Urkunde Nr. 2959 aus Band V

Seite im UB:

483-486

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkunden des Burzenländer Kapitels [Capitlul evanghelic CA Ţara Bârsei] (Inventar 459), Nr. 29.

Druckvorlage:

nach Original

Abdruck als:

Volltext

Sprache:

Latein

---

2959

Hermannstadt 1455 Februar 8 Die öffentlichen Notare Eobanus Cleynsmit und Urbanus Petri von Steinau bezeugen die schiedsrichterliche Entscheidung in der zwischen Nikolaus von Tartlau, Pfarrer von Brenndorf, und der Brenndorfer Kommunität schwebenden Angelegenheit.

In nomine domini amen. Anno a nativitate eiusdem millesimo quadringentesimo quinquagesimo quinto, indictione tertia, pontificatus sanctissimi in Christo patris et domini nostri domini Nicolai divina providentia papae quinti, anno eius octavo, die vero Saturni, octava mensis Februarii, hora sexta vel quasi, Cibinii Strigoniensis iurisdictionis, in dote ecclesiae parrochialis beatissimae virginis Mariae ac in stubella venerabilis et egregii viri domini Anthonii decretorum doctoris, necnon veri pastoris ecclesiae praedictae Cibiniensis, nostrorumque notariorum infrascriptorum praesentia, venerabilis et egregius vir dominus Ffridericus Pyberstain decretorum doctor et cetera verus et legitimus procurator honorabilis et discreti viri domini Nicolai de Tartalaw, plebani ecclesiae sancti Nicolai in Bringendorff, dictae Strigoniensis iurisdictionis ab una et discretus Seruatius, concivis Coronensis, legitimus procurator villanorum ac totius communitatis de Bringendorff actorum et adversariorum dicti domini Nicolai, de et super privatione dictae suae plebaniae in Bringendorff, partibus ex altera personaliter constituti, se non coactos non compulsos nec vi, dolo, fraude aut metu inductos aut circumventos confitentes, ac plenam et omnimodam potestatem suarum partium et constituentium in dicta causa sive causis nihil reservato habentes, eandem causam seu causas, controversiam et omnia iura, dictis eorum constituentibus pro utraque parte competentia, ad manus venerabilium et circumspectorum virorum, domini Anthonii decretorum doctoris necnon plebani antedictae ecclesiae Cibiniensis, domini Valentini plebani in Schellenbergk ac decani venerandi capituli Cibiniensis, domini Jacobi alias magistri civium Cibiniensium et domini Johannis Breyde iurati consulis ac vitrici dictae ecclesiae Cibiniensis, tamquam arbitratorum et amicabilium compositorum necnon in manus venerabilis viri domini Erasmi decretorum licentiati antecedenter in dicta causa et causis iudicis existentis tamquam dictorum dominorum arbitratorum et amicabilium expositorum superinten-[S. 484] dentis, in praefata causa et causis electorum, libera ac spontanea deliberatione et voluntate tradiderunt ac omnimode resignarunt¹⁾ mandataque procuratorior u m suorum ibidem deposuerunt. Supplicantes dictis dominis arbitratoribus et amicabilibus compositoribus, ut eandem causam sive causas complanare necnon concordiam plenariam in eadem vel eisdem causa dei et iustitiae facere dignarentur, promittentes stipulatione manuali solemni sub iuramento et fide data omnia et singula per supradictos dominos arbitratores et amicabiles compositores in praefata causa seu causis arbitrata seu arbitranda, declarata vel declaranda, pronuntiata ac pronuntianda compositaque et componenda firma, rata et grata habere et inviolabiliter perpetue servare. Unde dicti domini arbitratores et amicabiles compositores petitionibus praedictorum procuratorum tamquam rationi consonis favorabiliter annuentes, attendentes etiam quam plura mala errores et scandala nephandissima de cetero oriri potuissent, dictam causam et controversiam tamquam arbitratores et amicabiles compositores susceperunt, concordarunt et omnem discordiam inter dictas partes in praefata causa seu causis exortam complanarunt ac omnimode deposuerunt, necnon in formam et poenam subscriptas ut sequitur inviolabiliter perpetue servandam decreverunt et pronuntiarunt; videlicet primo et ante omnia volumus, concludimus, approbamus, ratificamus et pronuntiamus, quod Servatius presbiter²⁾ in dicta discordia intrusus propter canonicam repugnantiam³⁾ legitime obstantem de eadem parochia penitus excludatur, sic quam nulla conditione attemtanda directa vel indirecta qua vel quibuscumque censeantur nominibus appellari. De cetero eandem ecclesiam parochialem sancti Nicolai in Bringendorff nullatenus habeat nec possit quoquomodo occupare seu vendicare. Deinde eodem modo concludimus, quod seniores communitatis de Bringendorff debeant et habeant temporibus vitae dicti domini Nicolai eligere et locare presbiterum quemcumque voluerint, dictam suam ecclesiam in Bringendorff loco sui regentem, quem infra quindenam ab insinuatione praesentium nulla dilatione prorogante eligant et constituant. Qui sic electus et ibidem constitutus teneatur et obligatur dicto domino Nicolao vel suo legitimo procuratori ad hoc deputato vel deputando annuatim et singulis annis semper secunda die mensis Julii triginta sex florenos Ungricales sine omni dilatione integraliter et absque defectu sub poena dupli deponere et persolvere. Exinde similiter declaramus frumenta decimarum anno domini millesimo quadringentesimo quinquagesimo secundo congregata per antedictum dominum Nicolaum et in recessu suo videlicet prima die mensis Octobris anni domini millesimi quadringentesimi quinquagesimi tertii ibidem in horreo dictae suae plebaniae in Bringendorff dimissa in usus expensarum in dote et circa ecclesiam factarum omnimodo esse tradita et consumpta. De decimis vero collectis anno domini millesimo quadringentesimo quinquagesimo tertio sententiam dominorum capituli Brassouiensis approbamus et confirmamus. De decimis autem anno domini millesimo quadringentesimo quinquagesimo quarto congregatis et de mandato domini nostri archiepiscopi in sequestrum repositis volumus et concludimus ipso praefato domino Nicolao triginta sex florenos Ungaricales dari omni dilatione postposita integraliter et persolvi ceterosque florenos de eisdem decimis superremanentes in usus expensarum per dictos laycos de Bringendorff in eadem causa factorum converti et dispendi. Deinde declaramus omnia et singula vasa lignea⁴⁾, mensas et scamna circa curiam dictae plebaniae remanere. Etiam decernimus antefato domino Nicolao omnia sua vestimenta ac clinodia videlicet lectos, caldaria, pulvinaria, linteamina, scutellas, stanneas cum omnibus aliis rebus utensilibus et suppellectibus quibuscumque nominibus censeantur absque dilatione integraliter restitui. Sed in quantum idem dominus Nicolaus de alienatione librorum praedictae suae ecclesiae in Bringendorff publice coram nobis fuerit inculpatus et accusatus, se canonice expurgavit, de cuius expurgatione canonica praedic-[S. 485] tam communitatem in Bringendorff velimus esse contentam necnon ipsum dominum Nicolaum quitum reddimus ab impetitione huiusmodi penitus et absolutum. Insuper concludimus et ordinamus, ut dictus dominus Nicolaus habeat liberam et omnimodam potestatem et auctoritatem sua debita repetendi et recuperandi, non obstantibus contradictionibus quibuscumque et quod ab omnibus suis debitoribus ibidem et in omni loco degentibus de quibuscumque debitis sine mora ac omni dilatione postergata irremissibiliter et integraliter persolvatur. Pro finali vero conclusione ratificamus volumus et concludimus, ut in praescriptis omnibus et singulis sic ut praemittitur per nos arbitratis, nulla sit nec fiat exhorbitatio seu aliqua recusatio aut transgressio, formis et modis canonicis vel aliis qualitercumque a partibus supradictis seu etiam quibuscumque aliis in dicta causa sive causis involutus vel involuendis, sub poena privationis et amissionis totius causae et omnium iurium praemissam causam seu causas irrecuperabiliter concernentium. Super quibus omnibus et singulis praelibati domini procuratores praedictarum partium nos infrascriptos notarios publicos debita cum instantia requisierunt ut ipsis de praedictis arbitratis, pronuntiatis et declaratis aliisque omnibus et singulis sic ut praemittitur factis unum vel plura publicum seu publica, tot quot forent necessaria et oportuna sigillisque dictorum dominorum arbitratorum ac ipsius domini superintendentis necnon procuratorum praedictorum in maiorem evidentiam et firmitatem appendentibus roboratum vel roborata confiteremus instrumentum seu instrumenta. Acta sunt haec anno, indictione, pontifice, die, mense, hora et locis quibus supra. Praesentibus ibidem honorabilibus et discretis viris domino Michaele de Nadast praedicatore Cibiniensi, domino Petro Bust, domino, Bartholomeo de Kyszt, domino Gregorio de Mayerpott presbiteris Transsiluanensis et Strigoniensis dyocesis necnon capellanis dictae ecclesiae beatae Mariae virginis Cibiniensis, testibus fide dignis ad praemissa in eorum veritatis testimonium vocatis specialiter et rogatis.

1. Notarzeichen: Et ego Eobanus Cleynsmit clericus Maguntinensis dyocesis publicus sacra imperiali auctoritate notarius et tabellio iuratus, quia praedictis causae seu causarum et controversiae huiusmodi in manus supradictorum dominorum abbitratorum et amicabilium compositorum ac praefacti domini superintendentis resignationi ipsorumque electioni et potestatis plenariae traditioni et susceptioni necnon suprascriptae concordiae per eosdem dominos arbitratores, sic ut praemittitur factae sub praedicta poena pronuntiationi, lectioni et ab ipsis partibus seu procuratoribus ratihabitioni omnibusque aliis et singulis praemissis dum sic fierent et agerentur, unacum praenominatis testibus praesens interfui, eaque sic fieri vidi et audivi. Idcirco hoc praesens publicum instrumentum mediante infrascripto notario publico exinde confeci manu mea propria scripsi et subscripsi ac in hanc publicam formam redegi, signoque et nomine meis solitis et consuetis unacum infrascripti notarii publici similiter ad haec requisiti subscriptione et consignatione⁵⁾, necnon praedictorum dominorum arbitratorum ac praefati domini superintendentis et procuratorum antedictorum sigillorum appensionibus consignavi⁶⁾ in fidem omnium et singulorum praemissorum rogatus specialiter et requisitus.

2. Notarzeichen. Et ego Urbanus Petir de Stynauia clericus Wratislauiensis dyocesis publicus sacris papali ac imperiali auctoritatibus notarius, quia praedictis causae seu causarum controversiae huiusmodi in manus supradictorum duorum arbitratorum et amicabilium compositorum ac praefati domini superindendentis resignationi ipsorumque electioni et potestatis plenariae traditioni et susceptioni necnon suprascriptae concordiae per eosdem dominos arbitratores sic ut praemittitur factae sub expressata poena pronuntiationi, lectioni et declarationi et ab ipsis partibus seu eorundem partium procuratoribus ratihabitioni omnibusque aliis et singulis praemissis dum sic fierent et agerentur [S. 486] unacum praenominatis testibus praesens fui, eaque sic fieri vidi et audivi. Ideo hoc praesens publicum instrumentum mediante suprascripto notario publico confeci et per manum iam suprascripti publici scriptum hic vero mea propria manu subscripsi et in hanc publicam formam redegi signoque et nomine meis solitis et consuetis unacum praescripto notario publico similiter ad haec requisito subscriptione et consignatione consignavi, necnon praedictorum dominorum arbitratorum ac praelibiti domini superintendentis ac procuratorum antedictorum sigillorum sub appensionibus roboratum in fidem et testimonium omnium et singulorum praemissorum rogatus specialiter et requisitus.


1) Vorlage resignarunt.^{^}
2) Vorlage prisbiter.^{^}
3) Vorlage repungnantiam.^{^}
4) Vorlage lingnea.^{^}
5) Vorlage consingnatione. ^{^}
6) Vorlage consingnavi. ^{^}