Urkunde Nr. 3564 aus Band VI

Seite im UB:

307-308

Heute in:

Kronstadt, Staatsarchiv [Direcţia Judeţeană Braşov a Arhivele Naţionale ale Romȃniei]

Heutige Signatur:

Fond 1: Stadt Kronstadt [Primaria Municipiului Braşov], Privilegiensammlung (Colecţia privilegii) Nr. 177.

Druckvorlage:

nach Original

Abdruck als:

Volltext

Sprache:

Latein

---

3564

Kronstadt 1467 November 11 König Matthias bestätigt die Privilegien der Stadt Kronstadt und des Burzenlandes betreffend Zollfreiheit, Heeresdienst und Kleinhandel in Siebenbürgen.

Von der Kanzlei: Commissio domini regis.

Nos Mathias dei gratia rex Hungariae, Dalmaciae, Croaciae et cetera memoriae commendamus tenore praesentium significantes quibus expedit universis, quod nostram venientes in praesentiam fideles nostri circumspecti Petrus Viroh et Georgius Horwath, iurati cives civitatis nostrae Brassouiensis, in ipsorum ac universorum fidelium civium et hospitum eiusdem civitatis nostrae Brassouiensis et ad eandem pertinentium nominibus et in personis, nobis declararunt hoc modo, quomodo praedecessores nostri olim serenissimi reges Hungariae inter alias libertates, infrascriptis libertatum praerogativis ipsos decorassent et praeditos fecissent; supplicantes nostro culmini humiliter ut pristinam et antiquam eorum libertatem restaurantes eosdem huiusmodi libertatibus inviolabiliter et inconcusse gaudere et in eisdem gratiose dignaremur conservare. Nos igitur humillimis supplicationibus eorundem fidelium civium et hospitum nostrorum de Brasso et ad eandem spectantium per praefatos Petrum Viroh et Georgium Horwath in personis eorundem nostrae maiestati porrectis inclinati libertates eorum antiquas, ut iidem sicut numero sic fidelitate augeantur, dictis civibus et hospitibus nostris de Brasso et ad eandem pertinentibus, qui nobis et sacrae coronae regiae his novissimis diebus, dum quidam infideles nostri, incolae scilicet partium Transsilvanarum, postposita eorum fidelitate contra nos exercitualiter insurrexissent, constantes in fide promissa fidelitatem illibate observarunt, in futurum restauramus et roboramus in his scriptis quas tenore praesentium specificantes declaramus isto modo: Quod cives et incolae dictae civitatis Brassouiensis et liberarum villarum provinciae Barcensis aut aliqui eorundem in negotiationibus seu mercanciis ad partes Transalpinas euntes et ab illinc redeuntes in tributo de Therch et aliis locis tributorum seu theoloniorum in ipsa provincia Barcensi existentibus nunquam ad solutionem alicuius tributi teneantur nec sint obligati, sed prorsus a solutione tributi exempti habeantur. Praeterea si nostram maiestatem ad partes orientales personaliter exercitum ducere contingat, tunc quilibet eorum iuxta suam facultatem equester vel pedester, propria eorum in pecunia nobiscum proficisci teneantur. Si autem versus partes occidentales personaliter excercitum duxerimus, tunc quinquaginta viros agiles sicut in antiquis eorum privilegiis continetur, bene armatos et lanceatos in ipsum exercitum nostrum, ex parte communitatis eorum debebunt et tenebuntur destinare. Insuper memoratis civibus et incolis dictae civitatis Brassouiensis et terrae Barcensis ac eorum cuilibet, hanc specialis gratiae nostrae praerogativam perpetuis futuris temporibus duraturam ex certa nostra scientia ac deliberatione praelatorum et baronum nostrorum duximus faciendam, immo facimus praesentium per vigorem, ut annotati cives, hospites, mercatores, habitatores, incolae, populi et homines praedictae civitatis nostrae Brassouiensis et suarum tenutarum seu pertinentiarum pannum, telam, barhanum, sindonem et cuiusvis generis pannos cum ulnis et ad ulnam incidendo, aliasque mercancias et bona cuiuscumque speciei et maneriei existant, in civitatibus, oppidis, villis, possessionibus, terris et tenutis dictarum partium Transsiluanarum ubilibet, diebus fori et aliis quibusvis cum massa vel alio quocumque minori pondere, prout voluerint emere, vendere et com-[S. 308]mutare absque contradictione quorumlibet tutam, liberam, absolutam et omnimodam more et ad instar aliorum quorumcumque hac libertate utentium, habeant facultatem et plenam potestatem. In aliis autem permaneant secundum antiquas eorum libertates et consuetudines, in quibus nos de consilio praelatorum et baronum nostrorum ob meritum fidelitatis ipsorum eos ducemus conservandos. Ut igitur haec nostra libertatum restauratio et donatio salva semper et inconcussa permaneat, nec per quempiam valeat in irritum revocari, praesentes eisdem concessimus literas nostras privilegiales secreti sigilii nostri pendentis munimine roboratas. Datum Brassouiae in festo beati Martini episcopi et confessoris, anno domini millesimo quadringentesimo sexagesimo septimo, regni nostri anno decimo, coronationis vero quarto.

Auf der Rückseite von der Kanzlei: Regestrata folio CCXXXXII.

Auf der Rückseite gleichzeitig: Litera super priuilegiis de exercitu et teolonio in castro Tertsch.