Urkunde Nr. 3584 aus Band VI

Seite im UB:

319-320^a)

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Druckvorlage:

nach Original

Abdruck als:

Volltext

Sprache:

Latein

---

3584

Kronstadt 1468 Januar 4 König Matthias vergibt den Bistritzern ihre Teilnahme am Aufstand. [S. 320]

Von der Kanzlei: Propria commissio domini regis.

Nos Mathias dei gratia rex Hungariae, Dalmaciae, Croaciae et cetera memoriae commendamus tenore praesentium significantes quibus expedit universis, quod nos de benignitate nostra regia qua delinquentibus¹⁾ veniam et lapsis sublevamen solemus impertiri iurisque rigorem interdum lenitate misericordiae consuevimus temperare iudici, villicis, iuratis ceterisque civibus et toti communitati civitatis nostrae Bistriciensis ac pertinentiarum eiusdem capitibus quoque rebus et bonis ipsorum universis super nota infidelitatis, quam ipsi ex eo quod cum novissime nobiles et incolae partium Transsilvanarum a fidelitate nobis iureiurando praestita in eo defecissent quod pariter cum Johanne Groff quem ad honorem vaivodatus earundem partium exhiberamus dum easdem partes regni nostri Transsilvanas intrassemus contra nos exercitualiter insurrexissent, tunc etiam ipsi cum dictis nobilibus et incolis dictarum partium Transsilvanarum contra nos animo nocendi insurrexerant ex lege regni nostri incurrerunt gratiam et misericordiam duximus facientes immo fecimus praesentium per vigorem, ita tamen quod ipsi se de cetero ab huiusmodi nota immunes studeant conservare alioquin praesens nostra gratia ipsi minime videntur suffragari. Quocirca vobis fidelibus nostris magnificis palatino et iudici curiae nostrae ac vaivodis vel vicevaivodis nostris Transsilvanis eorumque in iudicatu vicegerentibus, item comitibus vel vicecomitibus et iudicibus nobilium quorumcunque comitatuum regni nostri cunctis etiam aliis regni nostri iudicibus et iustitiariis ac universis regnicolis nostris praesentibus et futuris praesentium notitiam habituris harum serie firmiter mandamus, quatenus amodo deinceps praefato iudicem, villicos, iuratos ceterosque cives et totam communitatem dictae civitatis nostrae Bistriciensis et pertinentiarum eiusdem ratione praemissae notae ad cuiusvis instantiam intra vel extra iudicium in personis ac rebus et bonis ipsorum quibuscumque contra formam praemissae nostrae gratiae impedire, molestare, turbare aut quovismodo damnificare nusquam et nequaquam praesumatis nec sitis ausi modo aliquali. Praesentibus perlectis exhibenti restitutis. Datum Brassoviae feria secunda proxima post festum circumcisionis domini, anno eiusdem millesimo quadringentesimo sexagesimo octavo, regni nostri anno decimo, coronationis vero quarto.


a) Seitenumbruch nach Kopfregest.^{^}

1) Vorlage delinquetibus. ^{^}