Urkunde Nr. 3858 aus Band VI

Seite im UB:

490-491

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. II (Inventar 25 ), Nr. 336.

Druckvorlage:

nach Original

Abdruck als:

Volltext

Sprache:

Latein

---

3858

Ofen 1471 März 19 König Matthias verbietet allen Adligen und Grundbesitzern Siebenbürgens, Grundhörige nach Entrichtung des Grundzinses und der andern Schuldigkeiten an der Übersiedlung in das Gebiet der Sieben und Zwei Stühle zu hindern.

Von der Kanzlei: De commissione domini regis.

Mathias dei gratia rex Hungariae, Bohemiae et cetera fidelibus nostris universis et singulis nobilibus et alterius cuiusuis status possessionatis hominibus in Transsiluania ubilibet existentibus praesentes visuris salutem et gratiam. Relatum est nobis in personis fidelium nostrorum prudentum et circumspectorum virorum universorum civium civitatis nostrae Cibiniensis ac Saxonum nostrorum septem et duarum sedium Saxonicallium per modum querelae, quodlicet antiqua eorum libertate dudum eis concessa requirente, quilibet iobagio et io-[S. 491] bagionalis conditionis homo iustis terragiis et aliis suis debitis persolutis de bonis et possessionibus vestris in medium eorundem exponentium simulcum omnibus rebus et bonis suis liberam recedendi habuerit facultatem. Tamen nonnulli ex vobis non curata eorum libertate eosdem iobagiones, qui videlicet iustis terragiis et aliis debitis suis persolutis, in medium praefatorum exponentium morandi causa recedere vellent, libere abire non permitterent, in praeiudicium libertatis ipsorum exponentium atque dampnum. Unde suplicatum est nobis in personis eorundem, ut ipsis circa praemissa remedium adhiberemus opportunum. Et quia nos praefatos exponentes in eorum libertatibus contra quoslibet tenere volumus et conservare, ideo fidelitati vestrae firmiter mandamus, quatenus receptis praesentibus omnes tales vestros iobagiones, qui ut praefertur, iustis terragiis depositis ac aliis debitis eorum persolutis, in medium praefatorum exponentium morandi causa recedere voluerint, difficultate et contradictione sine omni, simulcum omnibus rebus et bonis eorum libere recedere et abire permittatis et permitti facere debeatis. Alioquin committimus et praesentibus facultatem damus fidelibus nostris magnificis wayvodis Transsiluanis eorumque vicevayvodis nunc constitutis et in futurum constituendis, ut ipsi scita prius superinde mera veritate, vos et quemlibet vestrum ad praemissa facienda seu observanda etiam per gravamina vestra in talibus fieri solita, artius compellant et astringant auctoritate nostra ipsis in hac parte attributa et iustitia mediante. Secus ergo non facturi. Praesentibus perlectis exhibenti restitutis. Datum Budae feria tertia proxima post dominicam Oculi, anno domini millesimo quadringentesimo septuagesimo primo, regni nostri anno quartodecimo, coronationis vero septimo.

Auf der Rückseite von gleichzeitiger Hand: Conductoriales iobagionum.