Urkunde Nr. 2343 aus Band V

Seite im UB:

30-31

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. II (Inventar 25), Nr. 96.

Druckvorlage:

nach Einschaltung (Insert)

Abdruck als:

Volltext

Sprache:

Latein

---

2343

Hermannstadt 1439 Juni 28 Der öffentliche Notar Johannes Viselbech schaltet die Urkunde des Abtes Michael von Kerz von 1439 Nr. »2342 ein und bezeugt, dass dieser zu Gunsten des Johannes von Bornequel resigniert hat.

In nomine domini amen. Anno domini millesimo quadringentesimo tricesimo nono, die vero vicesima octava mensis Junii hora vesperorum vel quasi, indictione secunda, pontificatus in Christo patris et domini nostri domini Eugenii divina providentia papae quarti anno eius nono, in aula inferiori dotis sive domus ipsius rectoris parochialis ecclesiae civitatis Cibiniensis ibique in mei notarii publici testiumque infrascriptorum ad hoc specialiter vocatorum et rogatorum praesentia personaliter constitutus reverendus in Christo pater et dominus dominus Michael dei gratia abbas monasterii beatae Mariae virginis in Kercz ordinis Cisterciensis, Strigoniensis diocesis, verbaliter allegavit, quomodo ipse iam in dicto monasterio Kercz per decem annos prior fuisset et postea in abbatem promotus ibidem amplius quam per viginti quatuor annos abbatisavit et propterea iam senex effectus tantis laboribus prout dicta requirit abbatia instare non valeret et plura alia allegabat prout in quadam papirea cedula, quam in suis manibus habebat continebatur, quam mihi notario publico infrascripto animo et intentione ipsam abbatiam in Kercz in utilitatem et favorem venerabilis viri domini Johanni de Bornequel sacrae theologiae doctoris etiam dicti ordinis Cisterciensis tunc praesentis resignandi et eidem penitus ab eadem abbatia cedendi tradidit et in manus meas dedit publice alta et intellegibili voce perlegendam asserens, quod in eadem cedula contineretur quod suae esset intentionis faciendi. Quam cedulam ego notarius publicus infrascriptus de manibus praefati reverendi patris domini Michaelis abbatis reverenter, ut decuit, recepi et eam alta et intellegibili voce testibus ad hoc vocatis audientibus legi. Cuius tenor sequitur de verbo ad verbum et est talis: (Folgt die Urkunde des Abtes Michael von 1439 Nr. »2342.) Qua cedula sic ut praemittitur intellegibiliter perlecta coram testibus infrascriptis praefatus dominus Michael resignator iterum vivae vocis oraculo asseruit omnia [S. 31] et singula quae in ipsa cedula lecta per me notarium extiterant de sua essent plena et perfecta voluntate firmoque et perpetuo proposito iterato verbaliter et sub obtestatione summi iudicii datis manibus [ ]¹⁾ ipsam abbatiam cum omnibus suis iuribus et cetera dicto domino Johanni doctori, monacho et sacerdoti²⁾ ipsum ordinem Cisterciensem expresse professo resignavit effective et cessit eidem Johanni idem Michael plene et perfecte ab eadem abbatia in Kercz. Super quibus omnibus et singulis praemissis ipsi domini tam resignator quam ille cui facta est resignatio me publicum notarium infrascriptum praesentem tamquam autenticam personam requisierunt, ut eis aut alteri eorum tot quot forent necessaria conficerem instrumentum vel publica instrumenta, rogantes humiliter venerabiles patres et dominos Michaelem decretorum doctorem, plebanum in Stolczenburgk et decanum protunc capituli Cibiniensis, et Nicolaum Rynysch, artium liberalium magistrum plebanum³⁾ Cibiniensem, ut primus decanatus sigillum et alius suum proprium sigillum unacum sigillo abbatiali ipsius domini Michaelis resignatoris et sigillo conventus monasterii in Kercz praesentibus appendere deberent. Unde praefati domini huiusmodi supplicationibus inclinati sua sigilla cum dictis sigillis praesentibus decreverunt appendenda ad futuram et perpetuam rei memoriam omnium et singulorum praemissorum. Acta sunt haec anno, die, mense, hora, loco, indictione, pontificatu quibus supra. Praesentibus ibidem venerabilibus et discretis viris ac dominis videlicet Nicolao Rynysch artium magistro plebano Cibiniensi, Antonio plebano in Wyncz, Jacobo de Mulenbaco, quondam plebano in Richel, Sigismundo de villa Epponis et Wenczeslao Kirchhain de Dresen presbyteris Strigoniensis, Albensis et Misnensis diocesum et aliis pluribus fide dignis testibus ad praemissa vocatis specialiter et rogatis.

Et ego Johannes Viselbech, clericus Maguntinensis diocesis, publicus sacra imperiali auctoritate notarius, quia dictis renuntiationi, resignationi et cessioni omnibusque aliis et singulis dum sic ut praemittitur, fierent et agerentur unacum praenominatis testibus praesens interfui eaque sic fieri vidi et audivi ideoque hoc praesens publicum instrumentum desuper confecti propria manu scripsi et in hanc publicam formam redegi signoque et nomine meis solitis et consuetis una cum praefatorum duorum sigillorum appensione consignavi in fidem et testimonium omnium et singulorum praemissorum rogatus et requisitus.


1) 1,9 cm unleserlich.^{^}
2) Vorlage sacerdote.^{^}
3) Hierauf noch einmal plebanum.^{^}