁾ Et quia civitates nostrae ac oppida et villae liberae legibus et consuetudinibus nobilium regni nostri non conformantur neque subiiciuntur, ideo nos supplicationes eorundem exponentium animadvertentes consuetudinibus ipsorum antiquis supra dictis nolentes in aliquo signanter³⁾ in hoc casu aliquatenus derogari, eosdem cives et hospites et totam communitatem in eisdem consuetudinibus et libertatibus praerogativis, quibus ipsi in hac parte hucusque usi ut praedicitur fuerunt et gavisi, et per nos eisdem de novo concessis conservare et conservari facere volentes matura deliberatione superinde prius praehabita praelatorumque et baronum nostrorum ad id accedente consilio praematuro et ex certa scientia nostrae maiestatis duximus decernendum immo decernimus praesentium per vigorem, ut quilibet tam homicida quam alterius cuiusvis status existens, homicidia seu alia nocumentorum et malorum genera [S. 105] civibus et hospitibus praedictae civitatis nostrae vel eorum alteri perpetrans, laesis et damnum passis super huiusmodi homicidiis et damnorum illationibus iuxta praedictae civitatis nostrae et non nobilium consuetudinem laudabilem et approbatam semper et omni tempore solvere et satisfacere teneantur. Alioquin annuimus eisdem iudici, iuratis civibus et hospitibus praetactae nostrae civitatis Koluswar, ut ipsi huiusmodi homines praedicta nostra instituta irrefragabiliter observare nolentes ad debitam observationem eorundem compellere valeant atque possint auctoritate nostra regia praesentibus in hac parte ipsis attributa mediante, aliis literis nostris et ceteris in harum contrarium editis et dandis non obstantibus quibuscumque. Datum Budae, in festo beati regis Stephani, anno domini M^o CCCC^o decimo nono, regnorum nostrorum anno Hungariae et cetera tricesimo tertio, Romanorum vero nono.


1) Vorlage: deromagen.^{^}
2) Vorlage: providere.^{^}
3) Vorlage: singnanter.^{^}