Urkunde Nr. 3553 aus Band VI

Seite im UB:

299-300

Druckvorlage:

nach Original

Abdruck als:

Volltext

Sprache:

Latein

---

3553

Hermannstadt 1467 Oktober 19 König Matthias gewährt den Sachsen der Zwei Stühle für ihre Teilnahme am Aufstand Verzeihung.

Von der Kanzlei: Propria commissio domini regis.

Nos Mathias dei gratia rex Hungariae, Dalmaciae, Croaciae memoriae commendamus tenore praesentium significantes quibus expedit universis, quod pro parte et in personis prudentum et circumspectorum universorum Saxonum nostrorum in duabus sedibus Megyes et Seelk vocatis commorantium nostrae declaratum est maiestati in hunc modum. Quod cum in his temporibus proxime praeteritis Johannes Groff, qui honore waivodatus Transsilvanensis fungebatur, una cum nobilibus et incolis partium regni nostri Transsilvanarum fidei et honoris ipsorum oblitis, a fidelitate nobis et sacrae coronae dicti regni nostri Hungariae sub praestito¹⁾ iuramento promissa defecissent, tunc idem Johannes eosdem contra nos insurgere compulisset qui licet tandem compulsi insurrexissent. Tamen prout ex testimoniis veridicis comperimus, iidem nobis nocere noluerunt. Propterea supplicatum extitit maiestati nostrae in personis eorundem, ut nos si aliquem gravem animum hoc praetextu contra eos haberemus ab eisdem removeremus. Unde nos tum supplicationibus praefatis inclinati tum vero quia coacti et compulsi penes ipsum Johannem Groff insurrexerunt, omnem animi nostri gravedinem, si quam fortassis propterea contra ipsos habuissemus removentes eisdem, capitibus quoque rebus et bonis ipsorum quibusvis superinde gratiam fecimus et facimus praesentium per vigorem, ita videlicet, quod nemo hominum temporum in successu eis hoc obiicere possit. Quocirca vobis fidelibus nostris universis et singulis iudicibus [S. 300] et iusticiariis, ecclesiasticis videlicet et saecularibus, item magnificis vaivodis vel vicevaivodis dictarum partium regni nostri Transsilvanarum cunctisque aliis cuiusvis status et conditionis nominibus necnon regnicolis nostris praesentibus et futuris praesentium notitiam habituris harum serie firmissime mandamus, quatenus a modo in posterum praefatos Saxones nostros, tam maiores quam minores, in dictis duabus sedibus commorantes occasione praemissorum intra vel extra iudicium in personis rebusque et bonis eorum quibuscumque impedire, turbare, seu quovismodo damnificare nullalenus praesumatis nec sitis ausi modo aliquali. Praesentibus perlectis exhibentibus restitutis. Datum in civitate nostra Cibiniensi feria secunda proxima post festum beati Lucae evangelistae, anno domini millesimo quadringentesimo sexagesimo septimo, regni nostri anno decimo, coronationis vero quarto.


1) Vorlage praestitito.^{^}