Urkunde Nr. 3083 aus Band V

Seite im UB:

574-575

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Druckvorlage:

nach Original

Abdruck als:

Volltext

Sprache:

Latein

---

3083

Wien 1457 August 25 König Ladislaus verbietet allen Gerichtsinhabern des Reiches, reisende Klausenburger vor ihr Gericht zu ziehen.

Von der Kanzlei: Commissio propria domini regis.

Ladislaus dei gratia Hungariae, Bohemiae, Dalmaciae, Croaciae et cetera rex Austriaeque et Stiriae dux necnon marchio Morauiae et cetera fidelibus nostris universis et singulis praelatis, baronibus, comitibus, castellanis, nobilibus ipsorumque officilibus item civitatibus, oppidis et liberis villis ipsarumque rectoribus iudicibus et villicis cunctis etiam aliis possessionatis hominibus salutem et gratiam. Querelam fidelium nostrorum certorum civium civitatis nostrae Koloswar in persona universorum civium populorum et incolarum in eadem commorantium nobis allatam non sine taedio accepimus continentem¹⁾, quomodo nonnulli forent ex vobis, qui antiquis libertatibus eorum ipsis per divos reges Hungariae felicis reminiscentiae nostros scilicet praedecessores gratiose datis et concessis per nosque confirmatis non curatis ab ipsis contra huiusmodi libertates in suis tenutis et possessionibus tributa exigere niterentur eosdemque ad quorumvis instantiam arestarent et ipsorum astare iudicio compellerent in praeiudicium libertatis eorundem de quo iam ipsi non parva sustinuissent damna. Verum²⁾ quia nos eosdem cives, populos et inhabitatores civitatis praedictae omnino in hiisdem libertatibus et consuetudinibus quibus hactenus usi sunt indemniter volumus conservare, ideo fidelitati universitatis vestrae et vestrum cuiuslibet strictissime praecipiendo committimus et mandamus sic omnino habere volentes, quatenus visis praesentibus a modo imposterum praefatos cives et inhabitatores civitatis nostrae praedictae aut aliquem ex ipsis dum et quando eosdem ad vestras tenutas et possessiones aut vestri in medium pervenire contingat absque aliquali solutione vel exactione tributi aut theolonii vel alterius cuiuscumque solutionis libere et pacifice ire transire et redire permittatis per vestrosque permitti faciatis ipsosque ad cuiusvis instantiam arestare vel suo astare iudicatui nequaquam et nullo modo compellere et astringere audeatis gratiae nostrae sub obtentu. Nam si quippiam actionis vel questionis contra praefatos cives aut aliquem ex ipsis habent vel habere sperant, id coram iudice et iuratis civibus civitatis nostrae praedictae iuridice prosequantur ex parte quorum plena administrabitur satisfactio nam si secus factum fuerit quod non credimus, commisimus et serie praesentium committimus fidelibus nostris vaivodis vel vicevaivodis partium nostrarum Transsiluanarum necnon comitibus vel vicecomitibus et iudicibus nobilium illius comitatus in quo fortassis huiusmodi mandata nostra non observarent, ut ipsi vos et quemlibet vestrum ad effective observandum, praescripta mandata nostra per opportuna remedia ac etiam si fuerit cum gravaminibus vestris in talibus observari solitis compellant et astringant auctoritate nostra regia praesentibus ipsis per nos specialiter in hac parte concessa et iustitia [S. 575] mediante. Secus igitur non facturi. Praesentibus perlectis exhibenti restitutis. Datum Wiennae feria quinta proxima post festum beati Bartholomei apostoli anno domini millesimo quadringentesimo quinquagesimo septimo, regnorum autem nostrorum anno Hungariae et cetera decimo octavo, Bohemiae vero quarto.

Links unten von der Kanzlei: Lecta.


1) cont auf Rasur.^{^}
2) Auf Rasur.^{^}