Urkunde Nr. 2881 aus Band V

Seite im UB:

423-424

Druckvorlage:

nach anderem Urkundenbuch

Abdruck als:

Volltext

Sprache:

Latein

---

2881

Rom 1453 September 22 Papst Nikolaus V. teilt dem Erzbischof Dionysius von Gran mit, dass er seine früheren Verfügungen betreffend die Wiederaufrichtung des Milcover Bistums mit dem Sitz in Kronstadt widerruft.

Nicolaus episcopus et cetera dilecto filio Dioinsio tituli sancti Ciriaci in Termis presbitero cardinali, salutem et cetera. Ex salubri sedis apostolice debet provenire subsidio, ut Romanus pontifex concessa seu gesta per eum, cum illa in alterius praeiudicium comperit processisse, revocet, annullet et irritet ac in pristinum statum providendo reducat, prout rerum circumstantiis ponderatis id conspicit in domino salubriter expedire. Dudum siquidem pro parte venerabilis fratris nostri Georgi episcopi Milchoviensis nobis exposito, quod licet olim ecclesia Milchoviensis, que in partibus Transsilvanis sita est et inter alias regni Hungariae cathedrales ecclesias sufficienter dotata et civitas Milchoviensis a catholicis hominibus inhabitata fuisset, tamen propter insultus et pericula perfidissimorum Turchorum ibidem circumstantium ipsa ecclesia penitus desolata eiusque bona occupata existerant et civitas praedicta ab infidelibus, qui Christi fideles ibidem cum eis cohabitare non patiuntur, tantum inhabitabatur. Itaque episcopi Milchovienses, qui dudum antea fuerant propter desolationem huiusmodi ac pericula Turchorum apud dictam ecclesiam a tanto tempore citra cuius contrarii hominum memoria non habebatur, personalem residentiam non fecerant, nec ullo modo facere potuerant, praefatusque Gregorius episcopus per varia et diversa loca sibi necessaria vitae querrere cogebatur, et si sedes cathedralis Milchoviensis ad locum Brassoviensem in diocesi Milchoviensis situm, ut idem episcopus asserebat, qui insignis, muratus et contra infideles munitus ac ad hoc aptus et multitudine catholicorum hominum habitatus existit, transferretur, tam praedictus Gregorius, quam pro tempore existens Milchoviensis episcopus iuxta episcopalis dignitatis decenciam honestius ac commodius se substentare et ad regimen ac informationem catholici gregis sibi commissi prout suo incumbit officio melius intendere posset. Nos eiusdem Gregorii episcopi asserentis etiam tunc, quod locus in quo tu, qui etiam ecclesiae Strigoniensi ex commissione apostolica praesides tuam faciebus residentiam ab eodem loco Brassoviensi per viginti duas dietas distabat in ea parte supplicationibus inclinati venerabili fratri nostro episcopo Colocensi eius proprio nomine non expresso aliis nostris literis dedimus in mandatis, ut vocatis Christi fidelibus et populo civitatis et diocesis praedictarum et aliis, qui fuerint evocandi, de praemissis omnibus et singulis ac eorum circumstantiis universis per se ipsum auctoritate nostra se diligenter informaret et si per eandem informationem sibi de assertis eisdem ac quod locus Brassoviensis ad id aptus et ydoneus esset legitime conctaret dignitatem episcopalem ac sedem cathedralem Milchoviensem cum omnibus et singulis privilegiis praeeminentiis libertatibus, immunitatibus, indultis, iuribus et aliis pertinentiis supradictis ad locum ipsum Brassoviensem auctoritate nostra transferret et ibidem cathedralem ecclesiam Milchoviensem erigeret statuendo ac decernendo praefatum Gregorium et pro tempore existentem Milchoviensem episcopum non Milchoviensem sed Brassoviensem episcopum inantea nominari debere prout in dictis literis quarum tenorem praesentibus literis volumus pro expresso plenius continetur. [S. 424] Cum autem sicut pro parte tua nobis nuper fuit expositum tu, qui etiam legatus natus et primas in regno Ungariae existis, ratione dictae ecclesiae Strigoniensis aliqua loca non pauca etiam remota sub iurisdictione tua habere noscaris inter quae ipse locus Brassoviensis cum aliis in Transilvanis partibus consistentibus in quibus tuos officiales hactenus deputasti eosque illis etiam praefecisti ac ea tenuisti prout etiam tui praedecessores antea tenuerunt existit pro quo necnon erectione dictae novae sedis in illo ab eodem episcopo fuisti sepius requisitus tuque ex certis rationabilibus causis tuum ad id nolueris prestare assensum. Quare pro parte tua nobis fuit humiliter supplicatum ut pro eiusdem ecclesiae Strigoniensis iurium ac tuae iurisdictionis tuitione et conservatione super hoc opportune providere de benignitate apostolica dignaremur. Nos igitur qui nostra te apostolicae sedis privilegia, indulta et literas ea modificatione intelligi volumus ut in unius favorem concessa in alterius praeiudicium non redundent, huiusmodi supplicationibus inclinati literas praedictas et omnia et singula in illis contenta et inde secuta auctoritate apostolica tenore praesentium ex certa scientia revocamus, cassamus et irritamus ac pro nullis et infectis habere et de regestis nostris in quibus registrata sunt cassari et cancellari volumus et mandamus. Et nihilominus praefato archiepiscopo harum serie iniungimus, quatenus ad executionem priorum literarum praedictarum et contentorum in eis nullatenus procedere sive illis obtentis aliquid invocare praesumat, quin immo quicquid illarum praetextu per ipsum factum fuerit sive quomodolibet attemtatum, in irritum revocet et annullet ac in pristinum statum reducat non obstantibus prioribus literis antedictis ceterisque contrariis quibuscumque. Nulli ergo et cetera. Si quis et cetera. Datum Romae apud sanctum Petrum, anno et cetera millesimo quadringentesimo quinquagesimo tertio, decimo Kalendas Octobris, pontificatus nostri anno septimo.