Urkunde Nr. 3682 aus Band VI

Seite im UB:

376-377

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Heutige Signatur:

Stadt Bistritz [Primăria Oraşului Bistriţa] (Inventar 58ff.), Nr. 72 b.

Druckvorlage:

nach Abschrift

Abdruck als:

Volltext

Sprache:

Latein

---

3682

Erlau 1469 Februar 21 König Matthias schenkt der Stadt Bistritz das Beche-Haus und den Landstrich Chyger samt allen Nutzungen.

Von der Kanzlei: Ex commissione propria domini regis.

Nos Mathias dei gratia rex Hungariae, Dalmaciae, Croaciae et cetera memoriae commendamus tenore praesentium significantes quibus expedit universis, quod nostrae maiestatis veniens in praesentiam fidelis noster et circumspectus Ladislaus, iudex civitatis nostrae Bistriciensis, in ipsius ac universorum aliorum civium et inhabitatorum dictae civitatis nostrae personis exposuit nobis hoc modo: Quomodo alias illustris quondam princeps dominus Johannes gubernator dicti regni nostri Hungariae, genitor noster carissimus, quandam domum seu fundum curiae condam Beche in dicta civitate nostra sitam, de qua scilicet domo certi census ordinarii in medium eiusdem civitatis nostrae solvere soliti fuissent, quibusdam nobilibus tali modo contulisset, ut medietatem huiusmodi censuum, qui de ipsa domo provenire deberent, iidem nobiles pro se tenerent, aliam vero medietatem in medium ipsius civitatis nostrae solvere tenerentur. Nunc autem vaivodae et vicevaivodae ac quidam nobiles partium Transsilvanarum regni nostri huiusmodi domum seu fundum curiae mediantibus literis nostris diversimode occupando nullum censum de eadem domo in medium dictae civitatis nostrae solvere curarent, propter quod dicti cives nostri, tam in solutionibus censuum ipsorum ordinariorum quam etiam in aliis rebus et negotiis ipsorum nonnulla damna et nocumenta ac molestias paterentur. Supplicavit itaque praefatus Ladislaus iudex in ipsius et dictorum aliorum civium nostrorum personis per nos ipsis superinde opportune provideri, unde nos nolentes, ut iidem de cetero ratione dictae domus damna, molestias et nocumenta quoquomodo patiantur, eandem domum simul cum cunctis suis pertinentiis, puta terra Chyger nuncupata, ac aliis terris arabilibus, cultis et incultis, agris, pratis, pascuis, fenetis et silvis in quantum ad eandem de more et ab antiquo pertinuerunt nostrae maiestati reservarique volentes et decernentes, ut a modo deinceps eandem domum iidem cives nostri, nomine nostro tenere, ac universos census et utilitates de eadem domo et de dictis pertinentiis eiusdem, ab antiquo provenire debentes, semper in medium ipsorum recipere possint et exigere valeant, immo volumus et decernimus praesentium per vigorem. Quo circa vobis fidelibus nostris magnificis vaivodae dictarum partium regni nostri Transsilvanarum vel eorum vicevaivodis cunctisque nobilibus ac alterius cuiusvis conditionis hominibus earundem partium praesentibus et futuris praesentes visuris, harum serie firmiter praecipientes mandamus, quatenus a modo deinceps nullus omnino vestrum se quoquomodo in dictam domum intromittere, aut dictos cives nostros praetextu ipsius domus impetire vel quovis modo molestare praesumat, sed praefatam domum simul cum universis suis utilitatibus et pertinentiis quibuslibet, eisdem civibus nostris libere et pacifice ac sine aliquali impedimento uti et tenere permittatis, nec secus facere praesumatis modo aliquali. Praesentibus perlectis exhibenti restitutis. Datum Agriae feria tertia proxima post dominicam Invocavit, anno domini millesimo quadringentesimo sexagesimo nono, regni nostri anno undecimo, coronationis vero quinto¹⁾.


1) Vorlage quarto. ^{^}