Urkunde Nr. 2309 aus Band V

Seite im UB:

7-8

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Kapitel Hermannstadt [Capitlul evanghelic CA Sibiu] (Inventar 298), Urkunden Nr. 23.

Druckvorlage:

nach Original

Abdruck als:

Volltext

Sprache:

Latein

---

2309

Ofen 1438 April 26 Der Graner Erzbischof Georg bestätigt die Wahl Michaels des Pfarrers von Stolzenburg, zum Dekan des Hermannstädter Kapitels.

Georgius de Palocz, miseratione divina archiepiscopus ecclesiae Strigoniensis, locique eiusdem comes perpetuus, primas et apostolicae sedis legatus natus, regni quoque Hungariae supremus cancellarius, dilecto nobis in Christo egregio et honorabili viro domino Michaeli decretorum doctori et plebano de Stolczenburg, nostrae Strigoniensis dioecesis presbitero salutem et paternam benedictionem. Ad exequendum pastoralis officii debitum vigilantibus studiis intendentes, circa statum decanatus et capituli Cibiniensis partium Transsiluanarum similiter nostrae dioecesis et iurisdictionis prospere feliciter et salubriter dirigendum reddimur eo attentiori cura solliciti, quo diligentiori regiminis studio indigere noscatur aciem quoque nostrae mentis extendimus [ ]¹⁾ ipsius praefectibus, prout utilius fore perpendimus, opem et operam adhibemus efficaces, ut singulis sublatis incomodis et prosperis multiplicatis eventibus decanatus [ in]²⁾ ecclesiis et personis sibi subiectis spiritualiter et tempo-[S. 8] raliter gubernetur, dudum siquidem decanatus officii, dictarum sedium et capituli Cibiniensis, per liberam cessionem [ ]³⁾ honorabilis magistri Christanni plebani de Minore Orreo, ipsius sedis et capituli Cibiniensis, ultimi et immediati ac legittimi decani de iure et de facto vacante nos ad personam tuam exigentibus probitatum et magnatum virtutum tuarum meritis, habentes benivolum er generosum respectum sperantes etiam quod per tuae personae ob[indus]triae⁴⁾ qualitatem providenciae donum discretionis virtutem, circumspectionis gratiam et diligentiae studium, poterit eorundem⁵⁾ sedium statui, super praemissis, salubriter provideri te quem altissimus, variis titulis decorationum, propter sua multiplitia merita insignivit, tamquam personam laude dignam et bene meritam ad nominationem, electionem et concordem praesentationem universorum et singulorum plebanorum et ecclesiarum parochialium rectorum in et sub dicto decanatu consistentium ad quos de antiqua et observata consuetudine decanorum electio dinoscitur pertinere, de te legittime et concorditer factis de quibus quidem nominatione, electione et praesentatione, per organum vivae vocis honorabilis viri domini Valentini plebani de Burgperg, dicti capituli et districtus Cibiniensis, nobis extitit facta plena fides in decanum eiusdem capituli et sedium⁶⁾ Cibiniensis auctoritate nostra ordinaria praeficimus, instituimus et confirmamus per praesentes, investientes te per bireti nostri capiti tuo impositionem praesentialiter de eodem curam regimen iurisdictionem etiam contentiosam et omnimodam administrationem ipsius in spiritualibus et temporalibus iuxta antiquam et laudabilem consuetudinem in huiusmodi decanatus officii praefectione, institutione et confirmatione hactenus observatam, tibi plenarie committentes, iniungentes et committentes in virtute sanctae obedientiae et sub excommunicationis poena vobis omnibus et singulis plebanis et ecclesiarum parochialium rectoribus ac sacerdotibus et altaristis curatis et non curatis in et sub dicto decanatu constitutis et tibi ratione ipsius decanatus subiectis, ut te in ipsorum verum et legittimum decanum recipiant, assumant et admittant, tibique tamquam vero ipsorum decano obediant reverentiam quoque et obedientiam solitam praestent de universis quoque et singulis proventibus, fructibus, redditibus et quibuslibet obventionibus dicti decanatus tibi respondeant et quantum in ipsis est faciant per hos quorum interest vel intererit integre respondere, recepto tamen prius a te corporali iuramento in nostris manibus praestito de fidelitate obedientia et reverentia nobis et succesoribus nostris canonice intrantibus, per te prout decet, et expedit impendendis et exhibendis et quod bona seu iura praefati decanatus non alienabis neque distrahes, sed şi qua alienata et distracta forent, ad ius et proprietatem ipsius decanatus repetes et recuperabis iuxta posse. In quorum omnium et singulorum fidem et testimonium praemissorum praesentes literas fieri nostrique sigilii pontificalis maioris iussimus appensione communiri. Datum Budae secundo die festi beati Marci evangelistae, anno domini millesimo quadringentesimo trigesimo octavo.


1) 1,7 cm. Schrift geschwunden.^{^}
2) 1 cm. Schrift geschwunden.^{^}
3) 2,4 cm. Schrift geschwunden.^{^}
4) 0,7 cm. Schrift geschwunden.^{^}
5) eorum auf Rasur.^{^}
6) ium auf Rasur.^{^}