Urkunde Nr. 2901 aus Band V

Seite im UB:

437-438

Heute in:

Kronstadt, Staatsarchiv [Direcţia Judeţeană Braşov a Arhivele Naţionale ale Romȃniei]

Heutige Signatur:

Fond 1: Stadt Kronstadt [Primaria Municipiului Braşov], Sammlung Schnell II, Nr. 12.

Druckvorlage:

nach Original

Abdruck als:

Volltext

Sprache:

Latein

---

2901

Wien 1454 März 17 Der Kronstädter Gesandte Pfarrer Johannes Rewdel berichtet dem Stadtrat u.a. Neuigkeiten über die Lage des Königs in Prag, über die feindselige Einstellung des Gubernators zu den Sachsen und empfiehlt der Stadt volle Wachsamkeit.

Amicabili salutatione cum orationibus¹⁾ devotis sedulae praemissis. Circumspecti ac honorabiles viri necnon fautores mihi sincere dilecti. Noveritis per notitiam praesentium me deo concedente prima dominica quadragesimae²⁾ quasi hora meridiei Wyennam pervenisse cum bona corporis sospitate et etiam rerum mearum prosperitate licet magno cum timore propter diversa latrocinia in Austria exorta circumquaque ita ut nemo ad distantiam unius medii miliaris ab urbe Wyennensi securus ire possit nisi potenter cum multitudine ambularet. Ibi enim me existente secunda feria Petrus cancellarius domini gubernatoris veniens de Praga ad hospitium meum novitates mihi plures secreto revelavit, primo de serenissimo principe rege Ladislao, quomodo destitutus omni solatio Tewtonicorum et Vngarorum in Praga quasi peregrinus in exilio reclusus et detentus existeret, ita ut nunc nullus dominorum tam de ducatu Austriae quam etiam de regno Ungariae secum esset et sigillum inclusum in una ladula et sigillo munita iaceret. Insuper, quomodo ipsi Bohemi cum tanta cautela et industria ipsum custodirent tam in civitate Pragensi quam etiam in campis, ut nulla excogitationis via ipsis exire possit et ut ad omnes vias magnam ponerent custodiam et ut difficulter additus Vngarorum et Almanorum ad suam serenitatem haberi possit. Immo referre mihi habuit ut dixisset fiendo ad eum videlicet essemus adhuc in captivitate patrii nostri imperatoris, quomodo hic aput istos hereticos ita turpiter detenti quod timendum est ex hiis omnibus, ut idem insane habuit, quod in multo temporis spatio de Boemia non exibit et haec dispositio per quosdam traditores Almanos ut percepi ordinata in favorem imperatoris Friderici extitit. Demum a me interrogavit idem Petrus in secreto, quare nuncii Saxonum et Siculorum non venissent ad conquerendum domino regi super gubernatore prout in colloquio generali in Torda dispositum fuisset super qua re eidem respondere non potui nisi excu-[S. 438] sare vos et alios quantum melius valui. Qui tandem mihi respondit dicens dominus gubernator omnia sciunt et perfecte scit quidquid super eo conclusum fuerit et indubie finis illius negotii una dierum male terminabitur et alia quae subintulit constrinxit me sub iuramento et specie confessionis, ne cuiquam dicerem ex quibus bene intellexi nuntios vestros sub magno stetisse periculo si exivissent vel adhuc in brevi exirent. Hoc idem quidem bonus fautor mihi Budae referre habuit de indignatione gubernatoris super Saxones quare ipsum non accessi, sed tacite recessi, quare sitis avisati in hoc negotio. Insuper dixit mihi quod isto anno de regno Vngariae nullus apromptuaret se super Turcis ita esset iam conclusum sed ad annum proxime futurum propter pacem cum ipsis Turcis per gubernatorem initam retulit mihi, quomodo dominus rex per dispositionem gubernatoris Renulio hispanatum Siculorum contulisset sigillatis literis ipso praesente et quomodo dominus imperator Romanorum ad festum sancti Georgii martiris in Ratispana congregationem omnium regum et principum Christianorum in proprio ipsorum persona aut in personis suorum nuntiorum celebrabit pro exercitu contra Turcos et etiam ad comprimendum et deponendum lites in Prusia inter dominos cruciferos et populum communem qui se erexit contra eos et iam modernis temporibus magnam fecerunt inter se stragem ita ut mille ex utraque parte mortui manserunt. Propter haec omnia et signanter propter latrocinia comitis Cilie mihi suarum fuit per dominum praepositum sanctae Dorotheae ac alios fautores, ut ad tempus Wyennae pausarem quousque tempora meliorentur. Suadeo sitis vigiles circa civitatem de Vngaris signanter propter causas iam tactas. Magister Erhardus Pictor petit octo florenos, quos adhuc eidem obligamini in labore suo. Consulerem ut mitteretis eos ne expost bis octo perderetis. Alias novitates pro nunc scribere ignoro et ergo pro praesenti istae sufficiunt. Ex Wyenna in dominica Reminiscere, anno domini millesimo quadringentesimo quinquagesimo quarto.

Magister Johannes Rewdel plebanus Brassouiensis, vester exorator.

Auf der Rückseite Adresse: Circumspectis ac providis viris iudici ac toti consulatui civitatis Brassouiensis, fautoribus suis semper honorandis.


1) Vorlage oronibus.^{^}
2) März 10.^{^}