Urkunde Nr. 4779 aus Band VIII

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Heutige Signatur:

Stadt Bistritz [Primăria Oraşului Bistriţa] (Inventar 58ff.), Urkunden.

Druckvorlage:

nach Einschaltung (Insert)

Abdruck als:

Volltext

Sprache:

Latein

---

4779

Wien 1488 April 16 König Matthias verbietet den Rechtsinhabern Siebenbürgens, ihre Untertanen, die den Grundzins entrichtet und keine sonstigen Verpflichtungen haben, an der Umsiedlung in den Bistritzer Distrikt zu hindern.

Mathias dei gratia Hungariae, Bohemiae et cetera rex duxque Austriae fidelibus nostris universis et singulis praelatis, baronibus comitibus, castellanis, nobilibus, ipsorumque officialibus, item civitatibus, oppidis et villis earumque rectoribus, iudicibus et villicis ac alterius cuiusvis status et conditionis hominibus ubivis in partibus regni nostri Transsylvanensibus constitutis et existentibus praesentes visuris salutem et gratiam. Ex querela fidelium nostrorum prudentum et circumspectorum iudicis et iuratorum cetero cumque civium et incolarum civitatis nostrae Bistriciensis ac eiusdem districtus ad modum displicenter intelleximus, qualiter multi forent ex vobis, qui iobagiones suos de eorum bonis et possessionibus habita licentia iustoque terragio deposito aliis etiam debitis eorum plene persolutis in medium eorundem exponentium moraturos cum eorum rebus et bonis libere ebire non permittere, sed diversis adinventis calumniis et occasionibus invitos retinerent et eosdem remanere cogerent in ipsorum exponentium praeiudicium et damnum ac derogamen novissimi decreti regni nostri manifestum. Cum autem tam ex antiqua consuetudine regni nostri Hungariae, quam etiam vigore generalis decreti nostri universi tales iobagiones non solum de aliorum, sed etiam de nostris propriis bonis et possessionibus ad quorumcumque possessiones et bona liberam se transferendi habeant facultatem et hoc in ipso generali decreto nostro manifeste contineatur. Idcirco fidelitati universitatis vestrae serie praesentium firmissime committimus et mandamus, quatenus omnes tales iobagiones vestros, qui ut praefertur, petita licentia depositisque eorum iustis terragiis ac aliis debitis suis persolutis, de vestris bonis et possessionibus in medium dictorum exponentium se moraturos conferre voluerint simul cum universis eorum rebus et bonis et absque omni difficultate et renitentia libere abire et recedere permittatis et permitti faciatis. Nam alioquin commisimus et plenam nostram facultatem dedimus committimusque et damus per praesentes fideli nostro magnifico comiti Stephano de Bathor iudici curiae nostrae et vaivadae earundem partium Transsylvanarum. et cetera, ut nos et quemlibet vestrum ad hoc ipsum faciendum iuxta vim et formam generalis decreti nostri ac etiam omnia alia remedia et gravamina acetius compellat et astringat auctoritate nostra praesentibus sibi in hac parte plenarie attribute mediente. Aliud ergo nulla ratione facere praesumatis. Praesentibus perlectis exhibenti restitutis. Datum in arce nostra Viennensi feria quarta proxima post dominicam Quasimodo, anno domini millesimo quadringentesmo octuagesimo octavo, regnorum nostrorum Hungariae et cetera anno trigesimo primo, Bohemiae vero decimo nono.