Urkunde Nr. 398 aus Band I

Seite im UB:

368-369 ^a)

Heute in:

Vatikanstadt, Vatikanisches Archiv [Archivum Secretum Apostolicum Vaticanum, Archivio Segreto Vaticano]

Druckvorlage:

nach anderem Urkundenbuch mit Quellennachweis

Abdruck als:

Volltext

Sprache:

Latein

---

398

Avignon [1322] Dezember 23 Papst Johann XXII. beauftragt den Bischof von Olmütz, die von dem Schelker Dekanat gegen den siebenbürgischen Bischof Andreas und den Archididkon Johann erhobenen Klagen zu untersuchen.

Johannes episcopus servus servorum dei venerabili fratri . .²⁾ episcopo Olomucensi salutem et apostolicam benedictionem. Veniens ad apostolicam sedem dilectus filius Georgius plebanus ecclesiae villae Dominarum pro se et procuratorio nomine dilectorum filiorum decani decanatus de Schelk ac rectorum ecclesiarum in ipso decanatu consistentium Albensis diocesis nobis conquerendo monstravit, quod venerabilis frater noster Andreas episcopus et Johannes archidiaconus Albenses eos in personis et rebus ac iuribus ecclesiarum suarum multipliciter aggravant, opprimunt et molestant, nonnullos eorum absque causa rationabili capiendo, quosdam fugando et alios suis ecclesiis sine omni causae cognitione privando suisque bonis tam in morte quam in vita totaliter spoliando, adeo quod nonnulli eorum mendicare [S. 369] coguntur in ordinis presbyterialis opprobrium et scandalum plurimorum. Praeter haec graves eis servitutes imponunt et alia intollerabilia onera contra ecclesiasticam libertatem, praefatis episcopo medietatem et archidiacono tertiam decimarum, quae de antiqua consuetudine in illis partibus observata ad praefatos rectores pertinere dicuntur, sibi per violentiam usurpando. Rursus cum eos visitant, in septuaginta evectionibus episcopus et triginta archidiaconus ipsos gravant ab eis pecuniam exigendo, quamquam ecclesiarum ipsarum, quae adhuc sunt novella plantatio, super hiis non suppetant facultates. Ab eis etiam pro suis institutionibus pecuniam exigunt et extorquent per simoniacam pravitatem et alias eos adeo multipliciter opprimunt et affligunt, quod vix eorum aliquis in ecclesiis dictae diocesis remaneret¹⁾, nisi ipsos sui parochiani laici tuerentur. Et si quando a gravaminibus per episcopum vel archidiaconum praedictos illatis a dictis decano seu rectoribus ad sedem apostolicam appellari contingat, appellantes eosdem quantumcumque legitime diris carceribus mancipant, instrumenta appellationum suarum violenter auferunt ab eisdem huiusmodi eorum appellationibus sive in causis criminalibus sive civilibus interiectis minime defendendo. Adiiciens idem plebanus, quod ipse cum metu et terrore pro se et aliis praenominatis appellans, cum per episcopum et archidiaconum praedictos ad impediendum iter eius ad sedem praedictam in diversis locis fuissent insidiae praeparatae, recto tramite declinato ac transformato habitu, ne ab huiusmodi insidiatoribus cognitus haberetur, ad dictam sedem per terras infidelium fuit profectus. Quare praefatus plebanus nomine suo et aliorum praenominatorum, quorum procurator existit, nobis humiliter supplicavit, ut providere ipsis super praemissis de oportuno remedio dignaremur. Nos igitur attendentes, quod si praemissa veritate nitantur, limam celeris et opportunae correctionis exposcunt, cum talia non sit dubium in dictorum episcopi et archidiaconi salutis et famae dispendium vergere et in multarum animarum perniciem redundare, fraternitati tuae de qua plenam in domino fiduciam gerimus in virtute obedientiae districte praecipiendo mandamus²⁾, quatenus de praemissis omnibus et singulis inquiras diligentius veritatem et quaecumque super hiis inveneris fideliter in scriptis redacta nobis sub sigillo tuo destinare procures. Et si forte per inquisitionem huiusmodi praemissa repereris ita esse, praefatos episcopum et archidiaconum ex parte nostra peremptorie citare procures, ut infra trium mensium spatium post citationem huiusmodi legitime compareant in Romana curia coram nobis facturi super hiis et recepturi, quod iustitia suadebit. Diem vero huiusmodi citationis et formam et quidquid super hiis duxeris faciendum nobis per tuas literas harum seriem continentes vel per instrumentum publicum studeas fideliter intimare. Datum Avinione, X. Kalendas Januarii, anno septimo. [S. 370]


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 2 auf S. 368 (1 zu voranstehender Urkunde), 1-2 auf S. 369.^{^}
[S. 368]
2) Conradus.^{^}
[S. 369]
1) Vorlage: remanent.^{^}
2) Vorlage: monemus.^{^}