Urkunde Nr. 3975 aus Band VI

Seite im UB:

563-565 ^a)

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Heutige Signatur:

Zünfte [Colecţia Bresle] (Inventar 784-786), mittelalterliche Sammlung Nr. 7.

Druckvorlage:

nach Abschrift

Abdruck als:

Volltext

Sprache:

Deutsch

---

3975

Klausenburg 1473 Oktober 25 Richter und Rat von Klausenburg erteilen der Goldschmiedezunft ihrer Stadt Satzungen. [S. 564]

Synt demmol der werlde saczung aber beslissung gantcz czustörlich ist. Vnd durch kwercze des leben der menschen dy gesacz vnd ordenung, dy yn eyner czechin aber gemeyne beslossen vnd geordenirt werdin, komen gancz awsz den gedanken vnd vorgeslichkeit der menschen. Dorumb hat das dy vorsichtige zorgfeldikeit des menschlichin geslechts wol betracht vnd bedocht, das dy dyng vnd gesatcz, dy beslossin vnd geordint werden, czw eynem offenbarin nütz, off dy selben widirumb vndirdruckt abir czustoerit werden, abir mit hyndirlistigen wedirsperrigin worten abir werken czw ewigen geczeytin nicht wedirczogin noch wedirredit mogin werdin. Das dy selbigin gesacz vnd ordenungin mit pryfflichin hantschrifften besorget, befestiget vnd beschribin sollen werdin. Dorumb wyr Johannes Zegin rychter, Ambrusz Dyag, Jocob Zetsch, Sabo Georg, Petir Broda, Czyssar Petir, Johannes Lamp richt, Martinus Goltsmit, Miclossy Jacab, Cleyn Michil, Marcus Janusz, Michil Schoerel vnd Petir Sattler, gesworne purger der Stat Clawsenpurg geben czw ewigen gedechtnisz allen den, dy des in pryff sehen, hören abir lezin. Das vor vns komen seyn dy vorsichtigin vnd weyszin meyster des loblichin hantwerg der goltsmit mit nominen Andreas Hanvschel, Petir Zoemer, Michil Goltsmit vnd Paul Goltsmit, vnszer obegenaten stat mitwoner vnd haben gelangt vnd gegeben etczliche register, dorin beschrebin worin dy gesatcz, artikel vnd ordenung der obgemeltin czechin vnd hantwergs der goltsmit. Als sy denne gehalden werden yn allen koniclichin steten des ganczin koenigrech von Hungern vnd sunderlich yn dem lande yn Sybenbürgen gehalden werden czw eynem löblichen offymbarin nütz bys awff dy czeyth. Vnd nw und czw ewigin czukunftigen czeyten sullen vnczustoerlich gehalden werden, welche saczung vnd ordenung, dy meyster des obgenanten hantwergs, czw eynem gemeynen nütcz vnd ere deszir stat eyntrechticlichin beslyssende awff genommen haben czw sterken vnd behalden. Dorumb haben sy vns angelanget mit gar fleysslicher bethe, das wir dy selbigen gesatcz, artikel vnd ordenung von wort czw wort yn eyn pryfflich hantfeste wolden lossen beschreyben, off das sy dy gesmeyde von pwrim golt vnd aws lawterim feijn zylber gewalt haben czu machin, gleycherweys als ander meyster yn allen koniclichen steten haben, alzo wir denne gesehen vnd vornummen haben, das er gebet billich vnd beqweme ist. Awsz sunderlichir günst, vornunfft vnd vndirweysung, haben wir sy ererbethe beczweyget, vnd habin yn ere gesatcz vnd artickel awsz eren registern dy sy vns haben gelangt, lossen beschreyben yn dy wort: Czw dem ersten, das keyn befleckter adir bekryschener adir meynediger yn dy ceche abir hantwerg der goltsmide nicht zal off genomen werden, zundir her zal haben eyn erlichs vnd loebelichs lob. Alzo das her sey geporn recht vnd redlich, von erlichin fromen eldern, beyde von vatir vnd mutter, vnd doroeber zal her brengin pryfflich geczewgnis. Item her zal seyn befundin das her seynem meyster mit gehorzam fromlich vnd erberclich vnd allen andern meystern gedynet habe von anfang seyner lere bys czw dem ende als denne der czechin recht vnd gewonheit awszweyszet. Item czwene meyster vnszers hantwergs sullen getrewlich bey erer gewysset das golt vnd zylber vnd ouch dy gesmeyde, dy doraws gemacht werden, beschawen off das, das den meystern nicht eyn schade ader vngerechtikeyt, vnd dorczw der stat eyn smoheit ader schande nicht czwgeczogen ader angelegt werde. Item keyn meyster zal nicht gethorren falche gulden pessern ader vorgulden, ouch zal keyn meyster das golt kewffen, das von den gulden abgesnetin wirt. Item keyn meyster des hantwergs der goltsmit zal mit [S. 565] nichte das hantwerg obyr fyrczchen tage awszwendig der czechin arbitten. Bys her der czechin gerechtikeit irfoellet, als dy saczung vnd ordenung der czechin auszweyszin. Item keyn meyster zal mit nichte keyn golt adir zylber das gestolen ader gerawbit ist wissintlich kewffyn, sunder was gesmeyd eynem heymlich durch eynen dyp oder rawber czwgetragen wirt, das zal her durch warnung den meystern künt thwn, off das das gesmeyde nicht vorbrawcht werde, ab ys man suchin woerde. Ouch wellen wir das dy obgenanten artickel mitsamt allen andern satczung und ordenung, dy dy vorgemelten meyster yn yren pwechern haben beschriben, sterclich vnd festiclichin vnuorrucket als man sy yn andern koeniclichin steten helt, gleycher weise ouch von unszern meystern sullen gehalden werden. Dorumb wir abgenanten richter vnd gesworen purger haben lossen noch folgen dy vorgenanten clauseln, artickel ordenung, saczung der vorgemelten czechen, vnd befestigin, sterken vnd bestetigin sy off das, das dy selben ouch nw fwerttan in vnszer stat Clawszempur sterclich sullen czu ewigen czeyten behalden werden vnd dorumb zal keyn meyster ade geselle dowider nicht thwerrin gereden noch thwen. Ab den yrken meyster knech ader geselle, mit seyner oppikeyt adir aus seyner gethuerstikeyt frefflich mit worten adir mit werken wider unser saczung ader ordenung off leynen adir widirsperrin wolt, so sullen dy czechmeyster dy selben vorachter der gesatcz noch dem als den ere, gesetcz vnd ordenung awszweyst, yn eyner bequemer busse strawffen vnd, bwessen, mit vnszer crafft, gewald vnd macht, dy wir yn vorlawen haben vnd czw ewigen czeyten voleyen. Des czw eynem ewigen gedechtnis vnd sterker befestung haben wir unszern pryff mit dem anhangen grosten sygel vnszer stat den obgenanten czechmeystern der goltsmid lossen geben. Gegebin czw Claswzempurg am montag vor der heyligen czwelff boten Symonis vnd Jude tag, im dem jare als man schreybet noch Cristi vnszers herrin gepurt thawszent ffyrhundirt vnde drey vnd sebinczig jar et cetera.


a) Seitenumbruch nach Kopfregest.^{^}