Urkunde Nr. 3378 aus Band VI

Seite im UB:

183-184

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Heutige Signatur:

Stadt Bistritz [Primăria Oraşului Bistriţa] (Inventar 58ff.), Urkunden Nr. 60.

Druckvorlage:

nach Original

Abdruck als:

Volltext

Sprache:

Latein

---

3378

1464 Juni 4 König Matthias tritt die Burg von Bistritz für 6000 Goldgulden der Stadt unter der Bedingung ab, dass sie nicht abgetragen wird.

[S. 184] Von den Kanzlei: Commissio propria regis.

Nos Mathias dei gratia Hungariae, Dalmasiae, Croaciae, Ramae, Serviae, Galliciae, Lodomeriae, Comaniae, Bulgariaeque rex memoriae commendamus tenore praesentium significantes quibus expedit universis quod cum alias quondam serenissimus princeps dominus Ladislaus rex Hungariae praedecessor noster illustrem quondam dominum Johannem de Hwniad et cetera genitorem nostrum in comitem Bistriciensem praefecisset comitatumque Bistriciensem simul cum civitate similiter Bistriciensi ac suis pertinentiis sibi perpetue donasset ipse quondam Johannes genitor noster prope eandem civitatem Bistriciensem pro honore comitatus praedicti castrum aedificavit. Verum quia ex eo castro per castellanos in illo per successum temporis constitutos civibus et comunitati dictae civitatis ac pertinentiarum eius contra eorum libertates varia impedimenta illata sunt, propter quod ipsa civitas nostra et pertinentiae ipsius civitatis in desolationem non modicum devenerunt. Unde etiam querelae dictorum civium et communitatis ad nostram maiestatem et prius et nunc per medium circumspecti Ladislai Korlath iurati civis praetacti civitatis nostrae Bistriciensis pervenerunt. Ideo nos consideratis fidelitatibus et fidelium servitiorum meritis praefatorum civium et communitatis quibus ipsi dicto quondam domino genitori nostro atque ipso decedente maiestati nostrae in multis rebus arduis sicut in prosperis ita et adversis secum omni constantia studuerunt acceptos reddere tum eo respectu tum vero, ut ipsa civitas nostra Bistriciensis et pertinentiae eiusdem ab impedimentis castellanorum nostrorum releventur atque quo magis eorum libertate gaudebunt eo diligentius et numero augeatur et in statu meliori restauraretur. Attendentes etiam quod memorati cives et communitas volentes eorum vexationem redimere maiestati nostrae pro praesenti necessitate regni nostri sex milia florenorum auri assignaverunt dictum castrum nostrum Bistriciensem sine pertinentiis suis solummodo scilicet aedificia et muros ipsius castri eisdem civibus et communitati civitatis nostrae Bistriciensis et eius pertinentiarum eorumque successoribus universis de manibus nostris regis dedimus, donavimus et contulimus, immo damus, donamus et conferimus iure perpetuo et irrevocabiliter possidendum, tenendum pariter et habendum. Ita tamen ut idem cives et communitas praefactum castrum non demoliantur nec rumpant muros eius sed teneant pro honore nostro et pro defensione incolarum terrae illius succesivisque temporibus necessariis aedificiis renovare et construere teneantur. In cuius rei memoriam firmitatemque perpetuam praesentes literas nostras pendentis autentici sigilii nostri duplicis munimine roboratas eisdem duximus concedendas. Datum per manus reverendissimi in Christo patris domini Stephani ecclesiarum Colociensis et Bachiensis archiepiscopi aulae nostrae summi cancellarii fidelis nostri dilecti, anno domini millesimo quadringentesimo sexagesimo quarto, pridie nonas Junii, regni nostri anno septimo, coronationis vero primo.

Rechts: von der Kanzei: Jo. Q.

Unten: von der Kanzlei: Lecta.