Urkunde Nr. 3550 aus Band VI

Seite im UB:

297-298

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Heutige Signatur:

Stadt Klausenburg [Primăria Oraşului Cluj] (Inventar 1ff.), Priv. V Nr. 24.

Druckvorlage:

nach Einschaltung (Insert)

Abdruck als:

Volltext

Sprache:

Latein

---

3550

Klausenburg 1467 September 22 König Matthias befreit den Klausenburger Stephan Kolb und seine Erben von allen Steuern und Abgaben nach seinem in der Altstadt gelegenen Steinhaus, dem Geburtshaus des Königs.

Mathias dei gratia rex Hungariae, Dalmaciae, Croaciae et cetera. Regiam decet maiestatem domum et locum nativitatis suae gratiis, favoribus et libertatibus providere, ab aliorumque domibus et curiis in solutione censuum sequestrare. Proinde ad universorum notitiam harum serie volumus pervenire, quod nos cum ad humilime supplicationis instantiam nonnullorum fidelium nostrorum per eos pro parte fidelis nostri circumspecti Stephani Kolb, civis civitatis nostrae Coloswar, nostrae maiestati propterea oblatae, tum etiam attentis et consideratis fidelibus obsequiis quondam Jacobi Mehffi, socri videlicet ipsius Stephani, per eum serenitati nostrae iuxta suae possibilitatis exigentiam laudabiliter exhibitis et impensis. Volentes huiusmodi suorum meritorum intuitu ipsum aliquo nostro favore prosequi gratioso, quendam fundum curiae seu domum ipsius lapideam in veteri castro Coloswar ex opposito novae civitatis sitam et habitam, cui ab orientali quaedam platea per quam itur ad claustrum beatae Mariae virginis in eidem veteri castro habitum ab occidentali vero domus Anthonii Veres contigue vicinari dicuntur, et in qua idem Stephanus Kolb residentiam facit, ad praesens personalem simulcum cunctis suis utilitatibus et pertinentiis quibuslibet utputa vineis, [S. 298] agris, pratis, terris arabilibus et generaliter quarumbilet utilitalum integritatibus quovis nominis vocabulo vocitatis ad ipsum fundum curiae sive domum spectantibus, nec non eundem Stephanum Kolb et dominam Ursulam consortem eiusdem ac Margaretham filias videlicet dicti quondam Jacobi Mehffi cunctosque heredes et posteritates ipsorum ab omnibus censibus, datiis, collectis, taxis, exactionibus, contributionibus el quibuscumque solutionibus ac muneribus sive servitiis, tam ordinariis quam extraordinariis, consuetis vel inconsuetis, qui et quae ex parte dicti fundi curiae sive domus ipsiusque Stephani Kolb ac Ursulae consortis suae et Margarethae nec non heredum eorundem serenitati nostrae deberent et possent proveniri, penitus et per omnia ex certa serenitatis nostrae scientia et animo deliberato duximus supportandas, dempto tributo fisci nostri regalis, et penitus absolvendas. Immo supportamus, eliberamus, eximimus, segregamus et absolvimus perpetuis futuris temporibus praesentium pro vigorem nec interposita declaratione: Quod quicquid de illo fundo curiae vel domo praemissis pro annuali censu vel taxa ordinaria seu extraordinaria quoquomodo deberent vel possent serenitati nostrae provenire, iuxta veram et consuetam ac debitam limitationem ab antiquo more civitatis nostrae observatam id in summa principali seu capitali nobis de dicta civitate nostra Coloswar provenire consueto ad rationem nostrae serenitatis volumus et decrevimus defalcari. Quocirca vobis fidelibus nostris iudici et iuratis civibus dictae civitatis nostrae Coloswar praesentibus et futuris ac aliis quibuscumque collectoribus et exactoribus praedictorum censuum vel collectarum aut taxarum seu quarumcumque contributionum per nos vel successores nostros reges Hungariae illuc deputandis, cuiusque status et conditionis existant, firmiter committimus et mandamus, quatenus a modo deinceps praefatum Stephanum ac Ursulam consortem et Margaretham filias dicti quondam Jacobi Mehffi ipsorumque heredes et posteritates universos a solutione et contributione quorumcumque censuum, collectarum, taxarum et exactionum seu etiam serviturum de dicto fundo curiae ac utilitatibus suis praedictis qualitercumque faciendis contra formam praemissae nostrae exemptionis et libertationis astringere seu artare aut ea ratione impedire, molestare, aggravare, vel dampnificare nusquam et nequaquam praesumatis nec sitis ausi modo aliquali, gratiae nostrae sub obtentu. Praesentes post earum lecturam semper reddi iubemus praesentanti. Quas sigillo nostro secreto, quo ut rex Hungariae utimur, impendenti fecimus communiri. Datum in Coloswar in profesto beati Michaelis archangeli, anno domini millesimo quadringetesimo sexagesimo septimo, regni autem nostri anno decimo, coronationis vero quarto.