Urkunde Nr. 3284 aus Band VI

Seite im UB:

121

Heute in:

Budapest, Ungarisches Landesarchiv [Magyar Országos Levéltár]

Heutige Signatur:

DL (Diplomatikai Léveltár) Nr. 15 762.

Druckvorlage:

nach Original

Abdruck als:

Volltext

Sprache:

Latein

---

3284

Segedin 1462 August 12 König Matthias teilt den Sieben Stühlen mit, dass für die Rückgewinnung der heiligen Krone eine ausserordentliche Abgabe von einem Goldgulden je Mann ausgeworfen und mit deren Einhebung in Siebenbürgen Johann Gereb von Weingartskirchen betraut wurde.

Von der Kanzlei: Commissio propria domini regis.

Mathias dei gratia rex Hungariae, Dalmaciae, Croaciae fidelibus nostris prudentibus et circumspectis universis et singulis septem sedium Saxonicalium Saxonibus partium nostrarum Transsilvanarum demptis civitatibus nostris Cibinium, Zazsebes et Segeswar salutem et gratiam. Iam inter maiestatem nostram et dominum Fridericum Romanorum imperatorem in facto restitutionis sacrae coronae dicti regni nostri certi tractatus intercesserant magnaque et notabilis summa pecuniae pro redemptione eiusdem sacrae coronae persolvi debebit ad quam summam complendam omnes subditi nostri tam maiores quam minores necnon etiam omnes civitates in hoc regno notabiliter contribuerint. Quia vero factum redemptionis ipsius sacrae coronae etiam vos, qui de membro huius regni nostri estis utilitatemque et publicum bonum status vestri per maxime concernit, ob hacque et vos ad huiusmodi redemptionem faciendam necessario contribuere tenemini. Misimus igitur ad illas partes Transsilvanas dicti regni nostri hunc fidelem nostrum egregium Johannem Gereb de Vingarth, ut ipse ad vos et in medium vestri in subsidium redemptionis dicti sacrae coronae nostrae ac recuperationis metarum dicti regni nostri contributionem quandam pecuniarum ut puta ad singulum vestrum singulum unum florenum auri citissime persolvendum imponat. Quam ob rem fidelitati vestrae firmissime praecipiendo mandamus sic omnino habere volentes, quatenus statim et in continenti visis praesentibus nullis aliis literis nostris superinde expectatis occasioneque et dilatione quibusvis semotis huiusmodi contributionem unius floreni auri praefato Johanni Gereb ad singulum vestrum imponere permittere habitaque impositione celeriter et sine ullo defectu de medio vestri exigere permittere et relaxare debeatis nec propter huiusmodi contributionem aut aliquam relaxationem de ea ad maiestatem nostram veniatis aut mittatis, quoniam si veneritis vel mittetis vos expensas laboresque et fatigas frustra facietis. Nos enim de ea contributione vos nullam relaxationem faciemus. Commisimus etiam et praesentibus strictius committimus fidelibus nostris magnifico Johanni Pangracz de Dengeleg vaivodae illarum partium et comiti Siculorum nostrorum necnon praefato Johanni Gereb, ut ipsi vos et quemlibet vestrum ad exolutionem huiusmodi contributionis per omnia opportuna remedia ac etiam gravamina vestra arctius compellant et astringant auctoritate nostra praesentibus vobis in hac parte attributa mediante. Secus ergo non facturi. Praesentibus perlectis exhibenti restitutis. Datum Zegedini feria quinta proxima post festum beati Laurentii martyris, anno domini millesimo quadringentesimo sexagesimo secundo.